Nunei Reantenangfo16
1Na rabuang bonani Abrami niayai na kahofa Kanani foi fuina sura kawuruampa, wape ne wiwingno Saraii kirawahi. I ne woming wiwing manei wonong fino Hagari, inontarai Mesiri dine.2Ampefe Saraii medu we Abrami deyo, “Boitawanaifa weo Yahwei dohong arikang we yau kaha. Ampefe yohong nehu womingfoi bena riati, ambori minohituti arikang manei ambori ikari we yau.” Tuti Abrami niari kariri kaiwo Saraii medurafo.3Ampefe Saraii, Abrami ne wiwingfoi dohongno ne womingno Hagari wiwing Mesiri foi we Abrami ne wiwing. Na kutu nana mani Abrami niayai kawurua na Kanani fuina sura.4Mayeai Abrami dena ria Hagari, ampefe Hagari doama. Na kutu Hagari deitawanai we doamafo nanai, enerorong dedai tuti tarao Saraii ahang kaha.5Ampefe Saraii medu we Abrami deyo, “Fi Hagari niari we yau nina mani, nemu sarawa fine. Yauno yohongno nehu womingnei we waune, wape arahio deitawanai we doamafo nanai, wiro tarao yau ahang kaha. Kadono Yahwei Andino kiutu tune kaiwone.”6Mayeai Abrami medu we Saraii deyo, “Taramuma, i mani nemu woming dine, wauno wemambiriu sauwine. Ampefe fianai aino enemutituatai mahikai mani, nari weia.” Ainanaya Saraii niari dadira bitoya paria we Hagari, donio wewu netarai weru Saraii.7Mayeai Yahwei ne wewai manei da wei na waya ureng bei kefang we katai wiarora wekamamieifoi, amani kefang we rang to Syuri.8Ainanaya medu we Hagari deyo, “Hagarie, Saraii ne womingne waune, ro na doni ma tuti bo ro to doni finina?” Hagari yoa we wewaifoi deyo, “Iwawu weru Saraii mano irufi weifoi.”9Yahwei ne wewaifoi medu wei deyo, “Barabera wau we mano we woming wei foia, nari kariri fianaino demi wau we narifo.”10Kontai Yahwei ne wewaifoi medu aha deyo, “Yau ambori inari nemu ririawai bitoya paria, ampefe ne bitoyafoi wiro ato afongsoi kaha.”11Yahwei ne wewaifoi medu wei aha deyo, “Kutu ninai wau boama ambori munohituti arikang mang manei. Bohongni wonong fino Ismaeli, weo Yahwei tarao nemu dadirafe ampa.12Nemu arikangwai ambori ne koangfoi netarai toyari keledaio terirai, i ambori dapa mandoni kontai ki, tuti ambori inontarai etapai kontai tonana. I kontai ambori dapa ne doroifosa.”13Mayeai Hagari sahu Yahwei mano medu weifoi na wangno, “Wau mani El-Roi .” Weo enetituai deyo, “Tarai, we antanafa iwati Yahwei urengfo nayai na yau.”14Nanai wedaya mani kamirei mereha nani inontarai esahui we kamirei merehao Lahai-Roi . Kamirei mereha nini wiatai rahang Kadesi tuti Bereti.15Ainanaya Hagari minohituti arikang mang manei we Abrami, tuti Abrami dohongni wonong fino Ismaeli.16Abrami ne fuina piara wonang (86) mani, Hagari minohituti Ismaeli.
The Seed Company