Petro 12
Mawu nitsɛ nimli ji nyɛ
1Lɔ ɔ he je ɔ, nyɛ je ninyɛ kɛ je nyɛ mi kulaa, nɛ nyɛ kpa osato peemi, lakpa yemi, hunga jemi kɛ nihi a he munyu tumi.2Nyɛ ha nɛ Mawu munyu ɔ he kuma nɛ ye nyɛ nɛ nyɛɛ di se kaa bɔ nɛ bimwɔwi hlaa nyɔ nyu ɔ. Ejakaa lɔ ɔ ma ha nɛ nyɛ maa wa kɛ ha yi wami hemi.3Ejakaa nyɛ na bɔ nɛ Nutsɔ ɔ mi mi jɔmi ɔ ngɛ ɔ.4Nyɛɛ ba Kristo ngɔ, e nɔ nɛ Mawu fia Asafo ɔ ngɔ ma kaa tɛ nɛ he wa. Nimli kua lɛ mohu, se e he jua wa ngɛ Mawu hɛ mi nɛ e hla lɛ.5Nyɛ hu nyɛɛ ba Mawu ngɔ nɛ e ngɔ nyɛ kɛ bɔ e asafo ɔ, kaa bɔ nɛ tsu malɔ woɔ tɛhi nɛ he wa kɛ maa tsu ɔ. Nɛ nyɛ sɔmɔ kaa osɔfo klɔuklɔuhi, nɛ nyɛɛ sa mumi mi bɔ nɛ maa sa Mawu hɛ mi kɛ gu Yesu Kristo nɔ.6Ejakaa Ngmami ɔ de ke, “O nɛ, i ngɛ Kristo tsɔe kaa ye asafo ɔ sisi kla; a je blɔ hla lɛ nɛ e he jua wa, nɛ zo be nihi nɛ heɔ e nɔ yeɔ gbee kɔkɔɔkɔ.”7Ee, e he jua wa saminya kɛ ha nyɛ nihi nɛ nyɛ heɔ e nɔ yeɔ ɔ, se ni nɛmɛ nɛ kua lɛ ɔ, e ngɛ kaa “Tɛ nɛ tsu fiali ɔmɛ kua a, nɛ lɔ ɔ nɔuu ba plɛ kɔ nya tɛ kɛ ha mɛ ɔ.”8Ngmami ɔ de ngɛ he kpa ko hu ke, “Lɛ ji tɛ nɛ ni konɛ ma tɛ, kɛ tɛ sa nɛ ma ha nɛ a maa nɔɔ si.” A ma tɛ si, ejakaa a bui Mawu Munyu ɔ tue, enɛ ɔ ji tue gblami nɛ a to kɛ ha mɛ.9Se nyɛɛ lɛɛ e slo nyɛ, ejakaa Mawu nɛ ji matsɛ ɔ nitsɛ nɛ hla nyɛ kaa osɔfohi kɛ e bimɛ, nɛ e pee nyɛ klɔuklɔu konɛ nyɛɛ ye odase kɛ tsɔɔ ni kpahi bɔ nɛ e tsɛ nyɛ kɛ je diblii mi kɛ ba e nyakpɛ la a he mi ɔ.10Be mi nɛ nyɛ ngɛ diblii ɔ mi ɔ, nyɛ pi nɔ ko kulaa, se amlɔ nɛ ɔ, nyɛ plɛ Mawu bimɛ. Kekle ɔ, a nɛ nyɛ mɔbɔ, se jehanɛ ɔ, a na nyɛ mɔbɔ.11Anyɛmimɛ, nibwɔhi kɛ blɔ hiali ji wɔ ngɛ hiɛ ɔ. Akɛnɛ hiɔwe ji wa we he je ɔ, i ngɛ nyɛ pɛɛ kpae kaa nyɛ ko di je nɛ ɔ mi akɔnɔ níhi a se, ejakaa a kɛ wɔ hwuu ta ngɛ mumi mi.12Nyɛɛ hyɛ nyɛ he saminya ngɛ nihi nɛ a he we a yi wami ɔmɛ a he. Ejakaa ke a tu munyu kɛ gbe nyɛ he guɛ tete po ɔ, a maa wo Mawu hɛ mi nyami ngɛ nyɛ ni tsumi kpakpa amɛ a he ngɛ Kristo bami ligbi ɔ nɔ.13Ngɛ Nutsɔ ɔ he ɔ, nyɛɛ ba nyɛ he si kɛ ha ma nɔ yeli ɔmɛ.14E to amlaalo ɔ nɛ e gbla yayami peeli a tue, nɛ a wo kpakpa peeli a hɛ mi nyami.15Ejakaa Mawu suɔmi nya ji kaa nyɛ kpakpa peemi ma ha nɛ kuasiahi ma kpa nyɛ he munyu yaya tumi .16Nyɛɛ hi si kaa nihi nɛ ye a he; pi nihi nɛ ye a he kɛ ha yayami peemi, se kaa Mawu sɔmɔli.17Nyɛɛ bu nɔ tsuaa nɔ; nɛ nyɛɛ suɔ Kristo se nyɛɛli nɛ ngɛ he fɛɛ he. Nyɛɛ ye Mawu gbeye, nɛ nyɛɛ bu nɔ yeli ɔmɛ tue.18Mawanyumuhi kɛ mawayihi, nyɛɛ ba nyɛ he si kɛ ha nyɛ nutsɔ ɔmɛ nɛ nyɛɛ ye a gbi nɔ, pi nihi nɛ a mi mi jɔ nɛ a peeɔ nyɛ kpakpa kɛkɛ, se mohu ni nɛmɛ nɛ a yi mi wa ngɛ nyɛ nɔ ɔ hulɔ.19Ke nyɛ ngɔ nyɛ hɛ kɛ fɔ Mawu nɔ nɛ nyɛ pee we yayami ko se nyɛ ngɛ nɔ́ nae ɔ, nyɛ bua nɛ jɔ nyɛ he.20Ejakaa ke nyɛ pee yayami nɛ a gbla nyɛ tue ngɛ he nɛ nyɛ to nyɛ tsui si ɔ, mɛni hiɔwo nɛ nyɛ ma na ngɛ mi? Se ke kpakpa peemi he je nɛ nyɛ na amanehlu ngɛ nɛ nyɛ to nyɛ tsui si ɔ, lɛɛ e sa Mawu hɛ mi.21Enɛ ɔ he je nɛ Mawu tsɛ nyɛ ngɛ, ejakaa Kristo nitsɛ na amanehlu kɛ to nyɛ okadi konɛ nyɛɛ nyɛɛ e se.22E pee we yayami ko nɛ e yi lakpa hulɔ.23Benɛ a jɛ lɛ ɔ, e jɛ we nɔ ko kɛ tui nane mi. E na amanehlu se e de we nɔ́ ko. E to e sane ɔ ngɔ wo Mawu, nɔ nɛ kojoɔ ngɛ dami nya a dɛ mi.24Lɛ nɛ e tloo wa he yayami ɔmɛ kɛ a he tue gblami ɔmɛ kɛ ho sɛumi tso ɔ nɔ ya, konɛ wa kpa yayami peemi nɛ waa pee kpakpa. Kɛ gu e nɔ nami ngɛ sɛumi tso ɔ nɔ nɛ a tsa nyɛ ngɛ nɔmlɔ tso kɛ mumi blɔ fa mi.25Ejakaa jinɛ nyɛ ngɛ kaa tohi nɛ laa blɔ, se amlɔ nɛ ɔ a kpale nyɛ kɛ ba nyɛ nɔ hyɛlɔ kɛ yi baalɔ ɔ ngɔ.Biblica, Inc.