1 Peetelo4
Usobo mbiili
1Bu Kristo hamoni pasi mu musunya a nde, benu kaka, vangamaani bumosi we nde. Mu tooni ati, wu miimono pasi mu musunya a nde, miitahuha na masumu.2Mu taangu yi yimiisaala benu ŋa toto, a hwafwana ti benu libaadyata we bu huli mapeyu ma musunya ve, ka dyataani we bu huli litondo la Nzambi.3Hutsomi, benu laavyosi taangu yindahi, mu ubaasa mavaanga ma mu baava kinya huli ba baaveleyaba Nzambi. Benu laavahuli linyutu la benu mu bumbembo, mu mapeyu ma musunya, mu malaangi, mu mikungi mi udya na unywa, na ubaasambila bifwita.4Bunuubu, ba baaveleyaba Nzambi, bali mu ukimuha bu benu laabwevelepfutana na bo hutso a mbiili bumbembo yi yalendolo iteesi. Isalu hya bo aka ubaatuha benu.5Ka bo bu uva ikuumbu huli wu amiivangama mu utsundasa bamoonyi na babaakwa.6Ni mu buuna, Yisu hayabisi Musamu wu Mubwe pa huli babaakwa. Humbisa uyaka tsundusu yi musunya we bu huli litondo la baatu, bo bu uba moonyi mu Livupu, we bu huli litondo la Nzambi.Tsalili bungodu bwa Nzambi
7Tsukusu a tsi yika bebele. Ni mu buuna, baabaani na mbiili ya tsiki na likanda, mana benu libaatwala usambila.8Hati a tsomi, baatondosonwani mu mifudi, mu tooni ati, litondo libaafuha masumu ma malahi.9Baayakasanaani mu manzo ma benu, hwavele uŋono.10Pasi muutu ŋa hati la benu, abaasalila bungodu bu Nzambi hava nde mu ukumbasa bana. Baasaani buuna, mana benu liba bakeelisi bababwe, baa hyese hi hilahi hya Nzambi.11Tso muutu li na bungodu bu utoyo, nde afwana uyabisa Mambu ma Nzambi. Tso muutu li na bungodu bu usalisa bambaahi, nde afwana usalila bwo na mifudi mi Nzambi ubaava nde. Saani buuna mana mu moosi, Nzambi ayaka muyusu mu Yisu Kristo, mu nde huli na muyusu na matwala mu bilima na bilima. Ameni!Mapasi ma wa Mukristo
12Bambaahi baa litondo, a likimuha bu lili hutso muvitu malobese ve. A latsima ti dyaambu la kimuhili li lili mu uyila benu.13Ka baabaani na kinya bu lili mu umono mapasi ma Kristo hamoni, mana benu ka liluula mu kinya yindahi ŋa nde hu umonehele mu muyusu a nde huli baatu boosi.14Ni kinya huli benu tso baatu bali mu utuha benu bu lili bayihi ba Kristo. Mu tooni ati, Livupu la Nzambi li muyusu, lili na benu.15A batsundasa tso mumosi ŋa hati la benu bu nde ali mudubi ve, muyibi, muvaangi a ma mabi, buuve mukoti a mu mambu ma bangani.16Ka tso bali mu utsundasa muutu mu tooni ati nde li wa Mukristo, nde anyaha umono tsonyi. Nyaha muutu mo wuuna abaafutala Nzambi matondo, bu bali mu uteele nde wa Mukristo.17Tangu yimiito yi tsundusu yi ubaandiha. Hati a tsomi, bu umaatsundasa ibaandu hya Nzambi . Ka tso tsundusu yibandihi mu bisu baatu ba Nzambi, buni tsukusu yi uba, ŋa tsundusu yi ubwa ŋa yulu a ba bali mu uvelesa hiitu mu Musamu wu Mubwe wa Nzambi?18We bu Mabasonehe mali mu uleele:«Tso hu li pasi mu mutsiitsa mu uyoboho,sa ufula pasi mu nga mavaanga ma mabi na mu nga masumu»19Ni mu buuna, nyaha ba bali mu umono pasi we bu hu li litondo la Nzambi, babaahwada mu ubaasa mavaanga ma mabwe. Bo baafwana ubaayeholo idiingu hya bo huli Muvaangi a bo, wu li wu akuha mu manzuhisini ma nde.Wycliffe Bible Translators, Inc.