Mark15
1Mư tũq jrang mư-ờp nữn, dơgrữq mơnuĩh gơnuar pioh kaya duh talơvãt vơyai sì dơgrữq pô tơha sì mơnuĩh gơnuar pơto voh-va sì avih gah tơpuôl Jơnũm Ju-đa. Pơnõq nhũ akãq Yàc Je-su sì va Pitrai nao sì pơjao ga Phi-lat.2Phi-lat tơnĩa Pitrai: “Ung viãq la Pitao vual vơla Ju-đa lơĩh?” Pitrai hẽ: “Yơu ung vloh đơp nữn.”3Vloh dơgrữq mơnuĩh gơnuar pioh kaya duh talơvãt prong yãq Pitrai lũ kaya.4Yơu nữn, Phi-lat tơnĩa Pitrai wỡq: “Ung ôh hẽ kaya hagĩq yơh? Iãq dih, pơnõq nhũ ãn yãq ung lũ dơgrữq dlàiq!”5Nữn Yàc Je-su ôh hẽ pơnuaĩq halơi, ngãq ga Phi-lat iỡuq mãq ngãq krơi.6Vơnah tơmo, dơlãp harơi adãt, Phi-lat lơđãp pơrlao ga pơnõq nhũ sa aràc mơnuĩh jam, nữn pơnõq nhũ lakơu.7Hũ sa aràc hũ angãn la Ba-ra-ba kađòc krỡq jam sigỡuq sì mơnuĩh ngãq nhũn sabôn, mưng dlàiq pa-mơtai mơnuĩh dơlãp tũq ngãq nhũn sabôn.8Tơpuôl vual vơla va gỡuq mai trôh, pãp Phi-lat sì pơdòq lakơu ung ngãq kaya ung lơđãp ngãq ga pơnõq nhũ.9Tũq nữn, Phi-lat tơnĩa pơnõq nhũ, làiq: “Pơnõq hã ưng yơh kơu pơrlao Pitao vual vơla Ju-đa ga pơnõq hã lơĩh?”10Kơyua ung nữn thơu gơnĩt làiq dơgrữq mơnuĩh gơnuar pioh kaya duh talơvãt prong pơjao Yàc Je-su ga drơi kơyua mưng hatai lơmùq mơvai.11Nữn dơgrữq mơnuĩh gơnuar pioh kaya duh talơvãt pachôh vual vơla pioh lakơu pơrlao Ba-ra-ba ga drơi pa-vlữq wỡq.12Bôh làiq yơu nữn, tũq tơnĩa wỡq Phi-lat đơp sì pơnõq nhũ: “Yơu nữn, kơu iỡuq ngãq yơu halơi nĩ sì mơnuĩh pơnõq hã angãn la Pitao vual vơla Ju-đa lơĩq?”13Tũq nữn, vual vơla driãu prong: “Pỡc đĩn vẽq nhũ pãq dlòc kayơu pỡc!”14Nữn Phi-lat đơp sì pơnõq nhũ: “Kơyua kaya mơsãc hagĩq mơnuĩh nĩ song ngãq sỗq dlàiq?” Nữn pơnõq nhũ vloh brõq priãu papơ prong rlao wỡq: “Pỡc đĩn vẽq nhũ pãq dlòc kayơu pỡc.”15Tũq nữn, Phi-lat kơyua ưng ngãq ga siàp hatai vual vơla lũ, nữn pơrlao Ba-ra-ba ga pơnõq nhũ nữn poh atòc Yàc Je-su nữn vloh pơjao Pitrai pioh ãt pỡc đĩn.16Tơpuôl lĩng va Pitrai tơma dơlãp gơlãng, (nữn la anĩh mơnuĩh apãt akõq ling) sì iơu pơtõm avih tơpuôl lĩng pãq đỡn.17Pơnõq nhũ pa-chồq ga Yàc Je-su sa vlah ao mơriãh, sì pơnõq nhũ mơnham sa voh chrơng mưng druơi pa-tơruãq pãq dlòc akõq Pitrai.18Vloh pơnõq nhũ pơdòq chuãq rơwãc Pitrai làiq: “Sơ-uỗt mơyòp Pitao vual vơla Ju-đa!”19Nữn pơnõq nhũ angui gai poh pãq dlòc akõq Pitrai sì ka-chôh ia mơvah dì Pitrai, sì pơnõq nhũ aguãl tơ-ồq trỗt pãq anãq Pitrai.20Tũq nữn pơnõq nhũ song tlao siẽq siẽl Pitrai vloh, pơnõq nhũ wàq ao mơriãh Pitrai tơviãq, sì pa-chồq ao wỡq ga Pitrai, vloh va Pitrai nao pỡc đĩn pãq dlòc kayơu pỡc.21Hũ sa aràc mơnuĩh nao gãt jơlàt vơrhơu mưng palơi tìt tơgùq angãn la Si-môn, mơnuĩh Si-ren (ama A-lec-san-đơ hũ sì Ru-phu) sì pơnõq nhũ mãq ung gơlãp kayơu pỡc ga Pitrai hũ.22Pơnõq nhũ va Yàc Je-su trôh anĩh Gô-gô-tha (gơtha la “Anĩh tơlàc akõq”).23Pơnõq nhũ vrơi ga Pitrai mơnhũm alãc jrơu sì chai-trỗq, nữn Pitrai ôh mơnhũm.24Vloh pơnõq nhũ pỡc đĩn Pitrai sì pa-mơpha gỡuq ao Pitrai hũ mưng kaya suãq katih, pioh thơu asơi hũ kaya halơi.25Tũq jơ nĩ la tũq bãc tlơu, pơnõq nhũ pỡc đĩn Yàc,26Nĩ la pãng pơpàt wãq dlàiq Pitrai hũ: “Pitao Vual Vơla Ju-đa.”27Sigỡuq sì Pitrai pơnõq nhũ kung pỡc đĩn dua aràc mơnuĩh tlẽq sơwah, sa aràc gah hơnuãq Pitrai, dòq sa aràc gah iãu.28(Yơu nữn pơnuaĩq Sơrãq Sơđah hũ pa-tơviãq iỡuq yơu nữn, làiq: “Pitrai kađòc ràc angãn sigỡuq sì dơlãp tơpuôl mơnuĩh ôh hũ voh-va.”)29Dơgrữq mơnuĩh nao mai pãq đỡn siẽq siẽl Pitrai, rơnhah akõq, đơp: “E! Hã la mơnuĩh ròq yah sàc talơvãt, sì padỡc wỡq dơlãp tlơu harơi dih,30iỡuq dõc pơ-tlah vẽq krơi rùp drơi sì trỗt tlah mưng kayơu pỡc vẽq!”31Dơgrữq mơnuĩh gơnuar pioh kaya duh talơvãt sì dơgrữq mơnuĩh gơnuar pơto voh-va kung tlao vlơi Pitrai sigỡuq yơu nữn, làiq: “Nhũ dõc mơnuĩh tơmo, nữn nhũ ôh rgơi dõc tlah krơi rùp drơi.32Yàc Dõc Pơ-tlah, Pitao vual vơla Is-ra-el hũ tũq nĩ, iỡuq trỗt tlah mưng kayơu pỡc vẽq, pioh pơnõq nĩ bôh sì pãc-tui.” Dơgrữq mơnuĩh kađòc pỡc đĩn sigỡuq sì Pitrai kung siẽq siẽl Pitrai.33Trôh tũq jơ bãc nãm, sồp kơnãm vơvãc tlỗp vãq avih tơnãh tãl trôh tũq jơ bãc salơpãn.34Dơlãp tũq jơ bãc salơpãn, Yàc Je-su iơu prong sãp làiq: “E-lô-i, E-lô-i, lam-ma-sa-bãt-ta-ni?” Gơtha la: “Ơ Yàc Pô Lơngĩq hlãq, Ơ Yàc Pô Lơngĩq hlãq, hayơu Pitrai tlàq luơi hlãq?”35Tũq dơgrữq mơnuĩh dỡc jẽq pãq đỡn hmỡq yơu nữn, pơnõq nhũ đơp: “Dih, nhũ ãn iơu E-li.”36Vloh hũ aràc mơnuĩh đuaĩq nao mãq kapah ia tơsìq sì iũm vãq ia mơsãp pơtlãp tơma gai tơràc, vloh vrơi ga Pitrai mơnhũm, đơp: “Iỡuq luơi gơdòq nhũ, mững E-li mai trôh va nhũ trỗt lơĩh!”37Vloh Yàc Je-su iơu tơgùq sa sãp prong sì tloh yuà.38Tũq nữn, vlah pơcha dơrning dơlãp sàc talơvãt kađòc tarơhẽt tơviãq ngãq dua vơnah mưng dlòc tãl ala.39Tũq mơnuĩh apãt akõq lĩng dỡc pãq anãq Yàc Je-su bôh Pitrai tloh yuà yơu nữn, ung nữn đơp: “Viãq mơnuĩh nĩ la Anàq Yàc Pô Lơngĩq hũ.”40Kung hũ dơgrữq mơnuĩh kamơi dỡc iãq mưng atah, dơlãp tơpuôl nhũ hũ Ma-ri Ma-đơ-len, Ma-ri (ami Ja-kơ tìt sì Jô-se) sì Sa-lô-me,41la dơgrữq mơnuĩh tũq Pitrai dòq pãq Ga-li-le pơnõq nhũ song nao tui Pitrai sì duh vruãq Pitrai, kung hũ lũ mơnuĩh kamơi tơmo wỡq tui Pitrai pãq Je-ru-sa-lem.42Trôh tũq sồp mơlãp vloh, kơyua harơi nữn la Harơi Rơchãc Lơĩh, nữn la harơi halơu dì harơi Sa-bat,43Jô-sep mơnuĩh mưng A-ri-ma-the trôh, ung la sa aràc mơnuĩh hũ ki ngãm dơlãp Tơpuôl Jơnũm, sì rùp phuỗt ung kung ãn chơkhãq chàc lơgar Yàc Pô Lơngĩq, ung khĩn hatai tơma pãp Phi-lat sì lakơu rùp atơu Yàc Je-su.44Tũq nữn, Phi-lat mãq ngãq krơi tũq hmỡq Yàc Je-su song mơtai, yơu nữn ung iơu mơnuĩh apãt akõq lĩng pioh tơnĩa iãq Pitrai song mơtai vloh.45Tũq nữn thơu gơnĩt hũ mơnuĩh apãt akõq lĩng vrơi pa-thơu, ung nữn pơjao rùp atơu ga Jô-sep.46Jô-sep song vlơi sa vlah khãt pơcha lơmuỡn. Ung pa-trỗt Pitrai mưng dlòc kayơu pỡc sì mãq pơcha lơmuỡn pơpòq atơu nữn, sì chẽq Pitrai tơma dơlãp lơvàc vơnẽq song hũ boh ngãq mưng dơlãp patơu tali. Hadơi nữn ung vlữc sa voh patơu prong pioh vơvãc chơkhãq mơvah bãc vơnẽq.47Ma-ri Ma-đơ-len sì Ma-ri ami Jô-sep bôh anĩh Yàc Je-su va dor.
FAR EAST BROADCASTING COMPANY