YOANI4
Yesu nɔbɔ mwali ɔ Samalia
1Bafalusai baoka boo Yesu aimea na batingami bike ko ainaka onɔ Yoani.2– Yesu yo mɛɛnɛ ainaka, endolo batingami ba nde3– Ehole ɛ ooka Yesu midjɔ imabalaka bo, adonga ena ta Yuda ko asɔmbɔ ta Galilai.4Ta tina hee, ɛboanaka boo akatise Samalia.5Aimea mbuti na ibonga la Samalia, ilabeakabo Sikala, mbuti na gue ɛ Yakobo ɛɛpayo mwana ɔ nde Yosepu.6Mombɔndɔ ma madiba ma Yakobo madaka ena. Ɔembɛ Yesu na mwɛngɔ, adaa ta mokpɛngɔ ma mombɔndɔ. Ɛdaka mbuti na ndanda ɛ busa.7Mwali ɔ Samalia adoa tin'oloka madiba ko Yesu abala na nde boo: «Pani madiba ma omwa.»8Na bea, batingami ba nde bakɛkɛ ta ibonga tina ɛ osomba mia ma oya.9Endolo mwali mo Samalia abala na Yesu boo: «Moda ndani wɛ, ona odii moyuda, ohɔni osɛngɛ madiba ma omwa, odii mbai, mwali ɔ Samalia!» Tina ɛ boo Bayuda, tebaokane na Basamalia.10Yesu amosɔmbɛdja boo: «Okɔki wɛ djeba epeeli ɛ Ndjambe ko ona ɔɔsɛngɛkɛ madiba, edii wɛ moto okɔki mosɛngɛ yo madiba ko akɔki opa wɛ madiba ima mohelo.»11Mwali abala na nde boo: «Kumu, oditi na eka ɛ oloka madiba ko mombɔndɔ modii na mbɛngɛ. Odihalea wɛ madiba mia ma mohelo hoo?12Taatasu Yakobo alopa mombɔndɔ muu ma madiba; amwa yo mɛɛnɛ madiba ma mombɔndɔ muu, bana ba nde na meela ma nde ma tito bamamwa koko. Olɛdji onɔi Yakobo?»13Yesu amosɔmbɛdja boo: «Moto mosusu omwi madiba mii aokalea posa ɛ madiba naikina;14endolo akamwa madiba imamopalea mbai, aoketebi naikina posa ɛ madiba: madiba imamopalea mbai maimeabi odii yo elengɛɛ molo ma ediba imapɛpɛ okoka ko imakatindoe mbunoko mohelo ma kɔbili.»15Mwali abala na nde boo: «Kumu, pani madiba mia, bɛngɛ boo nataoka posa ko natadua naikina haa aloka madiba.»16Yesu abala na nde boo: «Kɛɛ abee muma wɛ ko sɔmbɔ haa.»17Mwali amosɔmbɛdja boo: «Naditi na moomi.» Ko Yesu abala na nde boo: «Obali sooti boo oditi na moomi;18tina ɛ boo ɔdaka na bami batano ko hoo odii nawɛ hadɛdi aditi muma wɛ. Obali sooti.»19Mwali abala na nde boo: «Kumu, naeni boo odii motɛli.20Bataatasu bakumedjaka Ndjambe ta diko la ngomba hee, endolo ino Bayuda obalini boo esika ɛ okumedja Ndjambe edii Yelusalɛmɛ.»21Yesu amosɔmbɛdja boo: «Dimeani, ehole ɛduake, okɛɛtebini diko la ngomba hee kaoko ta Yelusalɛmɛ tina ɛ okumedja Tata.22Ino, Basamalia okakumedjaeni Ndjambe pɛpɛ omodjeba; iso Bayuda lokamokumedjae ko lokamodjebe, tina ɛ boo mohelo madoa na ndjia ɛ Bayuda.23Endolo ehole ɛduake, ko eimei ehele, ehole ɛ bakumedjɛli ba sooti bakumedjabi Tata ta mwembo ko ta sooti; tina ɛ boo edii baongɔɔneli ibakapale Tata.24Ndjambe adii Mwembo, ko eboani na bato ibakamokumedjae bamokumedjae ta Mwembo ko ta sooti.»25Mwali abala na nde boo: «Nadjebaka boo Masia hoo okabeebo Klisto adoabi. Ehole edoabi yo, alotingodjabi midjɔ misusu.»26Yesu abala na nde boo: «Nadii Masia, ona ɔbalaka na wɛ.»27Oko ta ehole ena batingami ba Yesu bahula; bakamoa ɔmoenɛbo asoola na mwali. Endolo pɛpɛ omɔti ɔ bobo ɔmohɔdja boo: «Ɛpalaka wɛ odii yo yee?» Kaoko: «Tina ɛsoolaka wɛ na nde nda?»28Bea mwali akina kulutu ɛ nde ɛ madiba ena ko asɔmbɔ ta ibonga, atɔndɔ bato boo:29«Dua aindjeni nasaki na moto omɔti ona otɔndɔini midjɔ misusu makɔɔ mbai. Adaetelea Masia?»30Bato baimana ta ibonga ko bakɛɛ odii Yesu.31Ta ehole ena, batingami baongɔɔnɔ Yesu boo: «Labi, peta yaka!»32Endolo abasɔmbɛdja boo: «Nadii na mia ma oya, imadiino pɛpɛ odjeba.»33Na bea, batingami basahɔdjana ibo mɛɛnɛ boo: «Emolwɛi moto omɔti mia ma oya?»34Yesu abala na bu boo: «Mia ma mbai edii okɔ opala ba ona ɔlomani ko na okokedja elomu ɛ nde.35Ino mɛɛnɛ, ɔbalakani boo: “Edikai songe banei ko mbuma djibukamalea.” Endolo mbai, nabali na nu boo, hokeani gue opele: mbuma djikpeti ko ibwani na obukama!36Ona ɔbukaka mbuma asidjai odiha iputi la nde ko adii obolea mbuma tina ɛ mohelo ma kɔbili; oko bea, ona ɔɔnaka ko ona obuka mbuma badii osepa engbanga.37Na tina hee, edii sooti indjɛ ilibali boo: “Omɔti akaone ko okina akabuke mbuma.”38Naolomani abuka mbuma ta gue ɛdaano pɛpɛ osala; bakina basala ena ko ino odoi abukani mbuna dja ipetola la bobo.»39Bato ba Samalia bike ba ibonga dia badimea Yesu tina ɛ tati ena ɛpa mwali boo: «Atɔndɔini midjɔ misusu imakɔɔ mbai.»40Ta tina hee, ehole eimea bato ba Samalia mbuti na nde, bamongɔɔnɔ boo adikame na bu; ko Yesu adikama ena maswi mabae.41Bato bakina badhima, diko la midjɔ imabalaka yo mɛɛnɛ;42ko babala na mwali ona boo: «Hadɛdi lodimiti etoko ta tina ɛ midjɔ imibali wɛ, endolo tina ɛ lomooki iso mɛɛnɛ, ko lodjebi boo adii sooti mɛɛnɛ Moheledja ɔ ngondo.»Yesu aheledjai mwana moomi ɔ kumu ɔ basoda
43Ngɔngɔ dja maswi mabae, Yesu adonga ena ko akɛɛ ta Galilai.44Yo mɛɛnɛ Yesu apa tati boo: «Motɛli ta dihe ekumu ta ekomi ɛ nde.»45Endolo, ehole ɛimea yo ta Galilai, aosɔmɔ opele, na bato ba Galilai tina ɛ ibo koko bakɛɛ ta Yelusalɛmɛ ta tɛkɛ ko baenɛ misusu imakɔɔ Yesu.46Na bea, Yesu asɔmbɔ ta Kana, ngando ɛ Galilai, esika ɛhekodja yo madiba vino. Ena bea ta Kapalanauma kumu ɔ basoda ɔ gala adaka na mwana ɔ nde moomi na epeko.47Ehole ɛoka yo boo Yesu adongi ta Yuda ko aimei ta Galilai, akɛɛ amotanea ko amongɔɔnɔ boo adoe ta Kapalanauma aheledja mwana ɔ nde moomi ona ɔdaka mbuti na ogwa.48Yesu abala na nde boo: «Odiini na posa ɛ oenɛ bimbete na midjɔ ma okamoa, emiti daa bea, otadhimani noko osinɛɛ!»49Kumu ɔ basoda ɔ gala amosɔmbɛdja boo: «Kumu, dua odii mbai boso ba boo mwana ɔ mbai agwɛ.»50Yesu abala na nde boo: «Sɔmbɔ odii wɛ, mwana ɔ wɛ moomi aheli.» Kumu ona ɔ basoda adhima midjɔ mabala Yesu na nde ko asɔmbɔ.51Oko adale na ndjia ta iyane, basali ba nde badoa asaka na nde ko babala na nde boo: «Mwana ɔ wɛ aheli!»52Abahɔdja ehole ndani ɛoka mwana ɔ nde opele, ko bamosɔmbɛdja boo: «Edaki mɔkɔ ta ehole ɛ boso ngɔngɔ dja ndanda ɛ busa, mosa momokini ta mokuku.»53Sɛngɛmoto adjeba boo ɛdaka oko ta ehole ɛbala Yesu na nde boo: «Mwana ɔ wɛ aheli.» Bea, yo na bato basusu ba ndako ɛ nde badhima Yesu.54Edii embete ɛ babae ɛokamoa ɛkɔɔ Yesu, ngɔngɔ dja ihule ta Yuda ta oimea ba nde ta Galilai.The Seed Company