Eermiyaasikaa Raaga7
Erimiyaasi Galmi Giddo Barsiissee qico
1Ermiyaasiba'a dageek Duuchchi Woddiki Goottiki hiyyichi:2«Duuchchi Woddike Goottike minixxe hula'ni uuri; ookkonna hita'n lallabatto qici:« ‹Duuchchi Woddika Gootta magenooffachchotee'e tenne huluwwanaa'n e'yitina'neeke ha'no Yihudiinke arda duuchchaa Duuchchi Woddike Goottika hiyyichcho laqqe.3Lumoke Duuchchi Woddik Gootti Isira'eelik Mageni hiyya'nee qici: Me'injo ha'nookanna huje ha'nooxxa giisedhdhe; aninna ha'noo konne booncho'ni hexxinaashsha assannon.4Kunni, «Duuchchi Woddike Goottike galman, kunni Duuchhci Woddike galman, Kunni Duuchchi Woddike galman hitina'n!» dhariinke hiyyichcho'n addatinoqqe.5Me'injo ha'nookanna huje ha'nooxxa dhugaati giissexxinoole, wele'anna wel qajeelummati hexxinoole6bogake'e keessumma manna amanna anna affebaaxxa oose, aro'o shi'witeexxa melaaluwwa miica gophphinoole, konne booncho'ni balleessa afee manjixxa munde duna gophphinoole, ho'noo miidhaaka wele magenuwwa fordofa gophphinoole,7duuchchi woddi'a annuwwa ha'nooke uwwenneke boga'n, konne booncho'ni hexxinaasha assannoni.8Ha'noo kinniwayifulabaake dharichcha hiyyichcho'ni addatina'neen.9« ‹Moortina'neen; manjo shiltina'neen; yabaabuldina'neen; dhariki kakattina'neen; Ba'aali'a hixaana gubbina'neen; egendinebaaka wele magenuwwanna hordofina'neen.10Summi ank ye'emaneeke konne minibaa daggine ani edo uurritineexxi, «No'o nagi'aken» hitina'ni tennee battitte yaane hujjina'neen.11Summi anki ye'ema'neek kunni mini moodhalshetixxe wolo'o ha'no'a kadee? Kunnise assitina'neexxa yaane uudenneni! Hiyya'neen Duuchchi Woddik Gootti.12« ‹Yoona ani edise'e anke summike galduma assedhennaka boonchiba'a Seelo'a martine'e arda anke Isira'eelixxe fuggaalessummanaa'n kexxeexxa ookko assennexxanna uudde.13Ha'no tenne duuchcha assitinaa wodda ani lebe lebe'e ha'no'n haaso'ennen ha'noo kinni laqqinebaan; ha'no'o ye'enneni ha'no kinni cuqqi hitinebaan; hiyya'neen Duuchchi Woddik Gootti.14Tennexxee Seelo'n assenashshanni ta'anna summi ank ye'ema'neeke booncho'ni, ha'no addatina'neeke galma'ni, annuwwa ha'nookeenna ha'no'a uwwenneke konne boonicho'n ittanni assannon.15Ha'nooka dayyuwwa Efireemika arda duuchcha fugussenaashshanni ha'noonna ifi edii'ni fugussannon.›
Ardnxa Ajajema Gopha
16«Koo Ermiyaasi hitattoxxa laqa gophaannaxxe'e, konne ardi'a soodattoxxe'e, kadhattoxxe'e, insa'nexxe'e ane'e magannissoxxe'e.17Insa'ne Yihudake qachchuwwa'ninna Iyyerusaalemike oruwwa'ni assina'neexxa ati uuda'ni hexxebexxoo?18Iimatixxe mootite'a kebbo kebbisatee, oose haqqe qoccaan; annuwwi giira ha'ishaan; melaalletinna buko bukeessitaan insa'ne anee mufachchiinso'a wele magenuwwi'anna ha'watika tolcha shiqinshaan.19Tenne assina'neechchi ane'e mufachchiinso'ate? Hiyya'neen Duuchchi Woddik Gootti Saxxeexxin insa'ne'ni geya'neek saliphinni miidhemmaaki insa'nedebaa?20« ‹Tennexxee Duuchchi Woddiki Goottinna Konne booncho'n manjoke'ninna horeke'ni, haqquwate'inna bogake'ni hexxeexxe midha duuchhca'n mufe anixxanna bala lolaasanonon; bubbaan xoxxabaan.21« ‹Isira'eelik Duuchchi Woddiki Gootti Mageni hiyya'nee qici: Cincatike ha'noke Tolcha'n wele tolchanna lebbine maallakana ifi'aanni itte!22Edika ha'noka annuwwa Gibtsee'n fulichenne wodda, tolchuwwinxeenna ciincatike tolchixxe ani ha'noo'ni haaso'enabaan; ajajeennaaan.23Yaane kinni ajaja anka laqqe; aninna ha'nooke Mageno kadannon ha'noonna arda anke kaddinaan; eloxxi ha'no'a kaddo'a ajajenneke ora duuchcha'ni me'e; hiyye insa'nee ajajennen.24Insa'ne kinni lanqeeban mitte godobin caqansebaan; lanqqaaxxa waalin halo abixine fuggoka yaada ifika hordonfe; edi'a me'inammaxxa waalle udumaa hinge.25Edike annuwwi ha'nooki Gibtsee'n boganaa'n fulleexxe yannanaa'n ta'iqico'ni; barra barra'ninn hifatebo'nong; erganjuwwa anka raagole insa'ne'a ergennen.26Insa'ne kinni ani hiyyennexxa lanqebaai; mitte godobini laqa hansebaan; godoba jabeesse'ne; edik annuwwi insa'nek hunjeexxi irra saxxeexxa fuggoxxa hunje.›27«Tenne'e duuchcha kuldatton insa'ne kinni atixxa lanqabaan; yexxatton cuqqi hinabaan.28Tennexxee insa'nee hitatto qici, ‹Kunni ardi Duuchchi Woddike Gootti Mageni'a ajajemebaake, gorsaakanna adhdha gibeeke ardan; dhuga insa'ne giddo hexxebaan afo'o insa'nekenaa'n baxxe'en.Hinonixxe Dhooqa'n Assendeexxa Fuggoxxa Yaane
29Duuchchi Woddik Gootti tenne ila'ni mufate tuffate waalemmaxxe'e umo haaxxite huni; urmeeke tulluchchuwwi hana uurrite boochchisi.30« ‹Yihudiink ardi fuggoxxe yaane ani edo asse'en; hiyya'neen Duuchchi Woddik Gootti; batto'eechcho summa anika ye'neeke mine'n uggine battoonsineen.31Ani ajajebo'noxxa ijje hedebo'noxxa labbaxxanna meyyaxxa insa'nexxa oose giirate'ni ciincessine'e tolchakee Heenomike beltixxe dhooqa'ni Toofeeti hinaaka magenoofantaaka tulluchuwwa giissine.32Tennexxee qalbeeffatte hiyya'neen Duuchchi Woddik Gootti; boonni hanqataa qico'n rensha Toofeti hinaa bonicho'ni moongammaxxe'e duliinxe dhooqa hinaa malee'e konneechchin edi'a Toofeeti yookaan Heenomike beltixxe dhooqa hinabaaxxi yanna daggaan.33Konne ardiki renishi allaattetikenna biniinchuwixxe ita kadaan; mittikinna shorraaki hedhebaan.34Gammashshotikinna ilileettetiki hafuur waajubichchinkanna waajubichchotika hafuura Yihudiinke qachchuwanaa'ninna Iyyerusaalemike oruwwanaa'n balleessannon; bogikinna urumee gataan.The Word for the World International