Baca 2 Saamu'eeli 3

2 Saamu'eeli3

¹Daawwitikenna Sa'oolike minni hadixxe oddo'ni hedhemmak loli qeerraxxa yanna adhdhe. Daawwiti jabaata'ni me'aa wodda Sa'ooliki mini hadi kinni gopha'ni me'e.

Daawwitixxa Oose

²Daawwiti Kebirooni hedhemma wodda jaane labbaaxxa oose i'le; angafi belti Iyyizira'eelichcho Ahino'aaminaa'n illeeki Aminooni,³Langaki Qermeeloosichcho Naabaalixxi are Abigeeli ildeeki Kili'aabi, sakkaki Geshuurika moyanjo Telmayixxi belto Ma'ika iledeek Abeseloomi,⁴Sholgaki Hagiitinaani ilde'ek Adooniya, ondiba Abixaali ildee'ek Sefaaxiya,⁵Jiyaki Daawwitixxi are Egila ildeek Yutire'aamitemman; kunniir Daawwiti Kebirooni hedhemma wodda isi'a ilendeexxeeramman.

Abneeri Daawwitinni Welti Gudde

⁶Sa'oolik minninna Daawwitiki mini lolake kadaamma wodda Abeneeri Sa'oolike mine'ni midditte alfa'ni me'e.

⁷Sa'oolinna Iyyoheelixxa belto Ritsifa hiyyendaaxxa jaalo are afeemman; Iyyabusittenna Abeneeri'i, «Mayeete anke annixxe shiixxooxxe arenne welti diiphettek?» hiyye.

⁸Abeneerinna Iyyaabusitte hiyyeeke hiyyichcho'ni lumoshsha mufatemmaxxi hiyyee qici, «Anee Yihuda'a ergatemannoke wolcho assitette? Ani anna atike Sa'oolike mini'a isike dayyuwwi'anna fira isike'e addatensha anxa telchi qico'ni waaleebo'non; aninna atee Daawwitixxe anga'ni sa'isse uwwebo'non; ta'a kinni ati tenne man'jichcho'n assennexxe yaanexxee anee ku'litatto?⁹Duuchchi Woddik Gootti Daawwiti'a kakoti uwweemmaxxa eettenee addachchiisa muuxendaashsha assebe'nok gatoonole Mageni Abeneeri'n fuggoxxa assowwaal; eettenenaa'ninna caldaaxxa iso'n iiyyedagowwaal.¹⁰Dada Duuchchik Gootti mootumma Sa'oolike mininaa'n adheexxi Daawwitixxa moote Isira'eeli'ninna Yihuda'n, Daani'n Bersaabeehi qico'n ofo'lishatee addachchiisati isi'a aageemmaxxa kako muuxendaashsha ani Daawwitii'i kipha gophonnole Mageni anee uudo!»¹¹Iyyabusittenna Abeneerii'i yo'oshsha sodateemmaxxee hiissee mitelchonna midde hiissa dande'ebaan.

¹²Ookko'ninna Abeneeri Daawwiti'a hiyyee qici, «Konne bogi galchalli ayyete? Aninni welti weli aagottole yoona Isira'eeliki ardi duuchchi atiba'a higaashsha ani atee gargaarannon» hine Daawwiti'a kullaashsha erganjuwwa erge.

¹³Daawwitinna «Kadduun eloxxen, atinni welti weli aangannon; yaanee kinni atenaa'ni mitte yaane hasaannen; tinninna ati aniba'a daggatto wodda edisse Sa'oolixxa belto Melkooli'i aaxxe daggattoshshaten; iita kada gophphoole kinni aniba'a daggoxxee» hiyye.¹⁴Ookkoneechchi uduma Daawwitinna hiyyee qici, «Dhibba Filisixeemitotike manna yakkate araarsedhennaxxa are anxa Melkoolii'i ani'a uwwi» hiyya'nee Sa'oolike belto Iyyaabusittebaa erga erge.¹⁵Tennexxe Iyyaabusitte mitte manjo ergeexxi, Milikooli heerundemmake aro'o iseke Leessake belto Feelixi'eeli hundii'ni fulchine.¹⁶Aro'i iseki Paalixi'eelim Baahuriimke qachchi qico'ni oodha'ni duuka isexxa me'e; yaane kinn Abeneeri, «Gelteen! Yoona mini atikibaa higi» hiyye. Tennexxe isinna hige.

¹⁷Abeneeri Isira'eelixxe geedhuwwanni welti mari'ate hiyyee qici, «Konneechchinni edo Daawwiti ha'nooke moyanjo kado'a yortine'emman;¹⁸Duuchchi Woddik Gootti Daawwiti'a ‹Erganji anki Daawwiti arda anka Isira'eeli Filisixeemitotixxe anganaa'ninna insa'neke naaphuwwixxe anganaa'ni anjirannon› hiyyee addachchiisemmaxxee tennee ta'a tennee asse.»¹⁹Iittanni Abeneeri Biiniyaamitotee ifi'aanni mareexxi tenneenni insa'ne'ni kule; ookkoneechchi uduma Isira'eelinna Biiniyamito duuchcha assate'e hanseexxa duuchcha Daawwiti'ni kulo'a Kebirooni'a me'e.

²⁰Abineerinna lame tomme manninni welti Daawwiti hedhemmabaa Kebirooni'a dage; Daawwitinna Abeneeri'anna isinni welti hedheeke manni'a jila jile.²¹Ookkoneechchi uduma Abeneeri Daawwitii'i, «Atinni welti kako aango'a godobi atiki yoremmashsha duuchcha galchitotta'a rake marennexxi ate gootta anke moyanji'a Isira'eelika arda duuchcha bukki asso» hiyye. Tennexxee Daawwiti Abneeri geegeesse; isinna nage'iki me'e.

Iyyo'aabi Abeneeri'i Shiye

²²Daawwitiki manninna Iyyo'aabi eettene yanna'ni heddo booji'o booji'eexxi duulokenaa'ni hinge. Abeneeri kinni Daawwiti nage'iki geegesse'naa me'eemmaxxee Kebirooni'ni hedhemmabaan.²³Iyyo'aabi isinni welti hedhemmaki sannachchi duuchchi welti ookko'o geye; isinna Nerik belti Abeneeri moyanjiinbaa degeexxa moyanji geeggeessexxanna isi nage'ik me'eexxa laqe.

²⁴Tennexxe Iyyo'aabi moyanjii mine'ni e'yeexxi hiyyee qici, «Tinni assitettexxi yaane maachcho? Kunnisse Abeneeri atiba dageexxi nage'iki me'o'aa waaldetteki mayeete?²⁵Atinna Nerika belto Abeneeri egendeetten; isi atiba dageechchi atee geeqqishe, fula higa atixxa ege'no'aanna ati hujaatelcho duuchcha dooyyo'aaten.»

²⁶Ookkoneechchi uduma Iyyo'aabi Daawwiti birii'ni me'eexxi Abeneeri'i iyyedango'aa erge; erga maremmakiirinna Seeyirixxe wode'iinxe bale qarqarii'n isoo hiissine. Daawwiti kinni tennee ege'neemmabaan.²⁷Abeneerinna Kebirooni'a higee wodda Iyyo'aabi qofiba iso'n hasessa'nechcho fakkeesse wirri asse dalla'iinxe hulabaa iso'o aadhee me'e; ookkona isika dayyo Asaheelika guma hiissatee godoba oteexxi shiye.²⁸Daawwitinna tenne yaane udumii'ni laqeexxi hiyyee qici, «Aninni kadi mootumma giddik ardi Nerike belto Abeneerixxe mundexxee balleessa no'oni hexxebaaxxa Duuchchi Woddik Gootti ege'ne'een.²⁹Tinni isixxi munde Iyyo'aabi'ninna anni isikika mini hado duuchcha daafowwaal; coxxoti dhukkubi yookaan elobaaki mundiinki dhukuba afeeki, kooko'ichchi, yookaan wolaantichchake'ni reyaaki yookaan itaachcho gophe solo'waaki Iyyo'abike minenaa'ni gophemoqqe'e» hiyye.

³⁰Abeneeri Gaba'oo'ni kademmake lola'ni Iyyo'aabikanna Abisayika dayyo Asaheeli shiyemmaxxee insa'nenna Abeneeri shinne.

Abenerixxa Moogensha

³¹Ookkoneechchi uduma Daawwiti Iyyo'aabinna isinni welti hedhemmaka arda duuchcha, «Seemma ha'noxxa dartine dooniyya odo'witine'e Abeneeri'a oodhdhe» hiyye. Moyanji Daawwiti umi isinge'ni mooggo mare.³²Insa'nenna Abeneeri'i Kebirooni moonge; ookkone moogo'ni moyanji Daawwitinna lumoshsha hiiqise oodhdhe; ardi duuchchinna iittanni oodhe.

³³Moyanji Daawwiti Abeneeri'a hiyya'ni boochchissinaa'ni hitinaa qici:«Abeneeri mayee gowwi manjixxa reyo reye?³⁴Anga atixxi usurendemabaan;Lekka tinna haachchabiki takalendeemmabaan;manji fuggaaleeyyetixxe anga'ni ibammashsha;Atinna iittani ibbe rertette!»Ardi duuchchinna hiiggen isi'a oodhe.

³⁵Ookkoneechchi uduma Ardi duuchchi ita itamaxxa yanna Daawwitiba dangeexxi ita iti hinaa'ni jaba qicinni kadhante. Daawwiti kinni, «Telcho arishsho aaga qico'ni midha yookaan weleechcho afo'o anke'ni maqonnole tinni kaddeexxi ane'n kaddo'a; wele caala Mageni ane'ni iyyedagoo!» hiyye kakate.³⁶Ardi duuchchi tenne hubateexxi gammade; dhugaandinni moyanji Daawwiti asseexxi yaane duuchchi arda gammachchiisse.³⁷Tennexxee eettene barra'ni ardi duuchchinna Isira'eeliki ardi duuchchi moyanji Daawwiti Nerika belto Abeneeri'i shilchiisebaaxxa ege'ne.

³⁸Ookkoneechchi uduma moyanji Daawwitinna isik jalqabuwwi'a hiyyee qici: «Telchixxe barra'ni Isira'eelinaa'ni akeekisanjinna ja'laabi reyeexxa egendineeba?³⁹Mageni anee telcho fi'le hariireeke moyanjo kadonnolenna midde ani gophaaleessa manjon; tinni Tsuriyaxxi oose lumoshsha elobaaxxenni ane'ni kexxe'een. Duuchchi Woddik Gootti fuggoxxa hujaakee huje isixxishshaanni uwwowwaal» hiyye.

The Word for the World International

https://app.library.bible/content/2b894378475c6aea