2 Moyanjuwwiinkaa Maxaafa3
Mo'abi Fuggoxxinni Ke'e
1Yihudak moyanji Iyyosafixi moyeexxe mitte tommenna saddeetixxe wogga'ni Aki'aabik belti Iyyoraami Isira'eeli'i moye galche. Isinna Semaariya ofo'leexxi tommenna lame wogga moye galche.2Isinna Duuchchi Woddike Gootti edo diqachchiissaaxxa fuggoxxa yaane huje; fuggoxxi isixxi huje kinni anni isikinna ama isixxi hunjeemmaxxishshatebaani. Isinna anni isiki hujisemmaxxa Ba'aali hinaake magenixxa sooddo fugusse.3Yaane kinni Naabaaxik belti Iyyorbi'aami Isira'eeli dedhisemmaxxe cubboni abidemee malee; isenaa'ni bayyata gibe.4Mo'aabik moyanji Meesha'i gedhebo horatammakemmani: wogga woggande'ni dhibba kuma buruusuwwanna dhibba kumika gedhebinxe korbeeyyexxa orda Isira'eelike moyanji'a gibira uwwaammani.5Aki'aab reyeechchi uduma kinni Mo'aabik moyanji Isira'eelike moyanjo'ni fuggoxxinni ke'e.6Eettene yanna'ni moyanji Iyyoraami Semaariya'n ke'eexxi Isira'eelika arda duuchcha bukki asse.7Yihudake moyanji'a Iyyosafixxi'a «Mo'aabik moyanji ane'ni fuggoxxini ke'emmaxxe'e aninni welti duuldatto?» hiyyeexxi eriga iso'ni ergedhe.Moyanji Iyosaafixinna «Eeti atinni welti duulannoni; aninna atishshan, ardi ankinna atike ardishsha, fadhaduwwi aniki atike fadhaduwwishshandeni» hiyyeexxi isi'a hiisse.8Iyyosaafixxinna hiyyee qici, «Hoone ora duulaane?» hiyyee qore.
Moyanji Iyoraaminna «Eedoomixxe qiilla gammoojje giddii'ni sa'neeteni» hiyye hiisse haaso'e.9Tennexxe Isira'eeliki moyanji Yihudake moyanjininna Eedoomike moyanjinni welti duulo'a ke'e. Iyyooraminna iittanni Yihudikinna, Edoomike moyanjuwwi duulo'a ke'e. Torbaane barra dooneechchi uduma sannachchuwwakeenna kadi hore insa'neeke gateeki wedi'i hedhemmabaani.10Isira'eeliki Moyanjnna, «Aane'e Duuchchi Woddik Gootti no'o sasiinga moyanjuwwa ye'eechchi no'o Mo'aabike moyanjixxe anga'ni sa'isse uwwo'ate?» hiyye.11Yaane kinni moyanji Iyyosafixxinna, «Isi ga'mi'ni Duuchchi Woddika Gootta laqe'nannoshsha kaba mitti wabeek hedhebaa?» hiyye qore.
Moyanjo Isira'eelike moyanjike sannachchke ajajaluwwakenaa'ni mitti «Edi wodda Eliyaasike gargaarsanjo kadeemmaki Saafaxiinik belti Elsa'i kaba hedheeni» hiyyeexxi hiisse haaso'e.12Moyanji Iyyosafixinna, «Duuchchi Woddike Goottik hiyyichchi isi darree'ni afemaani» hiyye. Tennexxe Isira'eeliki moyanji Iyyosafixxinna Eedoomiki moyanji mitteba adadde isibaa dirrine.13Elsa'inna Isira'eelika moyanjo, «Atinni welti anee afensisaachchi maachcho hedhee'naate daggetteki; ta'a atike annixxi wabeekonna atixxe amaxxi wabeeko hexxeeba'a me'i» hiyye.
Moyanji Isira'eelik moyanjinna hiisseexxi «Itta kaddabaani; Mo'aabike moyanjixxe anga'n sa'isse uwwo'aa no'oo sasiinga moyanjo mitteba no'o ye'eeki Duuchchi Woddike Goottani» hiyye.14Elsa'inna, «Ani ergatemaanneke hedhaake Dada Duuchcha Ajajake Duuchchi Woddike Goottike summinni kakataannen. Ate'e gargaarate'e dageek Yihudake moyanjo Iyyosafixxi ulfeesenexxete malee; ate'e uudanaba; yookaan yaane anxeni ati'a hiyyanabani.15Yaane kinni ta'anna kiraara ganaaka manjo aniba idagge.»
Kiraara ganammakinna ganee wodda, Duuchchi Woddike Goottixxi hunna Elsa'i'n dagge'naa16isinna hiyyee qici: «Duuchchi Woddik Gootti hiyya'nee qici: Tenne dhooqa'ni heddo bale umme.17Duuchchi Woddik Gootti hiyya'nee qici: diidallotanna kadi xeena uuddinabaani; dhooqa kinni wedi'iki wo'mitaani; ha'noo, lali ha'nokinna weli hori ha'nokinna ha'no ha'witinaani.18Tinni Duuchchi Woddike Gootti edo shollaxxe yaaneni. Mo'aabito anga ha'nooxxe'ni sa'isse uwwaani.19Kinjiinke dala'ika qachchuwwanna elollamma qachchuwwa insa'neeka duuchcha injifattine adhdhitinaani. Elollamma haqquwwa insa'neexxa duuchcha kakkartinaani; wode'e ha'winammaxxa muummuwwa duuchcha duuchchitinaani shamoka fichcha insa'neeka kinoti balleesitinaani.»20Gorsa tolchi shiqammaxxi yanna geltee wodda Eedoomi darree'n wodi'iinxi muumme burqite butta duuchcha buqqe.21Tennexxe Eettene yannaa'ni moyanjuwwi lolo'a dageexxa Mo'aabito duuchchi laqqeemmaxxee; oosetenna kadi geedhe; loliinka miya abixxa dande'aaki ye'eme fuleexxi gabala heqqate'ni ke'ne.22Gorsa barrsa soodante ke'na wodda; arishsho wode'eke'ni cala cala hita'nemmaani. Wido hexxexxe Mo'aabitotinna woddi'i mundetishsha diimmatee'na uunde.23Tennexxee insa'nenna hafuura gikki assineexxi «Ittiqqa mundete! Sasiingi no'oki naaphi weli'aani weli shiye'e bire'en! Yoona marrennexxi boga insa'neeka dhaallo!» weli'aani weli hine.24Yaane kinni Mo'aabito Isira'eelixxe kanbebaa marta wodda; Isira'eelinna kexxeexxi insa'ne lolde; Mo'aabitonna insa'ne edi'ni baqatte. Ookkoneechchi uduma Isra'elito boga insa'neeka lolideexxi Mo'abito shilte birte.25Qachchuwwakanna balleessine: shamoka fichcha insa'neke duuchcha'ni kino wo'mita qico'ni mitti mitti manji mitte mitte kinjo fichchake'ni darbe; wodiinxa mumme duuchcha cunfe; elo eloxxa haqqe duuchcha kakkarre birre. Qirihereesi calli kinuwwati gateemmaani; isetenna kaddoole looyya darbata'ni lolaammaki lolinki mann buqeexxi lole miidhe.26Mo'aabitotik moyanji lolake'ni injifatemeexxa ege'neexxi wolaantichcha ka'leeka torbaane dhibba manna adhdheexxi Eedoomiki moyanji hedheeba oddo insa'neexxenaa'ni kute sa'ate'e wo'laane; yaane kinni dande'ebaani.27Ookkoneechchi uduma isxxe bakka'ni moyaka angafa belto ifika aadheexxi qachchinke dalla'ani cincatike tolchcha asseexxi shiqishe. Isira'eeliki ardi tenne yaane'ni mufatemmaxxe; ookkonna waalleexxi ifike bogibaa hinge me'ine.
The Word for the World International