Mark16
1Lăm năr Sa-bat saq ntrăch en, Ma-ri Ma-đơ-len, Ma-ri mê Ya-cơ, nggâm Sa-lô-mê, vro jrơu nthôr chĕq lăm tât tŭq, khây nĕh lap rup Siđăch.2A vi ôi rưng rưng năr di muôi sŭng pâh năr, khây nĕh saq tât tŭq chhŭng cồ tâp lăm măt năr cồ me lŭh.3Khây nĕh tăm nhai bây ndăng ganai: “Vu lây palăm tamô lŭh ntrăch vôq pông chhŭng an vơn iưn vrêq?”4Lăm sên hao, khây nĕh sây pành tamô lăq gĕh palăm en, an nĕh cồ măq lŭng.5En lăm gĕh saq lăp sŭng chhŭng tâp en, khây nĕh sây du mvu klô dlu chuq ao canang gŭq u maq ma, en khây nĕh sây phŭng lŭng.6Nŏq tamun nŏq nhai bây khây nĕh: “Vâng phŭng, khây yông saq wŏng Yêsu tamun Na-sa-ret, Candranh cồ vlam vu pâng jimâng vlơ chhơ pagăn. Nĕh gĕh ôp an hôm mrĭh sĭq vlâq en! Nĕh đăng gŭq u heq. Saq sên gatŭq cồ vu gĕh tâp rup Nĕh.7An canŏq, căh saq, nhai an khây con tuyh Nĕh nggâm Phi-e-rơ pành: ‘Siđăch gĕh saq lor pôp ŏh tât Ga-li-lê. U nŏq, pôp ŏh nhâng gĕh sây Siđăch’, i ca Siđăch gĕh nhai bây pôp ŏh.”8Lăm saq lŭh tu ling en, khây nĕh mprăng ntrăch a chhŭng tâp, mvăc mơ phŭng râm, bây sinlơ krăq krây tăq tâp khây nĕh. En khây nĕh đăng nhai păch lây bây vu lây mvăc khây nĕh phŭng candŭh lŭng.9 (A ôi silang năr di muôi sŭng pâh năr, lăm gĕh tao rĭh sĭq vlâq, Siđăch lŭh măt lor lĕq an Ma-ri Ma-đơ-len, cồ tamun nŏq Siđăch gĕh dăh pâh lâm chaq lŭh ntrăch.10Tamun ur nŏq saq nhai vlâq an khây tamun cồ gĕh gŭq simơ bây Siđăch sŭng lăm khây nĕh gĕh căh yâh bây nhim rơp.11Hôm Khây nĕh, lăm iêt chăng pành Siđăch vrêq gĕh rĭh en đé nơm ur nŏq gĕh sây, nŏq đăng tôq.12Nŏq vrêq, alưr ăp vrŭq nŏq en, Siđăch lŭh măt sŭng rup ndây an var ndu sŭng khây nĕh dim năr saq a jâng sĭq tu palây nơm.13En Var ndu nŏq, alưr lăm sĭq vlâq en, nhai vlâq an khây con tuyh hôm vlâq, nŏq khây nĕh đăng tôq var ndu.14En nŏq, chôch lĕq, Siđăch lŭh măt an mât muôi con tuyh lăm khây nĕh gĕh gŭq sa war u mvrăh, Siđăch chih lăh sĭq sinlơ đăng tôq nggâm gĕh nuih talaq kranh âr khây nĕh de mvăc khây nĕh đăng tôq khây tamun cồ gĕh sây Siđăch alưr lăm Siđăch tao rĭh sĭq vlâq a tŭq chưt.15Siđăch nhai bây khây nĕh: “Lăm saq lam ăp dưnya, căh yảng pađau Sipơp Yăh an ăp păch cồ gĕh sun lŭh.16Vu lây tôq bây wŏq sinlơ ŭm vôq nhâng gĕh yơt, en hôm vu lây đăng tôq nhâng gĕh wŏq sinlơ ôp dôih.17Ăp sinlơ krăq krây heq nhâng saq simơ bây khây tamun gĕh sinlơ tôq: Sŏq săq Ănh, khây nĕh dăh khây chaq ganrâng. Khây nĕh nhâng nhai gĕh ăp trong nhai me.18Khây nĕh nhŭp vĭh, en an khây nĕh gĕh huch păch lây cồ ôp an chưt, nŏq nhâng đăng ôp chưt ji lây tât khây nĕh. Khây nĕh nhâng chĕq ti vlơ khây tamun ji râng nŏq khây tamun nŏq nhâng gĕh yăh.”19Lăm alưr Siđăch Yêsu gĕh nhai bây khây nĕh en, Siđăch gĕh văt n'hao vlơ trôq nggâm gŭq maq ma Siđăch Trôq.20En khây tamun nŏq, alưr lăm lŭh saq, khây nĕh yảng pađau ăp gatŭq, sŭng lăm Siđăch ôp vrŭq simơ bây khây nĕh nggâm candân an Sipơp don a păch krăq krây saq bây. A-men.)
FAR EAST BROADCASTING COMPANY