Bahebeleho5
1Pasi mukuutu bangaanga ba Nzambi baasoolo ŋa hati la baatu. Isalu hya nde ni usalila Nzambi mu tooni libwe la baatu. Nde ubaava makabu na bungodu bwa tsuhili mu masumu ma baatu.2Bu nde haateleme nde mwakulu mu iteesi hi musunya wu akolo, nde utwala umweese kwili lingebe huli ba baavele na nzaabili na huli ba baadunga.3Mu tooni a bu nde ali nde mwakulu mu iteesi hi musunya wu akolo, nde afwana ubaava bungodu bwa tsuhili ndulu a mu tooni masumu ma baatu ve, ka naapa mu tooni masumu ma nde mwakulu.4Muutu utwala ubinuha butsitu bu uba mukuutu bangaanga ba Nzambi ve. Ubaayaka bwo ndulu mu teelili a Nzambi, we bu hwaba teelili a Aroni.5Kristo kaka a haabinuhi nde mwakulu muyusu wu uba mukuutu bangaanga ba Nzambi ve. Nde ayaki butsitu mo buuna huli Nzambi, wu atiili nde ibila we bu baasonehe:«We ni wu li Mwana a me,lolo yiniiyi, me Taata a we».6Tsyelo kima baabweleele:«We li ngaanga a Nzambi wa taangu yoosi,mu mulongo mukuutu bangaanga ba Nzambi Melekisedeki.»7Ni mu buuna, mu idiingu hya nde ŋa toto, Yisu asiidi masambulu na miyayiini hutso bileele bi binene na matsanga, huli Nzambi wu akiitwala uyobolo nde mu lipfu. Na Nzambi ayuhili nde, mu tooni a kulimini a nde.8Tso bu nde haaba Mwana a Nzambi, nde ayihi lisiingala mu mapasi moosi ma nde haamoni.9Buuna, Nzambi asiidi nde wu asupaha. Nde amiikituha mutswe a nzali wu liyobolo li bilima na bilima huli baatu boosi ba bubaasiingala nde.10Mu mbuli, Nzambi abyalisi nde mukuutu bangaanga ba Nzambi mu mulongo mukuutu bangaanga ba Nzambi Melekisedeki.
Hu li na tsisu mu utiimba imiinu
11Bisu lili na mambu ma malahi ma uleele mu musamu mo wunuuwu, ka hu li na pasi mu ubindula benu mo, mu tooni ati, benu laaleme mu utsikaha mambu.12Benu kini laaka milongisi umata beleve. Ka benu likini na nzala ati balongese benu ndongisili ya mbaandu yi musamu a Nzambi! Benu likini na nzala mabeelo ŋa mbuha a byudya bi byaayele.13Wu ubaanywa mabeelo li ndulu mwana a ngebe, nde a hali na nzaabili tso hoole mu utsikaha mambu ma butsiitsa ve.14Ka byudya bi byaayele byayelemene na baatu ba baakula. Baatu mo baniiba, mu tsalili a bo, bali na hyuku hi usa lisobosono ŋa hati la lilibwe na li libi.Wycliffe Bible Translators, Inc.