2 KRONIKA25
Yuda Ɔka Amasia
1Alɛɛ afosi-anyɔ-anɔɔ di Amasia lafũ fiɛ aabale ɔka, ni aale sɛka di Yerusalem alɛɛ afosi-anyɔ-anansĩ nɛ. Ɔya leyooto niale Yehoadan; Yerusalem aakye.2Amasia labla lɛsaa le niasiɛko ni di SAATE nwu anu, kafɔɔ diele ku otu nɔɔ omuu.3Obe wɔ di sɛka kalekɔ nwu layila ni kpinkpĩ di kalɔ nɔɔ yi, aalo banɔɔfotii ba nialo ni ote ɔka.4Kafɔɔ atalo babisuɔtɔbi lɛma, kafɔɔ aabla di mmle bɛɛkpana ni di Kufiofa kamɛ, di Mose Kukũ kamɛ, lɛba le di SAATE nwu lakpee ni kufiofa alɛ: “Blɔbalo babi bate di babi lɛma disi, ee balo babi di bate lɛma disi; kafɔɔ obiala kamakpi di nnwɔɔ omu nɔɔ sikpile suoto.”Amasia Lakpɛko Edom Batii
5Amasia lalɛɛ Yuda batii aasiisa ni aase ma di ayo lɛma kanya aabla ma nkpe kanyabayilatɛ ku alafa kanyabayilatɛ aata Yuda ku Benyamin omuu. Ninfɛ aasiisa basuɔtɔ ba nitoofũ ni alɛɛ afosi-anyɔ ee batoofũ balenke nii, ni aanya alɛ basuɔtɔ nkpe alafa-atiɛ lalolaa suoto baata kakpɛ ɔkyɛ, baafuo ni lɛkplɔ ku kubidifunsaa oklee nɛ.6Aakyeko kafɔɔ bakpɛtɛ nkpe kɔlafa Israel aawako, aata ma koto fututu bakilo nkpe-ntiɛ-alafa-ana di kakpɛ ka babakpɛ ni kanya.7Kafɔɔ Yaa otii onwii lawa ɔkyɛ nɔɔ ni aabatɔkɔ nwɔ alɛ, “Oo ɔka, dinaa alɛ bakpɛtɛ ba mmle niekye ni Israel lɛkyɛ kakpɛ ku afɔ, diekye SAATE nwu diesiko Israel- aasi ku Efraim batii ba mmle kuonwii.8Bia nse fɛɛkyɛ fɛɛlaakpɛ kakpɛ di okyiini kamɛ yi, Yaa kamata fannɔɔ kakpɛ di balo lɛfɔ anu, diekye osie nkpe Yaa alɛ aakyakaako ee aata otii nnɔɔ kakpɛ.”9Ni di Amasia lakaalɛ Yaa otii nwu alɛ, “Ni lɛnfɛ kamabla nkyeko koto fututu bakilo nkpe-ntiɛ-alafa-ana ko lata ni Israel bakpɛtɛ nwu?”Ni di Yaa otii nwu latɔkɔ nwɔ alɛ, “SAATE nwu kamafuo fɔ ɔta olenkeesa nkpo.”10Nioso Amasia ladiki bakpɛtɛ ba niakye Efraim baawa ni osuku aata ma baasifi ayo lɛma. Ɔblɔ lafiɛ ma osie kanya di Yuda suoto ni baasifi ayo lɛma di lɛblɔfiɛ kplɛ kamɛ nɛ.11Ninfɛ di Amasia lakpee suoto nɔɔ osie ni aaleko bakpɛtɛ nɔɔ katũ baakyɛ Mmba Ɔtaata, lɛbale aalo ni Seir bakpɛtɛ nkpe lefosi nɛ.12Yuda bakpɛtɛ kafɔɔ lamufũ bakpɛtɛ ba ninkpe ni nkpa, nkpe lefosi, baakpaa ma baasifiko difuɔnkpaa nsintɛɛ, ni baatukusa ma baakpee di kalɔ nwu, bamuu lɛma labɛbɛɛ kɔkyɛɛkyɛɛ nɛ.13Kafɔɔ bakpɛtɛ ba di Amasia lata baasifi ni ayo lɛma, atata ma osuku baakyɛ ni kakpɛ lalaatu baabuo di Yuda batii sekpoo kamɛ diayɔ ni di Samaria dialaadu ni Bet-Horon. Baalo batii nkpe ntiɛ ni baatuka kakpɛ kamɛ asaa kpinwu baasifiko nɛ.14Di Amasia lalaalo Edom batii aakple ni yi, aayɔ Seir batii afiɔ aawako. Ni aayɔ nya aatɛ fɛ nnwɔɔ omu nɔɔ afiɔ, aawakasɔ aata nya, ni aata ofiɛ seleɔta aata nya nɛ.15Ɔblɔ lafiɛ SAATE nwu di Amasia suoto, ni aakpee ɔlaabuɛtɛtɛ ɔkyɛ nɔɔ, aalaakaalɛ nwɔ alɛ, “Obe lɛsaa oso fowolaa asaa kamɛ di batii ba mmle afiɔ ya nitafuo ni batii lɛma bamu nkpa ofũ okyeko nnɛɛ lɛfɔ?”16Di obe wɔ aatɔɔkakatɛ ni ɔkakatɛ yi, ni di ɔka nwu latɔkɔ nwɔ alɛ, “Buodiki fɔ bulɛ le ɔka disibutatɛ? Lo kanana! Obe oso foomiɛ falɛ balo fɔ?”
Nioso ɔlaabuɛtɛtɛ nwu lalo kanana, kafɔɔ aabuɛ alɛ, “N-ye nlɛ Yaa lɛtɛ alɛ abawɔɔsa fɔ, ta nle fatɔbla ni fanankyɔɔ ni kɔkà nii atoko oso.”
Kakpɛ Ku Israel
17Di ɔka Amasia ku asibu batatɛ nɔɔ lakpee asi baawo baaloo ni sɛmaa yi, ni aata Israel ɔka Yoas wɔ niale ni Yehoahas obisuɔtɔbi, aale ni Yehu obisuɔtɔbi kanya ka mmle alɛ: “Wa, fabakyakakoe anu ku anu.”18Kafɔɔ Israel ɔka Yoas latɔkɔ Yuda ɔka Amasia alɛ: “Owuu di Lebanon lɛta sida kowoso di Lebanon kanya alɛ, ‘Yɔ obisankobi lɛfɔ fata obisuɔtɔbi nii ayɔ.’ Ninfɛ di lepoo kamɛ bɔkɛɛ lawa aabananafu owuu nwu aakaasa kaasɔ nɛ.19Feebuɛ fɛɛtɔkɔ suoto lɛfɔ falɛ fatoolenkee Edom, nunua footuo suoto fantakatɛ suoto katoo kafɔɔ. Kafɔɔ siɛ leeyo! Be oso foomiɛ ɔlaa ku kasɔ ɔpɛ fanta afɔ omu lɛfɔ ku Yuda kafɔɔ?”20Kafɔɔ, Amasia ditanu, diekye Yaa niabla nle mmle alɛ aayɔ ma ankpee di Yoas nnɛɛ, diekye baawolaa asaa kamɛ baakyeko Edom afiɔ nfũ.21Nioso Israel ɔka Yoas ladieko ma kakpɛ. Nnwɔɔ ku Yuda ɔka Amasia lakyɔɔ bawo anu di Bet-Semes di Yuda.22Israel lalenkee Yuda, ni di otii biala latoso aasifi leyo nɔɔ nɛ.23Israel ɔka Yehoas lamufũ Yuda ɔka Amasia wɔ niale ni Yoas obisuɔtɔbi, aale ni Ahasia obisuɔtɔbi, di Bet-Semes. Ninfɛ di Yehoas lakpaa nwɔ aawako Yerusalem, ni di Yehoas labiɛ Yerusalem oyoyiɛ aatɛ kaasɔ diayɔ ni di Efraim Kayoko dialaadu Leyokɔ Kayoko- di lɛkaana labla ni fɛ nkpaa alafa-akuɔ.24Aayɔ koto sɛɛle ku koto fututu kumuu ku anwansaa ya amuu aanya ni di Yaa olekatakɔ nwu niawɛ ni di Obed-Edom kanyu kalɔ, diakyakaa ni ku lɛkayo lɛsaawɛ ku batii ba niasiɛ ni di sɛlanle kamɛ, ni aakple aasifi Samaria nɛ.25Yuda ɔka Amasia wɔ niale ni Yoas obisuɔtɔbi lasiɛ nkpa lefosi-alɛɛ-anɔɔ di Israel ɔka Yehoas wɔ niale ni Yehoahas obisuɔtɔbi kukpi sɛmaa.26Amasia sɛka olebee sɛsaabla bamba se aabla nii, diayɔ ni di kasɔ kakyekɔ dialaadu ni kayɛntɛkɔ yi, bɛɛkpana nya bɛɛkpee di Yuda ku Israel baka kukũ kamɛ.27Diayɔ ni di obe wɔ di Amasia ladiɛ ni SAATE nwu otikanko, baasi ni kanya di suoto nɔɔ di Yerusalem aatoso aasifi Lakis, kafɔɔ baakpee batii baati nwɔ baakyɛ di Lakis baalalo nwɔ ninfa.28Baayɔ kpi nɔɔ baatika di pɔnkɔ suoto baawako baabakookaa nwɔ ku bate nɔɔ di Yuda Okpoo kplɛ.The Seed Company