ZAABURI52
Ekifubiro ky'omubi orikwesiimira obubi
Aha Mukuru w'abeeshongozi. Zaaburi ya Daudi obu Doegi Omunyedomu yaija kugambira Saulo ku Daudi ataahire owa Ahimeleki
1Ahabw'enki oyesiimira eitima, iwe manzi 'we,Noorwanisa embabazi za Ruhanga?Orenzya eizooba noocuma enaama z'okuhwerekyereza.2Orurimi rwawe ni nk'orumweiso rw'obwogi,Iwe orikuhanuura eby'okureebya.3Okunda ebibi okukira ebirungi,N'okubeiha okukira okugamba eby'amazima.4Okunda ebigambo byona ebirikuhwerekyereza,Iwe orurimi orurikugobya.5Naiwe nikwo Ruhanga arikuhwerekyereza ebiro byona;Aryakukwata n'amaani, akuhuruuture omu ihema ryawe,Akurandure omu nsi y'abahuriire.6Abahikiriire baryakireeba, batiine,Bamushekyerere nibagira bati:7Nimureebe ogu mushaija otaragizire Ruhanga buhungiro bwe,Kureka owaayesigire eitungo rye ringi,N'obutungi bwe akabugira obuhungiro.8Kwonka nyowe ndi nk'omuzeituuni mubisi omu nju ya Ruhanga,Nyesiga embabazi za Ruhanga ebiro n'ebiro.9Ndyagamba eiziina ryawe omu maisho g'abarikwera baawe,Ahabw'okuba ni rirungi.Bible Society of Uganda