उत्पत्ती9
1ताहरुउ देवे नोहाहा आन तियाआ पोर्याहां आशिर्वाद आप्यू आन तियांहां कोयो, “फुला-फलान वादीत जावा, आन धरती पोअ पोआइत जावा.2तुमाआ बीक धरतीइ आखा जनवारोहो, आन जुगोमेर्याआ आखा सिड़ाहां, आन पुयींपोर्येए आखे होरतींडनारे जिवतोर, आन दोर्यामेर्याआ आखा मासापोअ सादा रोय: एं आखे तुमाआ ताबाम कोई देदेहे.3आखे होरतींडनारे जिवतोर तुमाआं खाअलोअ वस्तु रोय; जेहलेहे तुमुहूं निले निले हाने साड़े आप्येते, तेहलोज ओमे आखोज आपोहो.4पोन माहां रक्ताल्लोज मा खाहा, काहाके तियाआ जिव रक्ताम रोहे.5आन हुदाअलीज आंय तुमाआ रक्ताआ बोदलू मोन्ज्ये जिवोअ बोदलू लेहीं: आखा जनवारोअ आन माअहुंउं बेनुप रोत बोदलू लेहीं; माअहुंउं जिवोअ बोदलू आंय तियाआ हारेक पायहोप रोत लेहीं.6जो कोडो माअहुंउं खुन पाड़े तियाआ खुन माअहूं वाअहीं पोड़े, काहाके देवे मोनवीही तियाआज होस बोणायोहो.7आन तुमू फुला-फोला आन वादा, आन जाअखीलेहे पोर्ये उब्जाड़ीत धरतीपोअ वादीत जावा.”8फाशुउ देवे नोहाहा आन तियाआ पोर्याहा कोयो,9“उनाआ, आंय तुमाअरी आन तुमाआ फासाड़ी जे तुमाआ पारवाड़ी आवे, तियीइरी बी शप्पत लेहो;10आन आखा जिवता जनवारोअरी बी जे तुमाअरी होय, सिड़े, कोर्येए जनवारे, आन धरतीपोर्येए रानठ्ये जनवारे, धरतीइ जेत्ते जनवारे जाहाजेम रोत निठेहे तियांअरी बी शप्पत लेहो.11आन आंय तुमाअरी माआं ए शप्पत लेहो के आखे जनवारे फाशेए रेले वाअहीं ने आरवाय, आन धरती आरवीइलोअ काजे फाशीइ रेल ने ओवे.”12फाश्योअ देवे कोयो, “जे शप्पत आंय तुमाअरी, आन जेते जिवते जनवारे तुमाअरी होय यां आखाअरी बी हादाजोलम्यीइ पिड़ीइ काजे लेहो, तियीइ ए निशाणी होय:13आंय वाद्लामेहें माआं बाण मिक्यीही, ते माआं आन धरतीइ विसमेहें शप्पतेए निशाणी रोये.14आन जाहां आंय धरतीपोअ वाद्लो पसरावीहीं ताहां वादलाम बाण देखाये.15ताहां माआं जे शप्पत तुमाआं आन आखा जिवता जनवारोअ आरी लेदीही; तियीही आंय ओर कोअहीं, ताहरुउ एहेलिही रेल फाशीइ ने ओवे जियी वाअहीं आखे जनवारे ने आरवाय.16वादलाम जे बाण ओय आंय तियीही पालीत कोइत ए हादाजोलम्यीइ शप्पतेए ओर कोअहीं, जे देवोअ आन धरतीपोर्याआ आखा जिवता जनवारोअ विसमेहें लेदीही.”17फाशोअ देवे नोहाहा कोयो, “जे शप्पत आंय धरतीपोर्याआ आखा जनवारोअरी लेदीही, तियीइ निशाणी एज होय.”18नोहाअ पोर्या जे जाहाजेम रोत निहीया, ते शेम, हाम, आन येपेत ओता; आन हाम कनानोअ आब्हू बोण्यु.19नोहाअ तिन पोर्या एज होय, आन यांआं वंश पुरी धरतीपोअ पसरीत गोयो.20नोहू खेतीवाड़ी कोऊ वोल्यू आन तिये दाराक्शाआ मोलू लागाड़्यू. तो पेहलु खेतीवालू ओवू;21आन तो दाराक्शाआ होरु पीत कोइत साकवाल ओवू; आन तियाआ पोड़ावाम नागरुज पोड़ीत रोयू.22ताहां कनानोअ आब्हे हामे तियाआ आब्हाहा नागरुज देख्यू, आन बारथे आवीत कोइत तियाआ बेनू पायहोहो कोत देदो.23ताहां शेम आन येपेत बेनू जोआं साअको लेत कोइत तियांआं खांदोपोअ मिक्यो, आन फासाड़ी वोगेहे उलटा सालीत कोइत तियांआं आब्हाआ उगड़ाअला डिलोहो टापी देदो, आन ते तियांआं सोब फासकुंड्ये फिरीत ओती, तिहीं वाअहीं ते तियांआं आब्हाहा उगड़ाअलू ने देख्यू.24जेहेलाम नोहाआ तुंदोर उतरीत गोयी, ताहां तिये जाइंत लेदो के तियाआ हानीइले पोर्ये तियाअरी की कोअयोहो.25तिये कोयो,“कनान हारापवालू ओवे:तो तियाआ पायहोअ पावरोअ पावर ओवे.”26फाश्योअ तिये कोयो,“शेमोअ देव यहोवा हाजू होय,आन कनान शेमोअ पावर ओवे.27देव येपेतोअ पिड़ी वादाड़े;आन तो शेमोअ पोड़ावाम वोहती कोए,आन कनान तियाआ पावर ओवे.”28रेलेए फासाड़ी नोहू हाड़ा तिन होव वोरह्ये जिवतू रोयू.29एहें कोइत नोहाआ पुरी वय हाड़ा नोव होव वोरह्योअ ओवी, तिहींइं फासाड़ी तो मोइत गोयु.
The Word for the World International