यहेजकेल9
1तो मोठेस आवाजा माय केयो, “हुमलो, ताह मार फाय लावो, जाह हेयरान माणहे न्यायनिवाड़ो केरनेन केरता बाणायेल हेते, एने ता माय रेन आखान आथाम आथ्यारे लेन मार फाय आहने आवो।”2एने मी दिख्यो काय उत्तर उगे उगेड़नार उपेरल्या बायणान दिशा उगे सोव एदमी आवणे बाज रेनाह, एने ता माय रेन एक एका फाय दाराल्या आथ्यारे हेते, ता माय रेन एक माणुह हुवाल्ला फाड़का पेर रियेल इतो, जान एक उगे लेखणेन वोस्तु एक जोलनो एतो, ता माय आवा एने पितलान वेदीन आहने उबरेय गीया।3एने इस्राएलान बोगवानान बोड़ाय फाकावाला जीवा पोर रेन, जा पोर तो रेतालो, मोंदिरान पावत्री पोर आव लागो, तेवी बोगवान हुवाल्ला फाड़का पिरेल ता माणहाह आयड्यो, जान कोमराम लेखणेन वोस्तुन जोलनो एतो।4बोगवान ताह केयो, पुरा यरूशलेम हेयरा माय जावो एने ता सोबा निंडाला पोर एक निसाणी लागाड़ो, जा हेयरा माय एणार खाराब कामा देखीन नाराज हेते एने दुख माणावतेह।5तेवी मी बोगवानाह दिहरा माणहाह केतालो होमल्यो, “तान पासाण पासाण पुरा हेयरा माय जावो; एने ता पोर गिण मा किरहो। एक माणुह बी तुमरी नेजरी माय रेन वोचीन नाहणे नाय जुवे।6डावाला, जुवान सोरा, एने जुवान सोऱ्यु, आहख एने सोरा आखाह मार टाकज्यो, पुण काल्ला ओहला माणहाह मा सापेलहो, जान निंडाला पोर निसाणी लागानी एय, मारा चोखाले जागे रेन सुरू किरज्यो।” तेवी ता डावाला माणहा पोर रेन सुरू केऱ्या, जा गेरान सामने एता।7तेवी तो केयो, “गेराह एठो केर दिज्यो, एने माराय जायेल माणहान देड़ा केरीन खोलीह बोर दिज्यो, जावो!” तेवी ता बाहेर निकेलना एने हेयरा माय पुरा माणहाह मारने बाज गीया।8जेवी ता मारने बाज रियेल एता एने मी एखालो रेय गीयो, तेवी मी मुयान बोरहे पुड़नो एने आयड़ीन केयो, “एय मालीक यहोवा, हाय! काय तु यरूशलेमा पोर तारा रागान आक्ठो रोचवीन काय इस्राएलान वुचेल वोस बी खेतेम केर दिहे?”9तेवी तो माहु केयो, “इस्राएल एने यहुदान गेराणान पाप जुलूम होवटा हेते, ओलाक वोर काय देस खुना माय एने हियोर पापा माय बोराय जायेल हे; काहाकाय ता केतेह काय बोगवान देरतीह सोड़ दियेल हे एने बोगवान कायच नाह दिखेत।10केरीन मी ता पोर गीण नाय केरू नाहते ताह नाय सोडु, पुण मी तान कामाह ताच पोर टाक देह।”11तेवी तो माणुह, जो हुवाल्ला फाड़का पेर रियेल एने तान कोमराम लेखणेन वोस्तु बांद रियेल एतो, तो फिरीन आवीन केयो, “तु जीह केरीन कियेल इतो, मी तिहेच केरीन केर दिनो।”
The Word for the World International