Лекм22
1Кӧ ӱшкыжым але шорыкым шолыштеш да шӱшкылеш але ужала гын, тек ӱшкыжлан вич ӱшкыжым, шорыклан ныл шорыкым пуа.2Кӧ кӱнчен пурышо ворым куча да тудым колымешкыже пера гын, тудын вӱржылан титакан ок лий.3Но ворым кече лекмеке пуштмо гын, тудым пуштшо еҥ титакан лиеш. Шолыштшо еҥ тӱлышаш, а тӱлашыже ниможат уке гын, шолыштмыжым тӱлен налаш тек шкенжым ужалат.4[Ворым кучат, а] мо шолыштмыжым тудын дене эше илышым муыт гын – тиде ӱшкыж, осёл але шорык лийже, – тудо кок пачаш шукырак пӧртылтышаш: ик вольыклан – кокытым.5Кӧ шке вольыкшым весын пасушкыжо але виноград аҥашкыже колта, да вольык тушто мо улмым кочкын да тошкен лектеш гын, [тек вольык оза, тушто саска мыняр лиймым шотыш налын, шкенжын пасуж гычын пуа. А вольык уло пасум локтылеш гын,] тек вольык оза пытарыме саска олмеш шке пасусо да виноград аҥасе эн сай саскаже-влакым пуа.6Ылыжтыме тул йырым-йыр шарла да, иман вондерым авалтен, шурно кылта-влакым, эше тӱреддыме шурным але уло пасум йӱлалта гын, эҥгеклан тулым ылыжтыше еҥ тӱлышаш.7Кӧ лишылъеҥжылан аралаш шийжым але иктаж-могай ӱзгаржым пуа, а нуным тудын суртшо гыч шолыштыт, да тидын деч вара шолыштшым муыт гын, шолыштшо еҥ кок пачаш утларак тӱлышаш.8Шолыштшым огыт му гын, тек суртын озаже судитлыше-влак деке толеш да ончылнышт товатла: лишылъеҥжын погыж деке тудын кидше тӱкненат огыл.9Ӱчашымашым лукшо кеч-могай йомшо пого нерген – тидыже кеч ӱшкыж, осёл, шорык але вургем лийже – иктаж-кӧ ”тудо мыйын” манын каласа гын, нине кок еҥын йодышыштым судитлыше-влак марте шуктыман. Судитлыше-влак кӧм титаканыш луктыт, тудо лишылъеҥжылан кок пачаш утларак тӱлышаш.10Кӧ лишылъеҥжылан осёлжым, ӱшкыжшым, шорыкшым але иктаж-могай вес вольыкшым аралаш пуа, но вольыкшо кола але эмгана, але тудым вӱден наҥгаят, а тидым нигӧат ужын огыл гын,11вольыкым аралаш налше еҥ тек Господь ончылно товатла: тудын кидше лишылъеҥжын погыж деке тӱкнен огыл. Тидлан вольыкын озаже ӱшанышаш, сандене тудлан тӱлаш ок кӱл.12А вольыкым тудын деч шолыштыныт гын, тудо вольыкын озажлан тӱлышаш.13Вольыкым янлык кӱрыштын гын, тек кӱрыштмӧ вольык деч мо кодшыжым конден ончыкта. Янлык кӱрыштмылан тудлан тӱлаш ок кӱл.14Кӧ лишылъеҥже деч вольыкым жаплан кучылташ налеш, да тудыжо озаже уке улмо шеҥгеч эмгана але кола гын, налше еҥ эҥгеклан тӱлышаш.15Но тиде озажын шинча ончылныжо лийын гын, тудо тӱлышаш огыл. А вольыкым оксала тарлен налме гын, озажлан тарлыме акым пуыман.16Кӧ ӱдыръеҥым сымыстара да тудын дене мала гын, тек ӱдыр верч олным тӱла да шкаланже ватылыкеш налеш.17А ача ӱдыржым тудлан марлан пуаш ок келше гын, тек тудо садак [ачажлан] шийым тунар пуа, мынярым ӱдыр олнылан пуат.18Юзо ӱдырамашым илышым ит кодо.19Вольык дене кӱтлышӧ кажне еҥ пуштмо лийшаш.20Господь деч моло вес юмо-влаклан надырым кондышо еҥ пытарыме лийшаш.21Йот мланде гыч толшо еҥым ида шыгыремдыл, ида пызыре, вет те шкежат Египет мландыште йотъеҥ лийында.22Тулык ватымат, тулык йочамат ида шыгыремдыл.23Нуным шыгыремдылыда гын, нуно Мый декем йӧсын кычкыраш тӱҥалыт, да Мый нунын кычкырымыштым колам.24Тунам Мыйын шыдем ылыжеш, да Мый тендам керде дене пуштам. Тендан ватыда марийдыме лийыт, а йочада тулык кодыт.25Мыйын калыкем гыч нужна еҥлан оксам кӱсын пуэт гын, пайдам налаш шонен, тудын деч ашламым ит нал.26Лишылъеҥет деч залог шотеш ӱмбал вургемжым налат гын, тудым кече шичмешке пӧртылтӧ.27Вет тиде вургем деч посна тудын вес леведышыже уке, тудын дене ты еҥ капшым петыра. Кузе тудын деч посна малаш тӱҥалеш? Кунам тудо Мый декем йӧсын кычкыраш тӱҥалеш, поро улмемлан кӧра Мый тудым колам.28Юмым ит шӱктаре да калыкетын вуйлатышыжым ит шудал.29Шурно лектышетын икымше саскажым да виноградым темдыме верын икымше лектышыжым Мыланем кондаш ит юватыл. Эн ончыч шочшо эргычым Мыланем пу.30Тидымак ыште икымше шочшо ӱшкыжаш презет, тагапачат [да осёлет] дене. Тек нуно шым кече авашт пелен лийыт, а кандашымше кечын нуным Мыланем пу.31Мыйын святой калыкем лийза. Янлык кӱрыштмӧ вольык шылым ида коч, тудым пийлан кудалтыза.
Institute for Bible Translation, Finland