1 Кур.кн14
1Хирам, Тирын кугыжаже, Давид деке шке еҥже-влакым, тыгак тудлан полатым чоҥаш кедр пушеҥгым, чоҥышо ден кӱмастар-влакым колтен.2Давид умылен: Господь тудым Израильын кугыжажлан пеҥгыдемден, шке Израиль калыкшылан кӧра тудын кугыжа кучемвийжым кӱшкӧ нӧлталын.3Давид Иерусалимыште шкаланже эше вате-влакым налын да тудын эше эрге ден ӱдыржӧ-шамыч шочыныт.4Теве Иерусалимыште шочшо эргыж-влакын лӱмышт: Шаммуй, Шовав, Нафан, Соломон,5Ивхар, Елисуа, Елфалет,6Ногах, Нефек, Иафий,7Елишама, Веелиада да Елифелет.8Кунам филистим-влак Давидым пӱтынь Израильын кугыжажлан шӱрен палемдыме нерген колыныт, нуно тудым кычал каеныт. Тидын нерген пален налмеке, Давид нунын ваштареш каяш шонен пыштен.9Филистим-влак толыныт да Рефаим лапверыш керылт пуреныт.10Давид Юмо деч йодын: «Филистим-влак ваштареш мылам каяш мо? Нуным мыйын кидыш пуэт мо?» Господь тудлан вашештен: «Кай. Мый нуным кидышкет пуэм».11Давид шке сарзыж-влак дене Ваал-Перацимыш каен да тушто филистим-шамычым кырен шалатен. Тудо каласен: «Кугу вӱд пытарыме семын Господь тушманемым шинча ончылнем шалатыш». Садланак тиде верым Ваал-Перацим манын лӱмденыт.12Филистим-влак тушан шке юмыштым шуэн коденыт. Давидын кӱштымыж почеш нуным тулеш йӱлалтеныт.13Филистим-шамыч угыч толыныт да лапверыш керылт пуреныт.14Давид Юмо деч эше ик гана йодын. Юмо тудлан вашештен: «Ваштарешышт ит кай, нунын деке шеҥгечын, шопкер велым лишем.15Кунам шопкер ӱмбалне сарзывий ошкылмо гай йӱкым колат, кредалаш тӱҥал: филистим сарзывийым кырен шалаташ манын, тыйын ончычет Господь кая».16Давид Юмын кӱштымыж семынак ыштен. Нуно филистим сарзывийым Гаваон деч Газер марте кырен шалатеныт.17Давидын лӱмжӧ чыла элыште чапланен, тудын деч чыла калык лӱдаш тӱҥалын – тыште Господьын кидше лийын.
Institute for Bible Translation, Finland