Pilibiyawa2
1Nde ku mani sa dishiya daa a siki tala kiya aku nja Kiristi, nde ku mani takuwa daa a siki so yi, nde ku mani zumunshi daa nja Aworo, nde ku mani tala kiya nja toseyi,2Se ku sa ni perisiki naa e sika de ku ma tunani daa, ku mani so yiri daa, ku ma daa a siki ni Aworo nja nupi aku.3Kede ku yi mbo daa a siki so dishiya aku ko girima kiya,sede a siki ni aminshi aku ku la worosu su pi kiya ku.4Kowon nse a siki aku kede e yi mbo sobon riba ni kiya yi kowe, sede riba ni sobon worosu su du.5Tunani ku e ma yiri ni Kiristi Yesu:6Waana, kode nkye Yesu e ma kamani Mirikisi,e taba tunani de gonta kiya yi nja Mirikisi ba.7Momoko yomuna: e la kiya yi e ma mbodaa ba,E la kiya yi ma kankye bunwa ,E la kiya yi ma kankye nsebeki, de e butu a siki kamani ni nsebeki.8E bwala kiya yi,te turiki beyi girimade keyi te muntu,Muntu a kiya gidiri!9Sobon yomu Mirikisi ba yi girima pi gurunja e ba yi seni de pi guru seni,10nkye a siki seni ni Yesu guru guyam sua durea siki bisi nja a kisi nja a siki siki kisi,11nja guru arishiya yaa beyi sheeda nkye Yesu Kiristi ma Obagizi,te anya beyi girima ni Mirikisi Adaa.12Sobon yomu, oku nsu oboki na, yiri de kuma beyi girima mu a kwanki de Ni ma nja ku, kuzukam de Ni ma nja ku ba sigeba ni beyi girima ko de ni ma nja ku ba. Ku yi ANKI ni sila aku a siki womba Mirikisi ni yanzi13yomu e ma Mirikisi na yaa yi ANKI a siki aku nja yaa sa de ku yi mbo kyakyawu de yaa bila.14Ku yi guru mbo kede ni bebeki beta ko gadama e ma a siki ku,15de kede ku ma ni mbo basi ba ku ma sere, yaya ni Mirikisi, ba ngala a siki ntani ni kwanki mu de sua zi ba, de ku beyi asikye kankye kemu a durinya16Yiri de ku keleba beta ni leyi ari mma yi dege dolo a nana ni Kiristi nkye gudu ko pama de ni yi ma a banza ba.17Beigaskye aku nja anki aku a siki Obagizi ema kankye sedeka na anya e yi. Yomuna ko sua la zini na nya a kiya beigaskye aku, mma yi peri siki de ni yi sedeka mu ni peri siki nja ku.18Yomu na oku ma ku yi muruna nja peri siki nja ni.19Na yi ologba a siki ni Obagizi Yesu de ni saka Timoti anya ku seberi, nkye de e ni samu sadishiya nde ni zi nabari aku.20Ni ma ni nseda ka na yi, de yaa zo a kula ni zunwa lapiya aku.21Sobon konse yaa yi mbo de yaa sua kiya yi na nto, ba ni Yesu Kiristi ba.22Sede oku ku shina yiride Timoti nana kiya yi, yiride eni nja shi mu ma kankye yaa nja adaa, mu yi anki gabada sobon ni nabari kyakyawu.23Na yi ologba sobon yomu, de ni saka anya ku seberi yiride geni mbo yaa yi tepiya nja ni.24nja ni sadishiya na a siki ni Obagizi nkye e ni nkiya na mma zo seberi.25Sede mma yi tunani ko ema dole na de ni saka Abaparodita, yayuwa na, oboki anki nja oboki pama, nsude e ma yaa manki aku, nsude ku saka yi de zo sua ni nto.26Sede yaa yi peri siki de e geni guru nja ku beki siki sobon ku zi yaa yi suwo.27Gangasi yaa yi suwo, ari yaa bila muntu. Sede Mirikisi zi toseyi yi, ba a kiya e yi dandaa ba sede nja ni du, de e nana ni Genbeki a kiya beki siki.28Sobon yomu mma yi guru kokori de ni saka yi zo anya aku, nde ku sakye geni yi kwa yi peri siki eni kuma beki siki na yaa rigye.29Ku yi naba a siki ni Obagizi ni totolo perisiki, nja ku geni yiri menza mu ni girima,30Sobon e beyi kiya yi de e muntu a kiya anki ni Kiristi, e beyi kiya yi de e sua ni nto de oku kiya ku Kwa yaa yi ni nshi ba.
The Word for the World International