Faarotikaa Maxaafa19
Dada Duuchcha Mageniinka Ulfinna Leellishshaan
Faarsaaleeyyetike Sooressi'a Daawwitixxa Faaro
1Iimuwwa Mageniinka ulfinna leellishshaan;dhisendeexxi iimanna isixxe angaxxa huje haassottaan.2Mitte barra mittete'n tenneddee haassottaan;mitte hashshanna wele hashsha'n tennende lebbaan.3Kunnichchuwwi haaso'ee hiyyachchi hedheba'a;hafuurikinna laqisaba'a;4Yaane kinni erga konnechchuwwixxi butta duuchcha'n dhaqqabbaan;buttatixxe gabala qico'ninna hiyyichchuwwi konneechchuwwik geyaan;Mageni arishsho galdaba iima giise'een.5Wajubbichcho dukko giddii'n fulammakishsha arishsho wa'aa hite fuldaan;gongammaki hokkoketee'e gammadammashsha gammaddaan.6Ise mitte darrexxe iimatixxe gabalanaa'n fuldeexxi wele darrexxe gabalaba'aa me'itaan;isike eebbinjixxe hunnanaa'n dande'eexxi sho'omaachchi hedhebaan.Duuchchi Woddike Goottika Seera
7Duuchchi Woddike Goottiki seeri dedha afeekebaan;lubbo manjiinxe'e hedhote uuwwaan;Duuchchi Woddike Gottik ajaji addatemeeken;ege'na afebaake manni'a beekuma uuwwaan.8Duuchchi Woddike Goottiki seeri dhugaaten;qalbetee gammashshote uuwwaan;Duuchchi Woddike Goottiki ajaji wa'aa hiyyeeken;ille affashsha assaan.9Duuchchi Woddika Gootta sodaata duuchchi woddi'a hexxaaxxe ca'umman. DuuchchiWoddike Goottixxi murte duuchchi wodda dhugatenna qulummatiten.10Iittann ca'ite worqe caala hira affe'eexxen;malebiinxe la'e irra xe'maxxen.11Ardake'n murte uuttettek oruwwi ani'a barachcho uwween;garbichchi atik aninna ati hittettexxa ajajemennen.12Ayyinna ifixxa balleessa uudaaki hedhebaan; Ee, Duuchchi woddike Gootta!Sho'ondeexxa balleessa anxa gattowwal hiyyi.13Ege'na'n cubbo hujatenaa'n anee heqqi;ookkone wodda tennee labbaaxxa fuggoxxa balleessa hujebe'noke qullichcha manjo kadannon.14Anke gollanna anke anjirallo Ee, Duuchchi Woddike Goottaa! Anke afo'ik haaso'inna anxe qalbeki yaadi atee gammachchiisake kadowwaal.The Word for the World International