Mammaassiinkaa Maxaafa28

1Fuggichchi manji ayyinna shorrebaang baaja, qullichchi kinni neenqinsha mitte godobinni hedha.2Bogiink ardi jalloole galchalluwwi birasa'aan,yaane kinni qalbeeffachchotikinna ege'na afeek galchalli hedhaa wodda ardi qeerraxxe yanna'a ititee hedha.
3Hiyyeeyye miicaak manji,midha balleessammake jabake xeenishshate.
4Seera ulfeessabaak manni fuggaalleeyye saada,seera heqqedhaak manni kinni fuggaalleeyye gibaan.
5Fuggaaleyye manni dhuga'a qalbeeffantabaan,Duuchchi Woddika Gootta harsaak manni kinn wo'ma qicinni ege'naan.
6Daabaallessa ora'n me'aake dureessi mannii'n,addatemeeka hiyyeessa woyya.
7Seera heqqedhaaki qalbeeffachcho afeeke belton,baashshe manninni welti jaalomaak kinni anna salphisaan.
8Dhala bira sa'issiyyoti karra bukki assedhaak,hiyyeeyyete o'waake wele manni'a tuulaan.
9Seera laqa gibaake manjixxi soodachchoMageno diqachchiissa.
10Qajeela manna fuggo ora'n akeekaakqotemmanxe bale'ni iba,balleessa afebaak manji kinni eloxxe yaane dhaala.
11Dureessichchi ifi muxxete assee uuda,qalbaamessi hiyyeessi kinni iso'o koke ege'na.
12Qulliyye injifattaa wodda lumooxxe gammashshoo kadda,fuggaalleeyye galchate'n saxxaa wodda kinni suuqema.
13Cubbo ifixxa buqedhaak nammi hiyyaba'a,faaci'weexxi isee'e waalak kinni gattowwaal alfa.
14Duuchchi wodda Duuchchi Woddika Gootta sodataake manjixxa wodo,godoba jabeessedhaak kinni rakkote'n e'ya.
15Hiyyeeyye galchaak godoba jabaataak moyanji,harqammake neenqishsha yookaan gaade tiribi hiyyammake Dibi hiyyemmake biniinchishshaten.
16Godoba jabakik galchalli xe'ya qalbeeffachchoke,seeribeloxxa la'o gibaak kinni qeerrake baro hedha.
17Manjo anga sa'eek manjireyaa qico'n doonsakiyya hiyya'n hedhaan;ayyinna iso'o gargaaroqqe'e.
18Me'injo isike'n ci'memmabaaka manjo fuggoxxi iso'o geltaba'a,dabaalessi orik manji kinni dadhange iba.
19Buttina huccaak gelte gattaaxxa ita alfa,toliinxe halcha abixxe me'aak kinni buxanjo hyyeessa kada.
20Addatemeek manji lumo qico eebbisema,duroomo'a wiinamaak kinni xixemebaak gataba'a.
21Gamisiyyo eloxxebaan,manji kinni tima waasixxe hiyye balleessa huja.
22Donni duroomo'a haafema,hiyyumma iso'o heqqita'neexxa ege'neba'a.
23Kookishshik haaso'a manji mannii'n,xixaak manji uduma galateeffatema.
24Anno amatenaa'n mooreexxi, «Tinni balleessatebaan» hiyyaak,balleessammake wele manninni qixxenden.
25Donni manji lola ke'issa,Duuchchi Woddike Gootta'n addataak kinni godda.
26Umo ifike'n addatak manji hawwawwake,muxxummati hedhaak fuggoxxenaa'n gata.
27Hiyyeeyyete'e uwwaak gophaachchi hedheba'a,afa'inni afebaashsha sa'aak kinni yowwema.
28Fuggaalleeyye galchita wodda manni suuqema,galchatenaa'n fuggaaleyye kexxaa wodda kinni qulliyye bira saxxa.

The Word for the World International

https://app.library.bible/content/2b894378475c6aea