Fádirigu6
Adagaragüdüni luagu le adügǘti lau luriban saminaü
1Aba lariñagun Wabureme lun Moisesi:2—Danme lafigouhan aban gürigia lau ladügün somu katei lau luriban saminaü ligibugiñe Wabureme o ladüga lan leyeedun gürigia líledi luagu somu katei le lígirubei gürigia ligía luma lubarua o lafuredeirun lan lun, luéi líweruhan lan o ladüga lan lagidarun somu katei luéi lau erei,3o ladüga lan leyeedagun lau somu katei eferidiruti le ladarirun, o ladüga lan láfiñurun le málati, furumiñeguarügü katei líbeina le, le afigougüdüti gürigia,4gadurunbei luagu figóu ligía. Gásumeti láguyugüdüni le líweruhabei odi le lan lanügübei lau erei, o le lan areidúbei luma, o le lan ladarirubei,5o furumiñeguarügü lan katei le uágubei láfiñura le málati. Gasu láguyugüdüni súngubei lun labureme, lúmaya seingü lídangiñe san lanwoun, danme ladügüni ladagaragüdün luagu lidurun.6Ladagaragüdüba aban mudún le úati mégeiti luagu lun Wabureme. Buguyaba adandiahei lebegi mudún ligía, hádangiñeba giñe libiñanigu lanügei, ábame lanügüni lun fádiri keisi adagaragüdüni luagu lidurun.7Ábameti libihini fádiri ferudun lúmagiñe Bungiu luagu furumiñeguarügü lídangiñe katei le, le afigougüdübalin gürigia ligía, ábame ferudunawa lan lifigoun.Arufudahani libügürü adagaragüdüni gudawarügüti
8Aba lariñagun Wabureme lun Moisesi:9—Arufudahabéi le lun Aarón hama lirahüñü libügürü adagaragüdüni gudawarügüti. Animaalu le afarúti lun adagaragüdüni, gasu ligirúniwa ligibuagu leñegura watu le luágubei latarü bou larugan, lun láguduni watu gemeti.10Ábame ladaüragun fádiri daüguaü tuma galasunsiyu to tautu linu, ábame labuduni lubaligin animaalu le agudúbei luagu latarü, ábame líchuguni lóubawagu latarü.11Lárigiñe ábame lasansirunu ladaüragun, ábame lanügüni baligi lidoun aban fulasu harumati bóugudin tuéi kianpu-agei.12—Méñeguchadibei watu gemeti le luágubei latarü. Gasu líchugun fádiri lubúa sagü binaafin, ábame líchuguni animaalu le lunbei lagudúniwa lun adagaragüdüni, lágudubei giñe hagüle animaalugu ha afarúbaña lun adagaragüdüni le lánina arandaruni.13Gasu durungu luba lan watu gemeti le luágubei latarü súnwandan.Arufudahani libügürü idewesei le fulúaruauti
14—Arufudahani le, luáguti burí idewesei le fulúaruauti: Lunti hadügüni fádirigu lun Wabureme ligibugiñe latarü.15Lanügame aban hádangiñe murusun tídangiñe fulúaru to edewehóuboun luma garaba, úara luma kupali le lídanbei idewesei, ábame láguduni sun le luagu latarü keisi idewesei gudawarügüti le lánina aritawaguagülei, le buiti líhemen lun Wabureme.16Le ígiragubei lídangiñe idewesei, ábame léigini Aarón hama lirahüñü, maganouga lébini, lidan aban fulasu anuadirúati lidan tibürürün kianpu lánina óundaruni.17Moun lumuti híchugun lébini tidoun. Ru naaru houn kei le yuubei houn lídangiñe le ichugúbei nun keisi idewesei gudawarügüti, ani aban katei sánduti, kéigubeirügü adagaragüdüni luagu figóu luma luagu duru.18Lun sun dan lúmagiñe guentó, gayaraabei héigini sun wügüriña ladügawagun Aarón le yuubei houn lídangiñe idewesei le agudúbei lun Wabureme. Furumiñeguarügü katei le adagaruti luagu idewesei ligía lerederuba anuadirúañu.Hadewese fádirigu
19Aba lariñagun Wabureme lun Moisesi:20—Anihán idewesei le lunbei líchuguni Aarón hama ladügawagun lun Wabureme danme hanuadirúniwa keisi fádirigu: Bián kilu tídangiñe tubuidun-agei fulúaru, keisi idewesei fulúaruauti, hanügame tamidan binaafin, tamidan rábounweyu merederagunga ni aban weyu.21Lunti hamigisirunu fulúaru buidu lau garaba, ábame hásürahanu lidan aban afuridugülei, lárigiñe ábame hañügürihanu lun hadagaragüdünu keisi idewesei le buiti líhemen lun Wabureme.22Ítara luba ligaburi laranserunu fádiri le íñugutimabei hádangiñe ladügawagun Aarón le anuadirúaalibei leweñegua, yuuti lun Wabureme, ani gasu lagudún sunsuinagubei.23Sun hadewese fádirigu gasu lagudún sunsuinagubei, moun lumuti léigini ni aban.Arufudahani libügürü adagaragüdüni luagu figóu
24Aba lariñagun Wabureme lun Moisesi:25—Arufudahabei katei le lun Aarón hama lirahüñü libügürü adagaragüdüni luagu figóu: Animaalu le edewehóuti luagu figóu, gasu libugún ligiina ligibugiñe Wabureme, lidan fulasu le ñein lubéi háfarawagua animaalugu ha lúnbaña hagudúniwa, lugundun aban katei sánduti lira.26Fádiri le adügübalin adagaragüdüni luagu figóu gayaraabei leigin lídangiñe, gama lumoun gasu léigini lidan aban fulasu le sánduti, tibürürünrugu kianpu lánina óundaruni.27Furumiñeguarügü katei le adagaruti luagu lǘgürügü animaalu ligía, lerederuba anuadirúañu lun Bungiu, anhein abahichagua hitaü tuagun daüguaü, gasu tachibúniwa lidan aban fulasu sánduti.28Gasu labouchawagun sóudieru lauti múa le ídanbei lábouagua úi le idewesei, gama lumoun anhein lidan lubéi aban ágeidinaü le buronse lábouagua, chibawarügübei chalawagua ligíame.29—Katei sándutimati adagaragüdüni le. Fádirigurügübaña gayara heigin lídangiñe.30Gama lumoun animaalu le adagarawagüdüti luagu figóu, le barüwati lita tidoun kianpu lánina óundaruni lun ferudunawa lan figóu tidan sanduariu, siñabei leiginiwa animaalu ligía. Gasu lagudúniwa wáturugu.Bible Society of Honduras