Owera kobodorouti 6 पढ़ें

Owera kobodorouti6

7 kiwarebai urubia giaubai-rimo

¹Iesu kowasoro urubia iedi tau ro nato imese sirio ta-goi-rimo inaina aise garadabu-rimo Iesu kowasoro aboto, kaupoti ata mibo turi to nato godoro-ro. Iu urubia netewa teibo topira teibo ie, arua Iu urubia Giriki owera to wiaro-mo, arua Iu urubia Aramiki owera to wiaro-mo, edi urubia ro owera to neio ro gororobai-rimo. Ina Giriki owera to edi kimibiria urubia ro na-wiaro-mo neio masawe owera iato garo-rimo ibo, ‘Ohona nagirimi-oromio-ri nimo edi garamio mamio ro nio ro iwasosorowadotiti pua aise girimi-imario-ri.’

²Taie 12 kitiodorai urubia ro kimibiria urubia sirio iato gidabuai-rimo kaupoti moro to. Neibi ro ibo, ‘Neibi ro ohona kimio woko kisioidiro modobo pua, sirio tau Godi owera kimowauti neito kodiobuti modobo pua,³ina nou rie naminiramio nio aboudo modobo ie 7 meamea urubia kiaubai. Nedi urubia ro neio mea muro mutu e, neio Tarena Urio ro iworohutiti, idaibo sosoro urubia neio kiaubai modobo ie, nimo ro nedi woko ro neio aboto anamadimi-iaiwai-ri.⁴Nimo ro modobo ie sirio tau kararatoro owera karo Godi aboto, ina ibose urubia modobo ie Iesu owera to kitamudiro.’

⁵Kimibiria urubia sirio ro edi owera na-girorowai-rimo ubi to gomidai-rimo, neio ro ibo, ‘Nu modobo owera ie.’
Neio ro iato giaubuti-rimo 7 urubia, keba se Sitibini gaubai-rimo, (nou ata auna kimibiria dubu e ina Tarena Urio ro oworohutiti,) iato Piripi, Porokoru, Nikano, Timoni, Pamena, daro Nikorau. (Nikorau nou Entioko sabowa dubu e, nu Iu dubu to ta-gararapoi.)⁶Taie nedi 7 na peteibi ro kitiodorai urubia sosoro gabo ato iato giwomi-rimo, neio Godi aboto na-gararatoro-rimo neibi sapuwo to, tu neibi eputa to iato giaremo-rimo.

⁷Ibose Godi edi owera ro iato ta-gorobodorouti imese urubia aboto Ierusarema sabowa ato. Kimibiria urubia edi topira ro auna aise gowai-rimo, ibose Godi ra urubia ra turituri urubia sirio Iesu edi gabo ro neio ro aise gobodoro-rimo.

Iu urubia ro Sitibini gohiai-rimo

⁸Godi ro Sitibini auna ia pupuwo korosa gomia, nou ro awawo korosa tanaro neito gisioidiro urubia abato, neio umoro koi sapuwo to ibo nedi mea owera ro Godi aboudo ie.⁹Nou ro edi tanaro ro na-gisioidiro arua Iu urubia serawo goi-rimo nou aboto. Nedi urubia ro neio keba se wisa tato woko isioidirotiti-mo kaupoti edi mibo woko ro neio ro ta-gimesere-rimo. Ina noudo ie neio ro ata topira nou ri gosioidiro-rimo neio neito geriduti-rimo ‘Mibo Tato Urubia’. Neio edi karadabu moto ro Iu urubia Sirisia ra Eisia ra nedi duriomoro teibo ro neio ioudo gou-rimo, ibose auna sabowa teibo na-iamo-ma Sairini ra Arekesanidara ra amia urubia ioudo neio aboto ta-garadabuai-rimo. Ina nedi urubia ro Sitibini mutu auna owera to gorowati-rimo.¹⁰Kaupoti Sitibini owera na-iarotiti auna ia muro mutu iarotiti ina edi muro ro nu Tarena Urio ro omiotiti-ro, odio Iu urubia ro noudo ie Sitibini owera neio ro kemadibiai modobo pua.

¹¹Taie neio ro arua dubu iato gihodowa-rimo Sitibini sapuwo to owera kakate moro ato emowagegere ri ibo, ‘Io nou nimo ro ta-nemerewidiro-rimo ubauba owera na-iarotiti Mose ra Godi ra sapuwo to, idaibo sosoro owera neitiro ubauba neito iwaititi-ma.’

¹²Mibo Tato Urubia to edi urubia ro geriduti-rimo, neio ro Iu eputa urubia daro Mose sabi kitamudiro urubia aboto iedi owera ro iato gorowauti-rimo. Eputa urubia ro edi owera ro na-girorowai-rimo neio niro turi korosa neito neio ro aise gimowai-rimo. Taie neio na-gou-rimo Sitibini aise gohiai-rimo iato gowodoro-rimo Iu urubia edi ohu ia koto kiauri urubia aboto.

¹³Ina arua urubia neio ubi ta-goi-rimo bagea owera aro ri Sitibini sapuwo to, taie neio ohu ia koto kiauri urubia sosoro gabo ato na-gotoburio-rimo bagea owera neio ro iato gimowauti-rimo nou sapuwo to. Neio ro ibo, ‘Nedi dubu ro sirio tau auna ubauba owera iarotiti edi Tarena Moto ro nou sapuwo to, ibose Mose sabi sapuwo to.¹⁴Ina nou ro ibose ta-iarotiti ibo Iesu Nasareta sabowa dubu nou ro nedi Tarena Moto ro ama-ototoro-ri. Nou ro ibose ta-iarotiti Mose ro edi tanaro ro na-giwapotai-ro, Iesu ro ata mino to ama-iwesegerewado-ri.’

¹⁵Koto kiauri urubia neio idomari nou ato se giwotoi-rimo, neio ro nato gowea-rimo nou sosoro woidomari ata sosoro giwotoi sowake urio woidomari sosoro ie.