חזוֹן יוֹחָנָן4heb_scg
1א אַחַר הַדְּבָרִים הָאֵלֶּה רָאִיתִי וְהִנֵּה שַׁעַר נִפְתָּח בַּשָּׁמָיִם וְהַקּוֹל הָרִאשׁוֹן אֲשֶׁר שָׁמַעְתִּי כַשּׁוֹפָר מְדַבֵּר אֵלַי לֵאמֹר עֲלֵה הֵנָּה וְהֶרְאֵתִיךָ אֵת אֲשֶׁר תִּקְרֶינָה אַחֲרֵי־כֵן׃2ב וַתָּנַח עָלַי הָרוּחַ כְּרָגַע וְהִנֵּה כִסֵּא נִצָּב בַּשָּׁמַיִם וְאֶחָד ישֵׁב עַל־הַכִּסֵּא׃3ג וְהַיּשֵׁב הַהוּא כְּמַרְאֵה אֶבֶן יָשְׁפֶה כְּאֶבֶן אֹדֶם וְקֶשֶׁת סָבִיב לַכִּסֵּא כְּעֵין בָּרָקֶת׃4ד וְעֶשְׂרִים וְאַרְבָּעָה כִסְאוֹת עֹמְדִים אֶל־הַכִּסֵּא מִסָּבִיב וְעַל־הַכִּסְאוֹת רָאִיתִי עֶשְׂרִים וְאַרְבָּעָה זְקֵנִים ישְׁבִים מְלֻבָּשִׁים בְּגָדִים לְבָנִים וְעַטְרוֹת זָהָב בְּרָאשֵׁיהֶם׃5ה וּמִתּוֹךְ הַכִּסֵּא יֹצֵא בָרָק רַעַם וְרַעַשׁ וְשִׁבְעָה לַפִּידִים בֹּעֲרִים לִפְנֵי הַכִּסֵּא אֲשֶׁר־הֵם שִׁבְעָה רוּחוֹת הָאֳלֹהִים׃6ו וְלִפְנֵי הַכִּסֵּא יַם זְכוֹכִית כְּעֵין הַקָּרַח וּבְתוֹךְ הַכִּסֵּא וְסָבִיב לוֹ אַרְבַּע חַיּוֹת מְלֵאוֹת עֵינַיִם מִפָּנִים וּמֵאָחוֹר׃7ז דְּמוּת הַחַיָּה הָרִאשׁוֹנָה כְּאַרְיֵה וְהַחַיָּה הַשֵּׁנִית כְּעֵגֶל וְהַחַיָּה הַשְּׁלִישִׁית פָּנִים לָהּ כִּפְנֵי אָדָם וּדְמוּת הַחַיָּה הָרְבִיעִית כְּנֶשֶׁר מְעוֹפֵף׃8ח וְאַרְבַּע הַחַיּוֹת שֵׁשׁ כְּנָפַיִם שֵׁשׁ כְּנָפַיִם לְאֶחָת וְהֵן מְלֵאוֹת עֵינַיִם מִסָּבִיב וּמִלִּפְנִים וְהַשְׁקֵט אֵין לָהֵן יוֹמָם לָיְלָה כִּי קֹרְאוֹת קָדוֹשׁ קָדוֹשׁ קָדוֹשׁ יְהוָֹה אֱלֹהֵי צְבָאוֹת אֲשֶׁר הוּא הָיָה הוֶֹה וְעָתִיד לָבֹא׃9ט וּלְעֵת הַחַיּוֹת נֹתְנוֹת הוֹד וְהָדָר וְשֶׁבַח לַיּשֵׁב עַל־הַכִּסֵּא אֲשֶׁר־הוּא חַי עַד־עוֹלְמֵי עוֹלָמִים׃10י כֵּן יִפְּלוּ הָעֶשְׂרִים וְאַרְבָּעָה הַזְּקֵנִים עַל־פְּנֵיהֶם וּמִשְׁתַּחֲוִים לִפְנֵי הַיּשֵׁב עַל־הַכִּסֵּא אֲשֶׁר הוּא חַי עַד־עוֹלְמֵי עוֹלָמִים וְאֶת־עַטְרוֹתֵיהֶם יָנִיפוּ יוֹרִידוּ אַרְצָה לִפְנֵי הַכִּסֵּא לֵאמֹר׃11יא לְךָ יְהוָֹה אֱלֹהֵינוּ יָאֲתָה לָקַחַת הוֹד וְהָדָר וָעֹז כִּי אַתָּה בָרָאתָ כָּל־אֵלֶּה וּבִרְצוֹנְךָ נִהְיוּ וְנִבְרָאוּ׃