מעשים19heb_scg
1א וַיְהִי בִּהְיוֹת אַפּוֹלוֹס בְּקוֹרִנְתּוֹס וּפוֹלוֹס אַחֲרֵי עָבְרוֹ בָאֲרָצוֹת הָעִלִּיּוֹת בָּא אֶל־אֶפְסוֹס וַיִּמְצָא־שָׁם תַּלְמִידִים אֲחָדִים׃2ב וַיֹּאמֶר אֲלֵיהֶם הֲבֹא בָא גַם־רוּחַ הַקֹּדֶשׁ עֲלֵיכֶם כַּאֲשֶׁר הֱיִיתֶם לְמַאֲמִינִים וְהֵם עָנוּהוּ גַּם כִּי־יֵשׁ רוּחַ הַקֹּדֶשׁ אֲנַחְנוּ לֹא שָׁמָעְנוּ עוֹד׃3ג וַיֹּאמַר וְעַל־מָה אֵפוֹא אַתֶּם נִטְבַּלְתֶּם וַיֹּאמְרוּ עַל־הַטְּבִלָה לְיוֹחָנָן׃4ד וַיֹּאמֶר פּוֹלוֹס יוֹחָנָן הִטְבִּיל בִּטְבִילַת הַתְּשׁוּבָה וַיַּגֵּד לָעָם כִּי־הַאֲמֵן יַאֲמִינוּ בְהַלָּז אֲשֶׁר יָבֹא אַחֲרָיו וְהַלָּז הוּא זֶה הַמָּשִׁיחַ יֵשׁוּעַ׃5ה כְּשָׁמְעָם אֶת־זֹאת שָׁבוּ נִטְבְּלוּ עַל־שֵׁם הָאָדוֹן יֵשׁוּעַ׃6ו וּפוֹלוֹס סָמַךְ יָדָיו עֲלֵיהֶם וַיָּנַח עֲלֵיהֶם רוּחַ הַקֹּדֶשׁ וַיְדַבְּרוּ בִלְשֹׁנוֹת וַיִּתְנַבָּאוּ׃7ז וַיְהִי מִסְפָּרָם כִּשְׁנֵים עָשָׂר אִישׁ׃8ח וַיָּבֹא אֶל־בֵּית־הַכְנֵסֶת וַיַּגֵּד דְּבָרָיו בְּאֹמֶץ לֵב שְׁלֹשָׁה חֳדָשִׁים בִּנְכֹחוֹת וְשׂוּם שֵׂכֶל עַל־אֹדוֹת מַלְכוּת הָאֱלֹהִים׃9ט וַיְהִי כִּי־נִמְצְאוּ בָהֶם אֲחָדִים עַרְלֵי לֵב אֲשֶׁר מֵאָנוּ לְהַאֲמִין וְגַם־טָפְלוּ דָבָר מַר עַל־הַדֶּרֶךְ הַזֶּה לִפְנֵי הָעָם וַיֵּשְׂטְ מֵעֲלֵיהֶם וְגַם־אֶת־הַתַּלְמִידִים הִבְדִּיל מִתּוֹכָם וְהוּא הָיָה מְדַבֵּר יוֹם יוֹם בְּבֵית הַמִּדְרָשׁ אֲשֶׁר לְטוּרְנוּס׃10י וַיְהִי הוּא עֹשֶׂה כָזֶה שְׁנָתַיִם יָמִים עַד כִּי־שָׁמְעוּ כָּל־יֹשְׁבֵי אַסְיָא אֶת־דְּבַר הָאָדוֹן יֵשׁוּעַ כַּיְּהוּדִים כַּיְּוָנִים׃11יא וְהָאֱלֹהִים עָשָׂה נִפְלָאוֹת גְּדוֹלוֹת עַל־יְדֵי פוֹלוֹס׃12יב כִּי גַם־חֲגֹרוֹת וּמִטְפְּחוֹת יֶזַע מֵעַל עוֹר בְּשָׂרוֹ הִנִּיחוּ עַל־הַחוֹלִים וְסָר חָלְיָם וְהָרוּחוֹת הָרָעוֹת מִגַּוָּם גֹּרָשׁוּ׃13יג וְגַם־הָיוּ אֲנָשִׁים יְהוּדִים מְלַחֲשִׁי מִתְהַלְּכִים בָּאָרֶץ וְהֶם נוֹעֲזוּ לְהַזְכִּיר שֵׁם הָאָדוֹן יֵשׁוּעַ אֶל־אֲשֶׁר רוּחוֹת רָעוֹת נֹאחֲזוּ בְקִרְבָּם בְּקָרְאָם אֲנִי מַשְׁבִּיעֲכֶם בְּשֵׁם יֵשׁוּעַ אֲשֶׁר פּוֹלוֹס יִקְרָאֵהוּ׃14יד וְהֵם אֲשֶׁר כֹּה עָשׂוּ הֵם הָיוּ שִׁבְעַת בְּנֵי סְקֵוָה יְהוּדִי וְרֹאשׁ כֹּהֲנִים׃15טו וַיַּעַן הָרוּחַ הָרָעָה וַיֹּאמֶר אֲלֵיהֶם יָדַעְתִּי אֶת־יֵשׁוּעַ וְאֶת־פּוֹלוֹס אֲנִי מַכִּיר רַק אַתֶּם מִי אַתֶּם׃16טז וַיִּתְנַפֵּל עֲלֵיהֶם הָאִישׁ אֲשֶׁר הָרוּחַ הָרָעָה בְקִרְבּוֹ וַיֶּחֱזַק מֵהֶם וַיַּכְרִיעֵם עַד כִּי־עֵירֻמִּים וְנִמְחָצִים נָסוּ מִן־הַבַּיִת הַהוּא׃17יז וַיִּוָּדַע הַדָּבָר לְכָל־הַיְּהודִים וְהַיְּוָנִים הַיּוֹשְׁבִים בְּאֶפְסוֹס וּפַחַד נָפַל עַל־כֻּלָם וַיִּגְדַּל שֵׁם הָאָדוֹן יֵשׁוּעַ׃18יח וְגַם רַבִּים מִן־הַמַּאֲמִינִים בָּאוּ לִהִתְוַדּוֹת וּלְגַלּוֹת אֶת־מַעֲשֵׂיהֶם אֲשֶׁר עָשׂוּ׃19יט וְרַבִּים אֲשֶׁר שָׁעוּ בְהַבְלֵי שָׁוְא הֵבִיאוּ סִפְרֵיהֶם וַיִּשְּׂרְפוּם בָּאֵשׁ לְעֵינֵי־כֹל וַיִּמְנוּ מִסְפַּר שָׁוְיָם וַיְהִי חֲמִישִּׁים אֶלֶף כָּסֶף׃20כ וּדְבַר־יְהוָֹה נִשְׂגַּב עַד־לִמְאֹד וְנַעֲלָה הָלֹךְ וְעָלֹה׃21כא וַיְהִי כִּכְלוֹת הַדְּבָרִים הָאֵלֶּה וַיִּתֵּן פּוֹלוֹס אֶל־לִבּוֹ לְהִתְהַלֵּךְ בְּמַקְדּוֹנְיָא וּבַאֲכַיָּא וּמִשָּׁם וָהָלְאָה עַד־יְרוּשָׁלָיִם וַיֹּאמֶר אַחֲרֵי הֱיוֹתִי שָׁמָּה רָאֹה אֶרְאֶה עוֹד אֶת־רוֹמִי׃22כב וַיִּשְׁלַח שְׁנַיִם נְעָרִים מִמְּשָׁרְתָיו אֶת־טִימוֹתִיּוֹס וְאֶת־אֲרִסְטוֹס לָלֶכֶת לְפָנָיו אֶל־מַקְדּוֹנְיָא וְהוּא אֵחַר עוֹד יְמֵי מִסְפָּר בְּאַסְיָא׃23כג בָּעֵת הַהִיא קָם שָׁאוֹן לֹא־מְעָט עַל־דִּבְרַת דֶּרֶךְ יְהוָֹה׃24כד כִּי אִישׁ אֶחָד דְּמַטְרִיּוֹס שְׁמוֹ חָרַשׁ כֶּסֶף הוּא הָיָה עֹשֶׂה מִקְדְּשֵׁי־כֶסֶף קְטַנִּים בְּתַבְנִית הַמִּקְדָּשׁ לְשֵׁם אַרְטְמִיס וַיְסַבֵּב בָּזֶה לֶחָרָשִׁים מַשְׂכֹּרֶת לֹא־מִצְעָר׃25כה וַיִּקְבֹּץ אֹתָם עִם־עֹזְרֵי מְלַאכְתָּם וַיֹּאמַר אֲנָשִׁים אַתֶּם יְדַעְתֶּם כִּי בַּמְּלָאכָה הַזֹּאת רָכַשְׁנוּ לָנוּ אֶת־לַחְמֵנוּ וְאֶת־טוּבֵנוּ׃26כו וְהִנֵּה עֵינֵיכֶם רֹאוֹת וְאָזְנֵיכֶם שֹׁמְעוֹת כִּי־לֹא רַק בְּאֶפְסוֹס לְבַדָּהּ כִי אִם־גַּם בְּכַל־אַסְיָא פּוֹלוֹס הַזֶּה מְפַתֶּה הֲמוֹן עַם־רָב לַהֲסִירָם מֵאַחֲרֵי אֱלֹהֵיהֶם כִּי יֹאמַר אָמֹר לֹא־אֱלֹהִים הֵמָּה אֲשֶׁר תַּעֲשֶׂינָה יָדָיִם׃27כז וְעָתָּה הַמְעַט הָרָעָה הַזֹּאת לְבַדָּהּ לְהִלָּקַח מִיָּדֵינוּ הַמְּלָאכָה הַזֹּאת כִּי אִם־עוֹד רָעַת הָרָעוֹת תִּפָּתַח עַל־הַמִּקְדָּשׁ לָאֱלָהוּת הַגְּדוֹלָה אַרְטְמִיס כִּי לְאֶפֶס וּלְאַיִן יֵחָשֵׁב וְיֵקַל כְּבוֹד הוֹדָהּ אֲשֶׁר יְכַבְּדוּהָ כָּל־אַסְיָא וְכָל־יֹשְׁבֵי תֵבֵל׃28כח וַיְהִי כְּשָׁמְעָם אֶת־הַדְּבָרִים הָאֵלֶּה וַיִּמָּלְאוּ חֵמָה וַיִּתְּנוּ קוֹלָם וַיִּקְרָאוּ גְּדוֹלָה אַרְטְמִיס לָעָם בְּאֶפְסוֹס׃29כט וַתֵּהֹם הָעִיר וַתִּמָּלֵא רַעַשׁ גָּדוֹל וְהֵם כֻּלָּם הִשְׂתָּעֲרוּ כְּאִישׁ אֶחָד אֶל־בֵּית־הַמִּשְׂחָק וַיַּחֲזִיקוּ בְגָיוֹס וּבַאֲרִסְטַרְכוֹס אֲנָשִׁים מַקְדּוֹנִים הַהֹלְכִים עִם פּוֹלוֹס לְשָׁמְרוֹ בַדָּרֶךְ׃30ל וּפוֹלוֹס חָפֵץ לָצֵת אֶל־הָעָם רַק הַתַּלְמִידִים לֹא נְתָנוּהוּ׃31לא וְגַם־אֲחָדִים רָאשֵׁי עָם מֵאַסְיָא אֲשֶׁר אֵהֲבוּהוּ גַם־הֵם שָׁלְחוּ לוֹ לְהַזְהִירוֹ כִּי יִמָּנַע מֵהֲלֹךְ אֶל־בֵּית־הַמִּשְׂחָק׃32לב וַיְהִי הֵם שֹׁאֲגִים אֵלֶּה זֹאת וַאַחֵרִים אַחֶרֶת כִּי הָיָה הֶהָמוֹן נָבוּךְ וְרֻבָּם גַּם־לֹא יָדְעוּ בְּשֶׁלְּמַה הֵם נִזְעָקוּ׃33לג וַיּוּבָא מִבֵּינוֹת הָעָם אֲלֶכְסַנְדְּרוֹס כִּי הַיְּהוּדִים שָׂמוּהוּ בְרֹאשָׁם וַיִּשָּׂא אֲלֶכְסֵנְדְּרוֹס אֶת־יָדוֹ לְאוֹת כִּי חָפֵץ הוּא לְהָשִׁיב אֲמָרִים לִפְנֵי הָעָם׃34לד וַיִּוָּדַע לָהֶם כִּי־הוּא יְהוּדִי וַיִּשְׂאוּ כֻלָּם קוֹל חָזָק וּכְמוֹ שְׁתַּיִם שָׁעוֹת קָרְאוּ וְלֹא דָמּוּ גְּדוֹלָה אַרְטְמִיס לָעָם בְּאֶפְסוֹס׃35לה וַיַּהַס סוֹפֵר הָעִיר אֶת־הָעָם וַיֹּאמַר אַתֶּם אַנְשֵׁי אֶפְסוֹס מִי הוּא הָאִישׁ אֲשֶׁר לֹא יֵדַע כִּי הָעִיר אֶפְסוֹס מְשָׁרַת אֶת־אַרְטְמִיס הַגְּדוֹלָה וְאֶת־תַּבְנִיתָהּ אֲשֶׁר נָפְלָה מִן־הַשָּׁמָיִם׃36לו וְהִנֵּה כִּי זֹאת אֱמוּנָה וְאֵין מִי לְהַכְזִיבֶנָּה הֲלֹא יָאֲתָה לָכֶם לִשְׁקֹט מִמְּהוּמָה וּמֵעֲשׂוֹת מְאוּם בְּטֶרֶם תְּחַשֵּׁבוּ׃37לז כִּי אַתֶּם הֲבֵאתֶם אֶת־הָאֲנָשִׁים הָאֵלֶּה הֵנָּה וְהֵם לֹא בָזְזוּ אֶת־הַמִּקְדָּשׁוֹת וְאַף־לֹא בָזוּ לֵאלָהוּתֵנוּ׃38לח וְאִם דְּבַר רִיב לִדְמַטְרִיּוֹס וְהֶחָרָשִׁים אֲשֶׁר אִתּוֹ עִם־אִישׁ־מִי הֲלֹא יֵשׁ בְּקִרְבֵּנוּ מִשְׁפָּט וּנְצִיבִים נִצָּבִים עֲלֵינוּ הָבָה יִקְרְאוּ הֵם לְבַדָּם עֲלֵיהֶם לַשֹּׁפְטִים וּשְׁפָטוּם׃39לט וְאִם עוֹד לָכֶם כֻּלְּכֶם לְבַקֵּשׁ דָּבָר הִנֵּה בְּהִתְאַסֵּף כָּל־הָעָם לְפִי חֹק יֵצֵא מִשְׁפַּטְכֶם וְדִינְכֶם׃40מ כִּי הַיּוֹם אֲנַחְנוּ נְתֻנִים בְּיִרְאָה פֶּן־יִתְגֹּלֵל עָלֵינוּ עֲוֹן מֶרֶד לְהַבְאִישֵׁנוּ בִּגְלַל הַיּוֹם הַזֶּה מַה־לָּנוּ לָגֹל מֵעָלֵינוּ חַטָּאת אֲשֶׁר לֹא חָטָאנוּ בִּלְתִּי אִם הַמְּהוּמָה הַזֹּאת׃41מא וּכְכַלֹּאתוֹ לְדַבֵּר שִׁלַּח אֶת־הַקָּהָל׃