2 הקורינתיאנים3heb_scg
1א הֲנָחֵל עוֹד הַפַּעַם לְחַוֹּתְכֶם מִי־אָנוּ הֲחֵפֶץ לָנוּ כַּאֲנָשִׁים אֲחֵרִים בְּכִתְבֵי מְלִיצָה אֲלֵיכֶם אוֹ מִכֶּם׃2ב אַתֶּם אִגַּרְתֵּנוּ חֲרוּתָה עַל־לִבֵּנוּ אֲשֶׁר כָּל־אָדָם מֵבִין וְקֹרֵא בָהּ׃3ג כַּאֲשֶׁר מוּדַעַת זֹאת כִּי אַתֶּם אִגֶּרֶת הַמָּשִׁיחַ עֲרוּכָה עַל־יָדֵינוּ וּכְתוּבָה לֹא בִדְיוֹ כִּי אִם־בְּרוּחַ אֱלֹהִים חַיִּים לֹא עַל־לֻחוֹת אֲבָנִים כִּי אִם־עַל־לֻחוֹת לֵב בָּשָׂר׃4ד וּבִטָּחוֹן רַב כַּזֶה יֶשׁ־לָנוּ בֵּאלֹהִים עַל־יְדֵי מְשִׁיחֵנוּ׃5ה לֹא כִי כֹּחַ לָנוּ לְקַיֵּם כָּל־דָּבָר כְּפִי הָעֹלֶה עַל־רוּחֵנוּ כִּי אִם־כֹּחֵנוּ מֵאֵת הָאֱלֹהִים׃6ו אֲשֶׁר גַּם־כֹּחַ נָתַן לָנוּ לִהְיוֹת כֹּהֲנֵי בְרִית הַחֲדָשָׁה לֹא לְפִי הָאֹתִיּוֹת כִּי אִם־לְפִי הָרוּחַ כִּי־הָאוֹת מֵמִית וְהָרוּחַ מְחַיֶּה׃7ז וְאִם־הַכְּהֻנָּה אֲשֶׁר מָוֶת בָּהּ וַאֲשֶׁר חֲרוּתָה בְּאֹתִיּוֹת עַל־הָאֲבָנִים מָלְאָה כָבוֹד עַד־כִּי לֹא יָכְלוּ בְנֵי יִשְׂרָאֵל לְהַבִּיט אֶל־פְּנֵי משֶׁה מִפְּנֵי אוֹר פָּנָיו אֲשֶׁר לֹא יַעֲמֹד לָנֶצַח׃8ח אַף כִּי יָאֲתָה כָבוֹד לִכְהֻנָּה אֲשֶׁר בָּהּ חַיֵּי רוּחַ׃9ט וְאִם־תִּכָּבֵד הַכְּהֻנָּה אֲשֶׁר תוֹרָתָהּ דִּין הֲלֹא תִכָּבֵד הַכְּהֻנָּה אֲשֶׁר צָדְקָה תוֹרָתָהּ בְּכָבוֹד מִשְׁנֶה׃10י כִּי בַמֶּה נֶחְשָׁב כְּבוֹד הַכְּהֻנָּה הָרִאשֹׁנָה נֶגֶד עֵרֶךְ הַכְּהֻנָּה אֲשֶׁר־לָהּ יֶתֶר שְׂאֵת׃11יא וְאִם־בַּת־חֲלוֹף כְּבוּדָה הִיא אַף כִּי־זֹאת הָעֹמֶדֶת לָנֶצַח׃12יב עַל־כֵּן בִּהְיוֹת לָנוּ תִּקְוָה כָזֹאת פִּינוּ יַבִּיעַ עָתָק׃13יג וְלֹא כְּמשֶׁה אֲשֶׁר נָתַן מַסְוֶה עַל־פָּנָיו וּבְנֵי יִשְׂרָאֵל לֹא יָכְלוּ לְהִתְבּוֹנֵן אֶל־תַּכְלִית תּוֹרָתוֹ הַבָּאָה עַד־קִצָּהּ׃14יד כִּי כָּבֵד לִבָּם וְעַד־הַיּוֹם הַזֶּה כַּאֲשֶׁר יִקְרְאוּן דִּבְרֵי הַבְּרִית הַיְשָׁנָה עוֹד הַמַּסְוֶה הַהוּא לְנֶגֶד עֵינֵיהֶם כִּי לֹא יָסוּר בִּלְתִּי בַמָּשִׁיחַ׃15טו הֵם יֶהְגּוּן בְּתוֹרַת משֶׁה וְהַמַּסְוֶה כְּמִכְסֶה עַל־לִבָּם עַד־הַיּוֹם הַזֶּה׃16טז אַךְ כַּאֲשֶׁר יָשׁוּב יִשְׂרָאֵל אֶל־הָאָדוֹן אָז הַמַּסְוֶה יוּסָר׃17יז וַאֲדֹנֵינוּ הוּא הָרוּחַ וּמִי אֲשֶׁר־בּוֹ רוּחַ אֲדֹנֵינוּ חָפְשִׁי הוּא׃18יח וַאֲנַחְנוּ כֻלָּנוּ בְּלִי מִכְסֶה עַל־פָּנֵינוּ רֹאִים כְּבוֹד אֲדֹנֵינוּ כְּמוֹ בִרְאִי מוּצָק וְצַלְמֵנוּ יְשֻׁנֶּה יִדְמֶה לַצֶּלֶם הַהוּא וְיַעֲלֶה מִכָּבוֹד אֶל־כָּבוֹד מִלִּפְנֵי אֲדוֹן הָרוּחַ׃