YOB21
Yob Lakple Aadiki Kanya
1Ninfɛ di Yob ladiki kanya alɛ:2“Bilolaa atoko bikyɔɔ di sɛlaa nii suoto;bita nle mmle dile kɔnɛɛ okpee kaafutu ɔlaa wɔ biɔtɛɛ ni.3Bitɛ suoto koe, nse kɔkakatɛ,kafɔɔ di lɛkakatɛ nii sɛmaa, bima mi.4“Otii suoto lɛyɔ ɔlaa?Obe oso katɛ suoto?5Binyu mi, diɛbla ye ɔkpɛ;bietika nnɛɛ di nnya lee.6Nse lebu nle mmle disi, lɛyɛkɛ mpɛ mi;ntũtũkũ di suoto nii kamɛ.7Obe oso di batii kpile nsiɛ nkpa,mantoobe di osie lɛma kafɔɔ ntɔɔtaka katoo?8Bɔɔnya mmle diɔlɛ ni babi lɛma ba niɛmana ma beekyi ni,ku banantii lɛma kafɔɔ di anu lɛma.9Atoko ɔkyɛ ole nkpe di ayo lɛma, lɛyɛkɛ kafɔɔ nnaa;Yaa kawesee nwu dietika di suoto lɛma.10Banankyue-suɔtɔ lɛma nnyie basanko lɛma;banankyue lɛma nlofo abi, nfutu nindie ma.11Batii kpile ndiɛ babi lɛma ndie kayi fɛ bafoso;babisɔ lɛma ntũ mankyi.12Mansa sinu di akasa ku sanku kanya;man-nya suoto lɛyɔɔ di kakyukyue didie kanya.13Lɛlɛ kamɛ mansiɛ di alɛɛ lɛma kamɛni mansoo mansifi ɔkya kamɛ nɛ.14Kafɔɔ mantɔkɔ Yaa alɛ, ‘Kyɛ wo di ɔlɔɔkɔ!Diekle wo ɔkɔɔnsɔ alɛ buatofo sisuku lɛfɔ.15Owe ninle Nnwɔ Ninlenke ni alɛ buasumu nwɔ ni?Obe bubawɛ nse buɔpɛ ɔlaa buɔtɔɔ?’16Kafɔɔ lɛsaawɛ lɛma diesi di nnɛɛ lɛma mmu,nioso lɛblasa suoto di batii kpile ɔsaabla suoto.17“Kafɔɔ sɛ̀sɛ di batii kpile kandiɛ nnii?Sɛ̀sɛ di ɔlaa kpile ntũ ma,di ɔsaabla wɔ di Yaa lɛta ni di ɔblɔ nɔɔ kamɛ?18Sɛ̀sɛ bate fɛle sibuu di kɔfɛɛfɔ anu,fɛle sɛsɔ di afɛɛfɔ kplɛ lefiɛ kuosifiko ni?19Mambuɛ alɛ, ‘Yaa nsiisa otii letoko nanfi antɛ babi nɔɔ.’Bita bata otii nwu omu koto, di mmle abatofo nini!20Bita anu nɔɔ amu anya kawɔɔkɔ nɔɔ;bitɔɔ anyi Nnwɔ Ninlenke ni ɔblɔ nwu.21Diekye obe ɛɛyɔ nwu ole di leyo nɔɔ batii suotonse awɛntɛ nɔɔ ya bɛɛtɔɔ ni lɛwa kayɛntɛkɔ?22“Otii owo kafuo lɛsaatofo otuo Yaa,di nnwɔɔ ninkanko ni bia nnwɔ niɛtaka katoo alenke ni?23Otii nkpi di obe wɔ di osie omu nkpe nwɔ nii,andiki suoto atoko ansiɛ, lɛyɛkɛ kafɔɔ nimpɛ nwɔ,24anwɛ suoto nwaa,akufi nɔɔ kamɛ lɛla nwɛ onutũ.25Otii bamba nkpi di ɔklà nɔɔ dibuo kamɛ,diidii atanya suoto lɛyɔɔ di lɛsaa biene kuninwii kamɛ.26Ɔlɔɔkɔ, ɔlɔɔkɔ mante di kudu kamɛ,ni di akukudi ntĩi batii lɛma banyɔ suoto nɛ.27“N-ye lɛsaa le nimuu disi biobu nii,ku osuku kpile wɔ suoto bibabla mi ni dikpile.28Minkaalɛ bilɛ, ‘Ɔfɛ nfɛ di otii kplɛ nwu leyo n-yɛ,akpaayo nwu kamɛ di batii kpile nwu lasiɛ ni?’29Diidii fadikaalɛ mba ninkyɛ ni osuku ɔlaa?Fadifũ nle baanya ni fakpee-30alɛ beediɛ otii kpile nwu di dii kpile nwu suoto,alɛ beediki nwɔ di ɔblɔ ɔnya dii nwu suoto?31Owe ninfuo otii kpile nwu ɔlaa ɔtɔkɔ, anu ku anu?Owe ninanfi nwɔ kootoko ta lɛsaa le ɛɛbla ni oso?32Mantuka nwɔ manaakpee di ɔkya,manta kafɔɔ batii ntoonyu ɔkya nɔɔ suoto.33Kɔtɛ nwu di ɔtaata nwu nkpe nwɔ ni ɔmɛnɛfɛ oso;batii bamuu ntikanko nwɔ,batii ɔlambu manaafuo ni ɔka nle nwɔ katũ.34“Nioso lɛ bibafuo mi kɔnɛɛ okpee kaafutu ku sɛlaakuu lee se mmle?Lɛsalɛsaa diebu di kanya didiki lee nwu, kafɔɔ sɛlaa ku afunu!”The Seed Company