Filipiɛ̃ 1 વાંચો

Filipiɛ̃1

Ɔ̃bio

¹Mɛ̃ wu Pool ye Timote b'asal a Yeso Mãsia, bee eyuɔɔl ɔ̃nkaan wu ola baal bueel ba ngel onse bvoo a bia-byɛ ye Yeso-Mãsia, b'ali ke Filipese. Bee eyuɔɔl ndɛ hɛ̃ ol'ambiri y'ankiaal b'Ebvɔɔn.²Yɔɔl kwɛn Nziã wu Tal a bia-byɛ ye Mfam Yeso Mãsia asio byɛ nyiĩ, awa byɛ opi!

Ãbuɛɛn ã Pool me ndɔɔ akiool ba Filipese

³Ãlio mbueel m'ebeteel mɛ̃ byɛ, mɛ̃ ebebveel Nziã a mɛ̃ ãtuɛɛn.⁴Ãlio mbueel m'ebebuɛɛn mɛ̃ me ndɔɔ a byɛ bueel, mɛ̃ ebebuɛɛn y'esɛ,⁵me ndɔɔ ɔ̃sal wu esi byɛ ye bee m'otsal o Nsia yi Ngesɛ, bɛɛn tsoo li ɛ̃kwel tiil nonɔ̃ ŋã.⁶Taa-taa, mɛ̃ nkiool bam wɛn, wu abɛɛn ɔ̃sal wa ngesɛ wu onse byɛ, anɔɔn a ndɛ tiil k'efa ndɛ me tsoo li oya o Yeso Mãsia.⁷Eli bam ngesɛ kwɛn mɛ̃ nkal y'ãtsam m'obobɔ me ndɔɔ a byɛ bueel. Ke ngwel wɛ, byɛ eli onse ɔ̃kwal a mɛ̃, nzal-a-ŋɛn, byɛ bueel ebɔɔ nyiĩ yi esio Nziã mɛ̃, ekal ŋe ndi mɛ̃ me bwal ŋã, ekal ŋ'etsuun mɛ̃ me ndɔɔ a Nsia yi Ngesɛ, wuo ekal ŋ'esuo mɛ̃ otaa-taa o yɔ.⁸Ke ngwel wɛ, Nziã ndyam oyɛɛ kwɛn, mɛ̃ ndi y'ɔ̃tio a byɛ bueel me dzii e Yeso Mãsia.

⁹Ndɔɔ yi esɔɔ mɛ̃ onse ãbuɛɛn ã mɛ̃, yɛn, dzii e byɛ eyi nkwel onse oyɛɛ b'ãndɔɔ ngesɛ y'ãyal mbueel,¹⁰kwɛn byɛ ekoo k'ebwɛɛl ãndɔɔ mã y'ɔ̃bvɛn. M'emfa okyɛ, byɛ ekieel ekal tsɛ-tsɛ bvool eywɛn elyal me tsoo li oya o Mãsia.¹¹Yeso Mãsia kieel asa kwɛn omwiĩ o byɛ oluul m'ãndɔɔ mã dzu, m'ãwa Nziã dzuun ye lweel.

Oyi o Nsia yi Ngesɛ nkwel

¹²Andoo a mɛ̃, mɛ̃ nzii kwɛn byɛ eyɛɛ wɛn ãndɔɔ m'ãyi me mɛ̃ ãsi kwɛn Nsia yi Ngesɛ eyi nkwel.¹³Ke ngwel wɛ, baal a nzɔ a ɔ̃kwɛn ye b'asiil bueel ayɛɛ wɛn mɛ̃ ndi me bwal me ndɔɔ ɔ̃sal a Mãsia.¹⁴Bvool okuru b'akuru mɛ̃ me bwal owi andoo bibi mpɛn onse Mfam, me ndɔɔ yi atee Endɔɔ e Nziã y'ãŋã, buɔ pyɛ.¹⁵Taa-taa, baal bakyɛ abetee Mãsia me nzal a obɔɔ ye nzal a obel, kɛn a bakyɛ abetee ndɛ m'ãtsam mã ngesɛ.¹⁶Baal b'abetee m'ãtsam mã ngesɛ obɔ, b'asal me dzii. Bɔ ayɛɛ wɛn mɛ̃ ndi ŋã onse bwal me ndɔɔ yi etsweel Nsia yi Ngesɛ.¹⁷Kɛn a baal bakyɛ abetee Mãsia me nzal a obel, ãtsam ã bɔ k'ãli dzu wɛ. Bɔ adzii k'akool fool e mɛ̃ li mbuul a bwal.

¹⁸Ãtsam ã bɔ ãkal mã mfy-mfya wuo mã taa-taa, ndɔɔ pyɛ! Ki nguo kyɛn, abetee Mãsia. Mɛ̃ esia mpaa me ndɔɔ oyɔ. Mɛ̃ bvool ekieel esia mpaa.¹⁹Ke ngwel wɛ, mɛ̃ ngyɛɛ wɛn, ãndɔɔ omɔ̃ mbueel ã̀siɛɛn k'obvuul o mɛ̃, m'ãbuɛɛn ã byɛ y'owuaal b'ewuaal Ɔ̃fel a Yeso Mãsia.²⁰Ke ngwel wɛ, mɛ̃ ebekiaal ãmfuru-mva bvool ndi ye kaã wɛn, mɛ̃ k'èbɔɔ opfuru me ndɔɔ si ngamɔ̃ wɛ. Kɛn a meba, wuo ãlio mbueel, mɛ̃ ndi ye kaã lam wɛn, lweel e Mãsia èmɔɔn me mɛ̃, ekal m'omwiĩ, ekal m'epfu e mɛ̃.²¹Ke ngwel wɛ, me b'otal mɛ̃, elaã eli Mãsia, epfu eli bvel.²²Kɛn a ŋɛn mɛ̃ nkoo k'ekal mwiĩ me nsie ŋã, mɛ̃ nkoo k'esa kwɛn ɔ̃sal a mɛ̃ aburu nsia. Kɛn onse oŋɔ̃, mɛ̃ ke ngyɛɛ ki esuaal mɛ̃ wɛ.²³Adzuru mɛ̃ ngwel-a-ngwel: Mɛ̃ nzii k'esiil ɔ̃kiri bvool eyekal ye Mãsia, ke ngwel wɛ oyɔ ndɔɔ yi enduru obvie!²⁴Kɛn a me ndɔɔ a byɛ, ndɔɔ yi enduru ɔ̃bvɛn yi ekal mɛ̃ kɛn me nsie ŋã!²⁵Mɛ̃ ndi ye kaã olɔ, mɛ̃ ngyɛɛ wɛn mɛ̃ kɛn èkal mwiĩ bvool èkal ye byɛ bueel, kwɛn byɛ ekwel bvool ekal y'esɛ onse okiool.²⁶Obobɔ, ŋ'ekieel eyebvool mɛ̃ ola byɛ, byɛ ekal y'obɛɛl o ntwel me ndɔɔ a mɛ̃ onse bvoo a byɛ ye Yeso Mãsia.

²⁷Oŋɔ̃ edzuu m'emfa ki etam Nsia yi Ngesɛ yi Mãsia. Obobɔ, okɛɛn mɛ̃ ngyi byɛ otal, wuo ŋɛn mɛ̃ ke ndi ye byɛ wɛ, mɛ̃ ngyoo ndiri byɛ esɛn ãnã m'ãtsam ngãmɔ̃, bvool ebedzwaan bvoo onse ɔ̃fel ngɔmɔ̃ me ndɔɔ a Nsia yi Ngesɛ yi ékiool byɛ.²⁸Ebee ataal a byɛ obal si ekal me ndɔɔ yam ke mã. Me ndɔɔ a bɔ, okyɛ eli eliĩ ki odziɔɔn o bɔ. Kɛn a me ndɔɔ a byɛ, okyɛ eli eliĩ ki obvuul o byɛ, b'ofi ola Nziã.²⁹Ke ngwel wɛ, me b'otal Mãsia, Nziã k'asio byɛ nyiĩ kɛn a me ndɔɔ yi ekiool ndɛ wɛ, eli hɛ̃ me ndɔɔ yi emwɛn fool me ndɔɔ a ndɛ.³⁰Meba ŋã, byɛ ebedzwaan mvel yiyi yi émwɛn byɛ ola mɛ̃, yɛn meba ŋã, byɛ ebeyoo ndiri mɛ̃ kɛn ebedzwaan yɔ.

Wycliffe Bible Translators, Inc.

https://app.library.bible/content/3840a1950e7b8532