أَعْمَالْ 25 વાંચો

أَعْمَالْ25

بُولِسْ قُدَّامْ الحَاكِمْ فَسْتُوسْ

¹ثْلَاثَة أَيَّامْ بَعْدْمَا وَلَّى فَسْتُوسْ وَالِي، مْشَى مِنْ قَيْصَرِيَّة لْأُورْشَلِيمْ.²وجَاوْهْ كْبَارْ الكَهَنَةْ وأَعْيَانْ اليْهُودْ وشْكَاوْ بْبُولِسْ،³وطَلْبُوا مِنُّوا بَاشْ يَعْمِلْ عْلِيهُمْ مْزِيَّةْ ويْرَجَّعْ بُولِسْ لْأُورْشَلِيمْ، عْلَى خَاطِرْهُمْ كَانُوا عَامْلِينْلُو خُطَّة بَاشْ يُقْتْلُوهْ فِي الثْنِيَّة.⁴جَاوِبْهُمْ فَسْتُوسْ بِلِّي بُولِسْ بِشْ يِبْقَى تَحْتْ الحِرَاسَةْ فِي قَيْصَرِيَّة، ولِّي هُوَّ بِيدُو بِشْ يِرْجْعِلْهَا عْلَى قْرِيبْ.⁵وقَالْ: «خَلِّي قَادِتْكُمْ يِمْشِيوْ مْعَايَا. وإِذَا كَانْ الرَّاجِلْ هَاذَا مُذْنِبْ مَا عْلِيهُمْ كَانْ يِشْكِيوْ بِيهْ قُدَّامِي».

⁶وعَدَّى فَسْتُوسْ مْعَاهُمْ يْجِي ثْمَنْيَة وَلَّا عَشْرَة أَيَّامْ، ورْجَعْ لْقَيْصَرِيَّة. ومِنْ غُدْوَة قْعَدْ عْلَى كُرْسِيهْ فِي المَحْكْمَة، وعْطَى أَمْرْ بَاشْ يْجِيبُوا بُولِسْ.⁷ووَقْتِلِّي جَاء، دَارُوا بِيهْ اليْهُودْ الِّي جَاوْ مِنْ أُورْشَلِيمْ، وتِهْمُوهْ بْبَرْشَة تُهَمْ خْطِيرَة مَا نَجْمُوشْ يِثْبْتُوهَا عْلِيهْ.⁸ودَافِعْ بُولِسْ عْلَى رُوحُو وقَالْ: «آنَا مَا عْمَلْتْ حَتَّى ذَنْبْ فِي حَقْ شَرِيعِةْ اليْهُودْ، ولَا فِي حَقْ الهَيْكِلْ ولَا القَيْصِرْ».⁹لَكِنْ فَسْتُوسْ حَبْ يْرَضِّي اليْهُودْ، يَاخِي سْإِلْ بُولِسْ: «تْحِبْشِي تِمْشِي لْأُورْشَلِيمْ، وتِتْحَاكِمْ قُدَّامِي عَالتُّهَمْ هَاذُمْ؟».¹⁰جَاوِبْ بُولِسْ: «آنَا وَاقِفْ فِي مَحْكْمِةْ القَيْصِرْ، ويِلْزِمْ نِتْحَاكِمْ فِيهَا. آنَا مَا غْلُطِّشْ فِي حَقْ اليْهُودْ وإِنْتِ تَعْرِفْ هَاذَا مْلِيحْ.¹¹كَانْ جِيتْ عْمَلْتْ جْرِيمَةْ تِسْتْحَقْ الإِعْدَامْ، مَا كُنْتِشْ بِشْ نِتْهَرِّبْ مِالمُوتْ. آمَا مَادَامْ التُّهَمْ مْتَاعْ النَّاسْ هَاذُومْ مَاهِيشْ صْحِيحَة، مَالَا حَتَّى حَدْ مَا عَنْدُو الحَقْ يْسَلِّمْنِي لِيهُمْ بَاشْ يْحَاكْمُونِي. آنَا بِشْ نِسْتِينِفْ دَعْوْتِي لِلْقَيْصِرْ».¹²وتْشَاوِرْ فَسْتُوسْ مْعَ المُسْتَشَارِينْ مْتَاعُو وقَالُّو: «طْلَبْتْ بَاشْ تِسْتِينِفْ لِلْقَيْصِرْ، مَالَا بِشْ تِمْشِي لِلْقَيْصِرْ».

أَغْرِيبَاسْ وبَرْنِيكِي

¹³وبَعْدْ أَيَّامَاتْ، جَاء المَلِكْ أَغْرِيبَاسْ وأُخْتُو بَرْنِيكِي لْقَيْصَرِيَّة بَاشْ يْسَلْمُوا عْلَى فَسْتُوسْ.¹⁴بَعْدْمَا قَعْدُوا مُدَّة، حْكَى فَسْتُوسْ لِلمَلِكْ عْلَى قَضِيَّة بُولِسْ وقَالْ: «فَمَّة رَاجِلْ خَلَّاهْ فِيلِكْسْ فِي الحَبْسْ.¹⁵وآنَا فِي أُورْشَلِيمْ، شْكَاوْ بِيهْ كْبَارْ الكَهَنَةْ وشْيُوخْ اليْهُودْ، وطَلْبُوا مِنِّي بَاشْ نُحْكُمْ عْلِيهْ.¹⁶وقُلْتِلْهُمْ الِّي مُشْ مِنْ عَادِةْ الرُّومَانْ يُحْكْمُوا عْلَى وَاحِدْ، قْبَلْ مَا يِتْوَاجَهْ مْعَ الِّي شَاكِينْ بِيهْ، بَاشْ تْكُونْ عَنْدُو فُرْصَة يْدَافِعْ عْلَى رُوحُو.¹⁷ووَقْتِلِّي جَاوْ مْعَايَا لْهُونِي، مَا ضَيَّعْتِشْ الوَقْتْ ومِنْ غُدْوَة عْمَلْتْ جَلْسَة فِي المَحْكْمَة، وعْطِيتْ الأَمْرْ بَاشْ يْجِيبُوهْ.¹⁸وَقْتِلِّي قَابْلُوهْ الِّي شَاكِينْ بِيهْ، مَا قَالُوا حَتَّى تُهْمَة مِالتُّهَمْ الِّي كُنْتْ مِتْوَقَّعْهُمْ.¹⁹آمَا نَاقْشُوهْ فِي حَاجَاتْ تْخُصْ دِينْهُمْ، وتْخُصْ رَاجِلْ إِسْمُو يَسُوعْ، مَاتْ وبُولِسْ يْقُولْ الِّي هُوَّ حَيْ.²⁰يَاخِي حِرْتْ كِيفَاشْ نُحْكُمْ فِي القَضِيَّة هَاذِي، وسْإِلْتْ بُولِسْ إِذَا كَانْ يْحِبْ يِمْشِي لْأُورْشَلِيمْ بَاشْ يِتْحَاكِمْ غَادِي.²¹آمَا بُولِسْ طْلَبْ بَاشْ يِسْتِينِفْ قَضِيَّتُو قُدَّامْ القَيْصِرْ، وَلِّيتْ أْمَرْتْ بَاشْ يِبْقَى تَحْتْ الحِرَاسَةْ حَتَّى لِينْ نَبْعَثْهُولُو».²²يَاخِي قَالْ أَغْرِيبَاسْ لْفَسْتُوسْ: «مَذَابِيَّا نِسْمْعُوا الرَّاجِلْ هَاذَا». جَاوْبُو: «غُدْوَة تِسْمْعُو».

²³ومِنْ غُدْوَة، جَاء المَلِكْ أَغْرِيبَاسْ وبَرْنِيكِي فِي مَوْكِبْ عْظِيمْ، ودَخْلُوا لِلمَحْكْمَةْ دَايْرِينْ بِيهُمْ قَادِةْ العَسْكِرْ وأَعْيَانْ المْدِينَة. وفَسْتُوسْ عْطَى الأَمْرْ بَاشْ يْجِيبُوا بُولِسْ.²⁴وقَالْ فَسْتُوسْ: «يَا أَغْرِيبَاسْ المَلِكْ، ويَلِّي حَاضْرِينْ مْعَانَا الكُلْ، قُدَّامْكُمْ الرَّاجِلْ الِّي شْكَاوْ بِيهْ اليْهُودْ الكُلْ فِي أُورْشَلِيمْ وهْنَا، وكَانُوا يْصِيحُوا: "مَا يِلْزْمُوشْ يِبْقَى حَيْ".²⁵آمَا آنَا شُفْتْ الِّي هُوَّ مَا عْمَلْ حَتَّى شَيْ يِسْتْحَقْ عْلِيهْ المُوتْ. آمَا هُوَّ اسْتِينِفْ دَعْوْتُو لْجَلَالِةْ القَيْصِرْ، وآنَا قَرَّرْتْ نَبْعِثْهُولُو.²⁶آمَا مَا عَنْدِيشْ حَاجَة وَاضْحَة نِكْتِبْهَا لِلْقَيْصِرْ. هَاذَاكَا عْلَاشْ جِبْتُو قُدَّامْكُمْ وبِالأَخَصْ قُدَّامِكْ إِنْتِ يَا المَلِكْ أَغْرِيبَاسْ، بَاشْ نَلْقَى شْنُوَّة نِكْتِبْ بَعْدْمَا يِتْحَقِّقْ مْعَاهْ.²⁷عْلَى خَاطِرْ مُشْ مَعْقُولْ نِبْعَثْ مَرْبُوطْ، مِنْ غِيرْ مَا نِكْتِبْ بَاشْ تَاهْمِينُو بِالضَّبْطْ».