MASMUR56yva_tbl

Inanaveano Amisye amen arono sya marova wo inawatan

1Daud apa ransyerano Masmur po ratoe, arono vatano Pilistin wo aijar no munijo Gat.Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Insani punam no no inyo akoe tarbantinno waravaimbe rai.’’
2Sya Amisy, syare naemeno rinai,weye vatane wo rinataka doyadi,masyote anteter umarovave rinai muno wo inatawanto.3Masyote anteter sya marova wo inataka doyadi tutir,vatano umarovave rinai umaso wanui rave.4Arono rui rijaniv,risyamo inanaveano Wibuiny namen.5Rikangkamambe Amisy Ai Apa urairi rai,Amisye obo pirati inanaveano amen, weti ijanive ramu.Weti vatano are pirati indati po ana ngkakai inta raveti nande rinai jakato?
6Masyote anteter sya marova wo sya ana datore rangkaunanive,wo kakai ratantona rinai tutir.7Onawamo ukaokaibe ti wo inaman,inawanto no rui ruijamo wo inanyanyuti,muno wo varoro mamaisye rakani indamu wo inaubaisy.8Awa ana udave ti ngkakai mamo indati upaya ama mangke rai rako?Sya Amisy, syare Nyo Nya pari mangke veano vatano wanave Nai jewene mapinde.9Masyoto sya marova wo rinawatambewe mainyamo Winyo raen muno Nyo rator,inami ngkaru ma manui mamo Winyi Nyo raen.Ana nande rinaive umaso mainyamo Nyo ratoevea rako?10Arono syo winawain weamo sya marova wansuk,weye syo raen tugae, Amisy Nyo marimbe rinai.11Amisye obo pirati rikangkamambe Apa urairi rai,tugae, AMISY, obo pirati rikangkamambe Apa urairi rai.12Amisye obo pirati inanaveano amen, weti rijanive ramu.Weti vatano are pirati indati po ana ngkakai inta raveti nande rinai jakato?
13Sya Amisy, sya urairi syo raokae nande Winai mamo indati syo raveti mamaisy,muno syo anakotare rameseo Winai, mbe rarorombe syo kove raura seo Nai.14Weye Winyo rinapaya irati wene rai to,Winyi Nyo rinayaranande weti marova wo inapinde jewen.Wirati syanya no mine so, no Amisye Winui,no irati Nya varo kov mo rinaveti rijayaisye rai.
expand_more
Search