HESEKIEL46
Ɔka Ku Ayi Ole
1“ ‘Nnya ɔlaa wɔ di SAATE Kplɛ nwu kobuɛ ni alɛ: Basɛɛ kaflɔnkɔ ka kaamɛ niɛkyɔɔ ni anu kufĩkatunkɔ di ayi akuɔ ya mambla ni ɔkpɛ suoto. Kafɔɔ basɛkɛtɛ ka di Lɛnyɛɛtɛyi ku Kɔwɛntɛ Fɔle dii suoto.2Ɔka nwu afe di kayoko nwu lɛkpata di kayi lɛkyɛ abuo aalaayila di kayokontũ nwu owoso ɔlɔɔkɔ. Di olebatatɛ nwu bayɔ ofiɛ asaaɔta nɔɔ ku atoko ɔkyɛ ole asaaɔta nɔɔ bata ole. Dikpeni eesumu di kayoko nwu kayokontũ kanya, nse atodie eesifi kafɔɔ, blɔbasɛɛ kayoko nwu diɛlaase di kɔtɔɔfɔ.3Dikpeni kasɔ nwu batii lesumu di Anyɛɛtɛyi ku Awɛntɛ Fɔle suoto di SAATE nwu anu di kayoko ka mmle katũ.4Ofiɛ asaaɔta ya di ɔka nwu kamawako ni SAATE nwu di Lɛnyɛɛtɛyi suoto ale afosobi-suɔtɔ akuɔ ku dikunumuu ninwii, di bamuu nnaa ni kɔbɔ.5Kamɔɔ asaaɔta ya manta mankyakaa ni di dikunumuu suoto ale kankyi onwii ku kamɔɔ asaaɔta ya ninkyakaa ni di afosobi nwu suoto di lɛpɔ le kanya eenyu alɛ aafuo ni ɔta. Diɛkyakaa ni di nnɔfɔ abo ana diɛta ni kamɔɔ kankyi biala suoto.6Di Kɔwɛntɛ Fɔlɛ dii suoto yi, ata lɛnankyuebi-suɔtɔ ninwii, afosobi akuɔ ku dikunumuu ninwii, di bamuu nnaa ni kɔbɔ.7Dikpeni ɛɛta kamɔɔ kankyi onwii diɛkyakaa di nankyue-suɔtɔ suoto fɛ alesaa asaaɔta, kankyi onwii akyakaa di dikunumuu nwu suoto, ku afosobi nwu di lɛpɔ le oomiɛ alɛ ata akyakaa ni ku nnɔfɔ abo ana di kamɔɔ kankyi biala suoto.8Nse ɔka nwu lebuo yi, afe di kayoko nwu lɛkpata kamɛ, aafe nkpo okle kafɔɔ adie.9“ ‘Nse kasɔ nwu batii lɛwa SAATE nwu anu di ayi ole ya beediki bɛɛtɛ bɛɛta ni ole suoto, ni otii lele niefe di katookasɔ kayoko eebuo alɛ oosumu yi, aafe di kalakasɔ kayoko adie; olele kafɔɔ niefe di kalakasɔ kayoko eebuo yi, afe di katookasɔ kayoko adie. Kuonwii atampɛ aakple aafe di kayoko ka kamɛ aafe aabuo ni kamɛ, kafɔɔ obiala afe di kayoko nyɔɔfa kamɛ adie.10Dikpeni ɔka nwu lesiɛ kaamɛ lɛma, ambuo kamɛ nse beebuo kamɛ, andie kafɔɔ nse boodie.11“ ‘Di ayi ole ku ayi ya beediki bɛɛtɛ bɛɛta ni ayi ole nlekɔ yi, alesaa asaaɔta ale kamɔɔ kankyi ku nankyue-suɔtɔ onwii, kamɔɔ kankyi ku lefosobi ninwii, ku afosobi fɛ mmle omiɛ alɛ ata ni kanya, diɛkyakaa ni di nnɔfɔ abo ana di kamɔɔ kankyi biala suoto.12Nse ɔka nwu lɛwako otu fãa asaaɔta ɛɛta SAATE nwu- kuntɛ ofiɛ asaaɔtɔ ee atoko ɔkyɛ ole asaaɔta ale yi- baasɛkɛtɛ kayoko ka niɛkyɔɔ ni anu kufĩkatunkɔ batɔɔ. Abata ofiɛ asaaɔta nɔɔ ee atoko ɔkyɛ ole asaaɔta nɔɔ fɛ mmle ambla ni di Anyɛɛtɛyi suoto. Nni kamaa abadie, nse eedie yi, baasɛɛ kayoko nwu.Dii Biala Asaaɔta
13“ ‘Dikpeni fɛɛta lefosobi le nintoofũ ni lɛlɛɛ ninwii dinaa ni kɔbɔ dii biala diɛta ni ofiɛ asaaɔta fɛɛta SAATE nwu; fabata ni olesɛ biala.14Dikpeni olesɛ biala kafɔɔ fɛɛta alesaa asaaɔta ku nni, di nnaafũ kankyi nkyakaa ni ku nnɔfɔ abo ana, babayɔ mambakaa ni nnaafũ nwu. Alesaa asaaɔta ya mmle ɔbla ɔta SAATE nwu nle ɔsaabla wɔ nimate ni dinaa ni kaloo.15Nioso babata lefosobi ku alesaa asaaɔta nwu ku nnɔfɔ olesɛ biala manta ofiɛ asaaɔta obe lele.Ɔka Ku Kasɔ Nwu
16“ ‘Nnya ɔlaa wɔ di SAATE Kplɛ nwu kobuɛ ni alɛ: Nse ɔka lɛta lɛsaa eekyeko atesaa nɔɔ kamɛ ɛɛta babisuɔtɔbi nɔɔ onwii yi, ni dibale banantii nɔɔ kafɔɔ lele; dikpeni diele lɛsaawɛ lɛma di atesaa kanya.17Nse kafɔɔ ɛɛbla lɛtasaa eekyeko atesaa nɔɔ kamɛ ɛɛta bakpɛmblatɛ nɔɔ onwii lɛma yi, ni kpɛmblatɛ nwu kamaklee ni ninaase di suoto osiɛko lɛlɛɛ kamɛ; nse ditoomunikĩi diesifi ɔka nwu ɔkyɛ. Atesaa nɔɔ nle babisuɔtɔbi nɔɔ lete ale; ale lete lɛma ale.18Dinaa alɛ ɔka lefũ batii nwu atesaa kuninwii ninnɛɛ lɛma, antososa ma di lɛsaawɛ lɛma suoto. Dikpeni ɛɛta babisuɔtɔbi nɔɔ atesaa lɛma eekyeko lɛsaawɛ nɔɔ nimu kamɛ, di mmle manaafũ ni otii nii kuonwii lɛsaawɛ ninnɛɛ nɔɔ.’ ”Olekatakɔ Nwu Ɔtɔ Nkutaakɔ
19Ninfɛ di osuɔtɔ nwu lakpaa mi aafenko di kayoko ka niate ni di koyoe klekle nwu kayoko ɔlɔɔkɔ niakyɔɔ ni anu katookasɔ, n-ya ninle ni olebatatɛ ale, ni aatuo mi lɛba di kufĩkamɛɛkɔ lɛkyɛ nɛ.20Ni aatɔkɔ mi alɛ, “Nnya lɛbale di olebatatɛ kamawa ni lɛpɔɔ okpi asaaɔta ku okpile asaaɔta, manfiɛ ni kafɔɔ alesaa asaaɔta bloblo, di mmle manaayɔ nya bawako ni kaflɔnkɔ ka di kayi lɛkyɛ alɛ baakleklesa ni batii nwu.”21Ninfɛ aakpaa mi aawako kaflɔnkɔ ka di kayi lɛkyɛ, aaleko mi katũ aakyiko akɔ nwu ana, ni lanya kaflɔnkɔ bamba di lɛkɔ biala kamɛ nɛ.22Nflɔnkɔ biibii lawɛ di kayi lɛkyɛ nflɔnkɔ nwu akɔ ana kamɛ lɛkaana labla nkpaa afosi-akuɔ-nnɛ lɛblɛfɛ kafɔɔ labla nkpaa afosi-ana-nnɛ; kaflɔnkɔ nwu biala di akɔ ana nwu nimuɔ lale ninwii.23Afuɔnkyikye lawɛ di nflɔnkɔ nwu nna biala kamɛ diakyi, ku abaya baatofo baakpee baakyisa ni nimuu di afuɔnkyikye nwu kalɔ baata ni ɔtɔ okutaa.24Ni aatɔkɔ mi alɛ, “N-ya mmle ninle ɔtɔ nkutaakɔ be di batii ba nimbla ni kasumu ɔkpɛ di olekatakɔ nwu kamawa ni batii nwu oleɔta alesaa.”The Seed Company