لوقا14
1ئِجّن ن نْهَار ن سّبْث ن لْعِبَادَا يرُوْح عِيْسَى يُوْذف ثَدَّارْث ن يِجّن زݣ يمقّْرَانن ن ڒْحِزب ن يفَرِّيسِيْين حمَا اَذ يشّ اَغْرُوْم، نِثْنِي حطَّان-ث.2ذِنِّي زَّاثس يجّن ن ورْيَاز يهْڒش ذَايس ثُوفّت.3ينَّا-ٱسن عِيْسَى إِ يِنِّي يتْشرَّاحن شَّرِيعَا ذ يِنِّي زِي ڒْحِزب ن يفَرِّيسِيْين: "مَا حَلَال اَذ يتْوَاسْݣنْفَا بْنَاذم ذِي نْهَار ن لْعِبَادَا مَا لَّا؟"4نِثْنِي سْقَارن وَاهَا. أُوْشَا عِيْسَى يسْقَارّب-يث-يذ غَارس يسْݣنْفَا-ث، ينَّا-ٱس إِيوَا رُوْح.5ئِنْدق-د عِيْسَى ينَّا-ٱسن: "مڒَا شَان يِجّن زَّايْوم يوْضَا-يَاس مِّيس نِغ ذ اَينْدُوْز نّس ذݣ وَانُو ذِي نْهَار ن سّبْث ن لْعِبَادَا، مَا وَار ثِيذ يسِيڒِي شَا ذغْيَا نِغ لَّا؟"6نِثْنِي ؤُݣِين اَث جَاوْبن خ مَانَايَا.7عِيْسَى وَامِي يُوْفَا ذِنِّي يِنِّي يتْوَاعَرْضن قِّيمن رزُّوْن خ يمُوْشَان يمزْوُوْرَا غَار مِيسَّا، ئِبْذَا يسَّاوَاڒ اَكِذْسن س يِجّن ن ڒْمَعْنَا ينَّا-ٱسن:8"مڒَا يعَرض-يش شَان يجّن غَار يِجّن ن ڒْفَارْح، وَار تْغِيمَا شَا شك ذݣ ومْشَان اَمزْوَارُو؛ لَّا، ئِمْكن عَرْضن شَان يجّن غَارس لْقِيمَا كْتَار زَّايك.9أَغَارك د يَاس ونِّي إِي خَاوم يعَرْضن اَذَاش يِينِي ؤُش-اَس اَمْشَان نّش إِ وَانِيتَا! أَتَاف اَذ تْسذْحِيذ اَذ تكَّرذ اَذ تْرَاحذ غَار ومْشَان اَنݣَّارُو.10لَّا، مڒَا عَرْضن خَاك، رُوْح قِّيم ذݣ ومْشَان اَنݣَّارُو. أَغَارك د يَاس ونِّي إِي ش يعَرْضن اَذَاش يِينِي آي اَمدُّوْكڒ ينُو ݣَعّذ ذِيْهَا. أَتَاف اَذ تمْغَرذ غَار مَارَّا يِنِّي يتْوَاعَرْضن.11ڒَاحقَّاش ونِّي يسمْغَارن يخف نّس، أَتَاف اَذ يِيڒِي ذ اَمزْيَان. ونِّي يسمْزَاين يخف نّس، أَتَاف اَذ يِيڒِي ذ اَمقّْرَان."12ينَّا-ٱس عِيْسَى إِ ونِّي إِي ث يعَرْضن: "مڒَا ثݣِّيذ اَمشْرِي نِغ ذ اَمنْسِي، وَار عَرّض شَا خ يمدُّوْكَاڒ نّش نِغ ذ اَيْثْمَاش نِغ ذ فَامِلْيَا نّش نِغ ذ جِّيرَان يدْجَان ذ تْوَاجَر مِينْزِي مڒَا عَرْضن-ش ؤُڒَا ذ نِثْنِي، أَتَاف وَار غَارك بُو لْأَجَار خ مَانَايَا.13لَّا، مڒَا ثݣِّيذ زَرّْدث عَرض خ ڒْمُسَاكِين ذ ينشْرُوْفن ذ يزحَّافن ذ يضَرْغَاڒن.14سَّعْذ نّش عْلَاحقَّاش وَار غَارْسن مِينْزِي ش غَا خدْجْسن. أَتَاف اَذَاش يتْوَاخْڒف ذِي نْهَار نِّي خْمِي د غَا كَّرن زِي ڒْموْث يِنِّي يدْجَان نِيشَان."15ئِكَّر يجّن زݣ يِنِّي يتْوَاعَرْضن يسْڒَا إِ وَاوَاڒ نِّي ينَّا-ٱس إِ عِيْسَى: "سَّعْذ ن ونِّي إِي غَا يشّن اَغْرُوْم ذِي ڒْمُلْك ن أَربِّـي!"16ينَّا-ٱس عِيْسَى: "ئِجّن ن ورْيَاز يݣَّا اَمنْسِي ذ اَمقّْرَان يعَرض خ وَاطَّاس ن يِوْذَان.17ئِسّكّ اَخدَّام نّس ذِي ڒْوقْث ن ومنْسِي إِ يِنِّي خف يعَرض بَاش اَذَاسن يِينِي: أَرَاحم-د اَقَا كُڒْشِي يوْجذ!18مَارَّا إِذْسن بْذَان تݣّن سَّبَاب بَاش وَار تْرِيحن شَا. ذ اَمزْوَارُو ينَّا-ٱس يجّن: نش سْغِيغ يجّن ن ومَرْجع يتْخصَّا-ٱيِي اَذ رَاحغ اَث ࢲرغ، سَامح-اَيِي.19ينَّا-ٱس يجّن عَاوذ: نش سْغِيغ خمْسَا ن ثْيُوْيَا ن يفُوْنَاسن. ڒخُّو اَذ رَاحغ حمَا اَثن قدْجْبغ، سَامح-اَيِي.20ينَّا-ٱس يجّن نّغْنِي: نش ؤُوِيغ يجّن ن ثمْغَارْث، خ مَانَايَا وَار زمَّرغ اَذ د اَسغ.21ئِذْوڒ-د وخدَّام نِّي غَار سِيذس يعَاوذ-اَس مِين يوقْعن. ڒخْدّنِّي يغْضب بَاب ن ثدَّارْث ينَّا-ٱس إِ وخدَّام نّس: فّغ ذغْيَا غَار شَّوَارِع ذ زْنَاقِي، سِيذف-د ڒْمُسَاكِين ذ ينشْرُوْفن ذ يضَرْغَاڒن ذ يزحَّافن.22ينَّا-ٱس وخدَّام: أَقَايِي ݣِّيغ مِين ذَايِي ثنِّيذ آ سِيذِي وَلَكِن عَاذ قِّيمن يمُوْشَان خْوَان.23ينَّا-ٱس سِيذس: فّغ غَار يبْرِيذن ذ يمسْرُوْقن، سِيذف-د يوْذَان س بزّز بَاش اَذ اَذْفن بَاش اَذ تْعمَّر ثدَّارْث ينُو.24أَذَاوم ينِيغ: ؤُڒَا ذ يجّن زݣ يِنِّي إِي خف عَرْضغ وَار يتْقِيسِي اَمنْسِي ينُو!"25ذِنِّي اَطَّاس ن ڒْغَاشِي ݣُّوْرن اَك عِيْسَى، ئِنقْڒب-د غَارْسن ينَّا-ٱسن:26"ونِّي غَارِي د يتَاسن نش، مڒَا يعِيزّ خَاس بَابَاس كْتَار زَّايِي نش نِغ ذ يمَّاس نِغ ذ ثمْغَارْث نّس نِغ ذ ثَارْوَا نّس نِغ ذ اَيْثْمَاس نِغ ذ سْوِيثْمَاس نِغ ذ يخف نّس، أَتَاف وَار يزمَّر اَذ يِيڒِي ذ اَمحْضَار ينُو. 27ونِّي يرزُّوْن اَذَايِي يذْفَار وَار يكسِّي شَا صَّلِيب نّس مِيخ غَا يعدّب، أَتَاف وَار يزمَّر اَذ يِيڒِي ذ اَمحْضَار ينُو.28مڒَا شَان يجّن زَّايْوم يرْزُو اَذ يبْنَا صُّوْمْعث، ئِتْخصَّا-يَاس ذ اَمزْوَارُو اَذ يݣّ ڒحْسَاب مشْحَاڒ مِينْزِي غَا ثنْقَام مَا يزمَّر-اَس ٱت يكمّڒ مَا لَّا.29مَاشِي اَذ يݣّ دْسَاس وَاهَا، صُّوْمْعث نِّي وَار يزمَّر شَا اَت يكمّڒ. يِنِّي إِي ذَايس يخزَّارن اَتَاف مَارَّا اَخَاس ضحْشن،30أَذ ينِين قَا اَرْيَاز-أَ يبْذَا يبنَّا وَلَكِن وَار يزمَّر شَا اَت يكمّڒ.31أَزدْجِيذ، مڒَا يرُوْح اَذ يݣّ ڒْحَرْب اَك يِجّن ن وزدْجِيذ نّغْنِي، ئِتْخصَّا-يَاس ذ اَمزْوَارُو اَذ يفكَّر مَا ٱذ يرْبح ڒْحَرْب نِّي س عشْرَاڒَاف ن ڒْعَسْكَار ڒْعَذُو نّس غَارس عِشْرِين اَڒَاف ن ڒْعَسْكَار.32مڒَا وَار ذَاس يزمَّر شَا، أَغَارس يسّكّ نُّوْيَاب نّس نتَّا عَاذ يݣّْوج وَار د يُوْوِيض شَا بَاش اَزَّايس تَّارن مَامْش غَا ݣّن اَذ عذْڒن جَارَاسن.33أَمنِّي عَاوذ وَار يزمَّر شَا ؤُڒَا ذ يجّن زَّايْوم اَذ يِيڒِي ذ اَمحْضَار ينُو إِلَّا مڒَا يسْمح ذِي مَارَّا مِين غَارس.34ڒمْڒح ثْصدْجَاح، وَلَكِن مڒَا يرُوْح-اَس لْمَذَاق نّس، مَامْش ذَاس غَا نݣّ اَذَاس ثِيذ نَارّ؟35أَتَاف وَار ثْصدْجَاح لَّا إِ ثْمُوْرْث لَّا إِ ثْزوْبَايْث، غِير اَت نْضَرن غَار بَرَّا وَاهَا. صنّط مْلِيح آ ونِّي يتْسْڒَان."
Wycliffe Bible Translators, Inc.