Basahin ang 𐴔𐴝𐴌𐴑𐴟𐴏𐴢 6

𐴔𐴝𐴌𐴑𐴟𐴏𐴢6

𐴕𐴝𐴏𐴝𐴥𐴌𐴝𐴃𐴡𐴃𐴢 𐴀𐴞𐴏𐴝𐴤𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥

¹𐴀𐴞𐴏𐴝𐴤 𐴈𐴠𐴥𐴕𐴃𐴟 𐴕𐴠𐴦𐴓𐴞 𐴕𐴞𐴎𐴡𐴌 𐴖𐴡𐴃𐴡𐴥𐴕𐴡𐴃𐴢 𐴀𐴝𐴙𐴐𐴧𐴠𐴥, 𐴉𐴟𐴥𐴖𐴝𐴣𐴃𐴞 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴀𐴡𐴥 𐴒𐴞𐴀𐴓𐴢.²𐴀𐴝𐴦𐴌 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴙𐴐𐴧𐴠𐴥 𐴌𐴝𐴥𐴌, 𐴀𐴞𐴥𐴁𐴝𐴘𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴝𐴔𐴧𐴟𐴥𐴑 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴞𐴀𐴕 𐴇𐴡𐴕𐴃𐴟𐴤 𐴐𐴞𐴥𐴑𐴧𐴠؟ 𐴀𐴞𐴁𐴝𐴤𐴌𐴠 𐴊𐴞𐴦𐴘𐴝 𐴒𐴞𐴘𐴠𐴥 𐴊𐴠 𐴇𐴞𐴥𐴀𐴕 𐴇𐴡𐴕𐴊𐴞𐴓𐴧𐴝 𐴒𐴞𐴘𐴝𐴕؟ 𐴀𐴞𐴁𐴝𐴤𐴘𐴠 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴀𐴕 𐴑𐴞𐴦 𐴑𐴠𐴌𐴝𐴔𐴡𐴃؟³𐴀𐴞𐴁𐴝𐴤 𐴑𐴞𐴥 𐴔𐴞𐴏𐴃𐴞𐴥𐴌𐴞 𐴕𐴡, 𐴎𐴞𐴁𐴝𐴤 𐴔𐴡𐴌𐴞𐴘𐴝𐴔𐴡𐴌 𐴉𐴟𐴖𐴝 𐴀𐴝𐴦𐴌 𐴘𐴝𐴑𐴟𐴁𐴢 𐴀𐴡𐴌, 𐴘𐴟𐴏𐴟𐴥𐴉𐴢 𐴀𐴡𐴌, 𐴘𐴡𐴇𐴟𐴥𐴊𐴝𐴌, 𐴀𐴠𐴊𐴧𐴠 𐴏𐴝𐴥𐴘𐴔𐴡𐴕𐴡𐴌 𐴁𐴝𐴥𐴘؟ 𐴀𐴞𐴁𐴝𐴤𐴌 𐴁𐴡𐴥𐴘𐴕𐴝𐴙𐴕 𐴀𐴠𐴍𐴠𐴥 𐴀𐴝𐴣𐴀𐴌𐴝𐴌 𐴉𐴟𐴥𐴖𐴝𐴣𐴃𐴞 𐴕𐴡𐴥 𐴕𐴠؟“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴙𐴅𐴧𐴠𐴥.

⁴𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴠 𐴇𐴡𐴕𐴡𐴤 𐴕𐴡𐴁𐴞𐴌 𐴀𐴞𐴎𐴧𐴡𐴃𐴢 𐴕𐴞𐴎𐴡𐴌 𐴖𐴡𐴃𐴡𐴥𐴕 𐴀𐴡𐴃𐴢, 𐴀𐴠𐴒𐴝𐴕𐴝-𐴒𐴟𐴐𐴧𐴞𐴥𐴃𐴢, 𐴀𐴠𐴊𐴧𐴠 𐴕𐴞𐴎𐴡𐴌 𐴒𐴡𐴥𐴌𐴡𐴃𐴢 𐴁𐴝𐴊𐴠 𐴁𐴠𐴒𐴧𐴟𐴥𐴓𐴧𐴝 𐴀𐴝𐴏𐴠𐴤.“⁵𐴀𐴞𐴥𐴁𐴝𐴘𐴠 𐴇𐴠𐴥𐴍𐴠 𐴀𐴝𐴌 𐴇𐴡𐴕𐴡𐴤 𐴑𐴠𐴌𐴝𐴔𐴡𐴃𐴢 𐴒𐴡𐴌𐴞𐴥 𐴕𐴡𐴥 𐴉𐴝𐴌𐴠, 𐴏𐴞𐴌𐴞𐴥𐴉𐴢 𐴇𐴡𐴦𐴎𐴧𐴡𐴕 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴊𐴞𐴥 𐴒𐴡𐴔 𐴒𐴡𐴌𐴞𐴥 𐴉𐴝𐴙𐴅𐴧𐴞𐴥𐴓𐴢 𐴊𐴠.⁶𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴕𐴝𐴁𐴞𐴐𐴧𐴝𐴥𐴐𐴞𐴃𐴢 𐴀𐴞𐴥𐴁𐴝 𐴁𐴞𐴐𐴞𐴤 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴓𐴒𐴡𐴘. 𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕𐴡𐴌𐴠 𐴃𐴡𐴁𐴡𐴓𐴞𐴑𐴡𐴃𐴢 𐴊𐴞𐴉𐴠𐴍𐴝𐴥𐴘𐴧𐴠 (𐴔𐴡𐴃𐴢 10‏:1‏,5‏-15; 𐴓𐴟𐴑 9‏:1‏-6)
𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤 𐴉𐴝𐴌𐴝-𐴉𐴝𐴌𐴝 𐴎𐴝𐴘 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.⁷𐴀𐴞𐴥𐴁𐴝𐴘𐴠 𐴁𐴝𐴌𐴡𐴥 𐴎𐴡𐴕 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴔𐴝𐴃𐴝𐴘, 𐴊𐴟𐴘 𐴎𐴡𐴕 𐴊𐴟𐴘 𐴎𐴡𐴕 𐴒𐴡𐴌𐴞𐴥 𐴊𐴞𐴉𐴠𐴍𐴝𐴥𐴃𐴢 𐴊𐴡𐴙𐴅𐴧𐴠. 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴝𐴘𐴁𐴝𐴥𐴌 𐴑𐴠𐴥𐴔𐴡𐴃𐴝 𐴊𐴞𐴀𐴓𐴢.

⁸𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴡𐴏𐴞𐴥𐴘𐴡𐴃𐴢 𐴒𐴡𐴌𐴠𐴥𐴌 𐴊𐴠, ”𐴉𐴡𐴣𐴃𐴡𐴓𐴧𐴝 𐴓𐴝𐴍𐴞𐴥 𐴁𐴝𐴊𐴠 𐴀𐴝𐴌 𐴑𐴠𐴏𐴧𐴟𐴥 𐴕𐴡 𐴓𐴡𐴘𐴎𐴝𐴘𐴧𐴡𐴥: 𐴕𐴡 𐴌𐴟𐴄𐴞, 𐴕𐴡 𐴇𐴡𐴥𐴙𐴓𐴧𐴝, 𐴕𐴡 𐴎𐴝𐴓𐴞𐴃𐴢 𐴒𐴡𐴌𐴞 𐴄𐴞𐴛𐴝.⁹𐴐𐴠𐴕𐴄𐴝𐴥𐴌 𐴉𐴞𐴣𐴊𐴞𐴥𐴘𐴡, 𐴔𐴡𐴕𐴃𐴡𐴌 𐴁𐴝𐴃𐴧𐴞𐴥 𐴇𐴡𐴦𐴌 𐴕𐴡 𐴓𐴡𐴘𐴎𐴝𐴘𐴧𐴡𐴥.“¹⁰𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴎𐴠 𐴒𐴡𐴥𐴌𐴡𐴃𐴢 𐴒𐴡𐴥𐴓𐴞𐴁𐴝 𐴇𐴠𐴥 𐴒𐴡𐴥𐴌𐴡𐴃𐴢 𐴐𐴡𐴥𐴀𐴌 𐴇𐴞𐴥𐴘𐴝𐴕𐴡𐴃𐴧𐴟 𐴕𐴠𐴦𐴓𐴞 𐴕𐴡𐴥 𐴎𐴡𐴦𐴒𐴡𐴥𐴘 𐴉𐴡𐴙𐴅𐴧𐴡𐴕𐴃𐴡 𐴃𐴝𐴥𐴑𐴞𐴘𐴡.¹¹𐴎𐴠 𐴎𐴝𐴒𐴝𐴃𐴢 𐴃𐴟𐴣𐴀𐴝𐴥𐴌𐴝𐴌𐴠 𐴑𐴡𐴁𐴟𐴓𐴢 𐴕𐴡 𐴒𐴡𐴌𐴠𐴥 𐴘𐴝𐴥𐴃𐴡 𐴃𐴟𐴣𐴀𐴝𐴥𐴌𐴝𐴌 𐴁𐴡𐴘𐴧𐴝𐴕 𐴕𐴡 𐴉𐴟𐴥𐴕𐴠, 𐴇𐴞𐴥𐴘𐴝𐴕𐴡𐴃𐴧𐴟 𐴎𐴝𐴘𐴁𐴝𐴐𐴧𐴡𐴥𐴃𐴢 𐴃𐴟𐴣𐴀𐴝𐴥𐴌𐴝𐴌 𐴄𐴠𐴥𐴚𐴡𐴌 𐴃𐴡𐴓𐴧𐴝𐴌 𐴊𐴟𐴥𐴙𐴓𐴢 𐴎𐴝𐴥𐴌𐴞𐴉𐴠𐴓𐴝𐴘𐴧𐴡, 𐴎𐴠𐴀𐴕𐴠 𐴇𐴞𐴥𐴀𐴕𐴠 𐴀𐴞𐴥𐴃𐴝𐴌𐴝𐴌 𐴀𐴟𐴓𐴋𐴝 𐴒𐴡𐴁𐴝𐴤 𐴊𐴠.“

¹²𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴌𐴡𐴖𐴝𐴕𐴝 𐴓𐴡𐴘 𐴀𐴠𐴕𐴊𐴞𐴓𐴧𐴝 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴃𐴡𐴖𐴝𐴥 𐴒𐴡𐴌𐴡𐴤.¹³𐴀𐴞𐴥𐴃𐴝𐴌𐴝 𐴁𐴡𐴀𐴗𐴃𐴢 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴕𐴠𐴦𐴓𐴝𐴘𐴧𐴠, 𐴀𐴝𐴦𐴌 𐴁𐴡𐴀𐴗𐴃𐴢 𐴎𐴡𐴕 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴃𐴠𐴓𐴢 𐴊𐴞 𐴒𐴡𐴔 𐴒𐴡𐴙𐴅𐴧𐴠𐴥.

𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴔𐴡𐴦𐴃𐴢

¹⁴𐴀𐴝𐴦𐴌 𐴁𐴝𐴀𐴣𐴐𐴧𐴝 𐴈𐴠𐴥𐴌𐴟𐴊𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴕𐴝𐴔 𐴀𐴝𐴒𐴝𐴒𐴟𐴌𐴝 𐴔𐴡𐴐𐴟𐴥𐴌 𐴀𐴡𐴥𐴘𐴒𐴞𐴓𐴒𐴡𐴘. 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠, 𐴇𐴠𐴥𐴃𐴡𐴓𐴧𐴝 𐴃𐴡 𐴀𐴞𐴥𐴁𐴝𐴘𐴠 𐴑𐴠𐴌𐴝𐴔𐴡𐴃𐴞 𐴈𐴝𐴔 𐴇𐴞𐴥𐴀𐴕 𐴒𐴡𐴌𐴞𐴥 𐴉𐴝𐴌𐴠𐴌.“

¹⁵𐴑𐴞𐴘𐴠𐴥-𐴑𐴞𐴘𐴠𐴥 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴀𐴠𐴓𐴞𐴘𐴝𐴏𐴢.“
𐴀𐴝𐴌 𐴑𐴞𐴘𐴠𐴥-𐴑𐴞𐴘𐴠𐴥 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴀𐴠𐴒𐴧𐴗𐴝𐴤 𐴕𐴡𐴁𐴞, 𐴀𐴝𐴒𐴡𐴌 𐴎𐴡𐴁𐴝𐴕𐴝𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝.“

¹⁶𐴔𐴡𐴕𐴃𐴡𐴌 𐴈𐴠𐴥𐴌𐴟𐴊𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴈𐴡𐴀𐴌 𐴊𐴠, ”𐴘𐴝𐴇𐴝𐴥𐴘𐴝 𐴎𐴞𐴁𐴝𐴤𐴌 𐴈𐴡𐴓𐴧𐴝 𐴀𐴝𐴀𐴛 𐴈𐴝𐴍𐴞𐴉𐴠𐴥𐴓𐴝 𐴁𐴝𐴥𐴘𐴓𐴝𐴔, 𐴀𐴞𐴥𐴁𐴝 𐴔𐴡𐴌𐴝𐴃𐴧𐴟 𐴎𐴞𐴕𐴊𐴝 𐴀𐴡𐴥𐴘𐴧𐴠 𐴊𐴠.“

¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴢 𐴕𐴞𐴎𐴠 𐴔𐴝𐴕𐴟𐴥𐴙𐴐𐴢 𐴊𐴞𐴉𐴠𐴍𐴝𐴥𐴘, 𐴕𐴞𐴎𐴡𐴌 𐴁𐴝𐴥𐴘 𐴉𐴞𐴓𐴞𐴥𐴂𐴡𐴌 𐴁𐴡𐴖𐴢 𐴈𐴠𐴥𐴌𐴟𐴊𐴞𐴀𐴝𐴏𐴡𐴌 𐴖𐴝𐴏𐴃𐴠𐴥 𐴇𐴠𐴥 𐴘𐴝𐴇𐴝𐴥𐴘𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴎𐴞𐴘𐴡𐴥𐴓𐴡𐴃𐴢 𐴁𐴝𐴣𐴊𐴞𐴥 𐴌𐴝𐴙𐴑𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴠 𐴇𐴞𐴥𐴁𐴝𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴉𐴠𐴓𐴝𐴙𐴓𐴢.¹⁸𐴘𐴝𐴇𐴝𐴥𐴘𐴝𐴘𐴠 𐴈𐴠𐴥𐴌𐴟𐴊𐴡𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴃𐴡𐴤 𐴊𐴠 𐴇𐴠𐴥𐴃𐴡𐴓𐴧𐴝, ”𐴃𐴟𐴣𐴀𐴝𐴥𐴣𐴃𐴧𐴟 𐴕𐴞𐴎𐴡𐴌 𐴁𐴝𐴥𐴘𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴁𐴞𐴘𐴝𐴥 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴕𐴝𐴥𐴘.“¹⁹𐴇𐴠𐴥𐴃𐴡𐴓𐴧𐴝 𐴈𐴠𐴥𐴌𐴟𐴊𐴞𐴀𐴝𐴏𐴢 𐴘𐴝𐴇𐴝𐴥𐴘𐴝 𐴓𐴧𐴡𐴥𐴘 𐴌𐴝𐴑 𐴃𐴝𐴥𐴘𐴒𐴞𐴓𐴒𐴡𐴘, 𐴇𐴞𐴥𐴁𐴝𐴃𐴧𐴟 𐴀𐴞𐴥𐴁𐴝𐴌𐴠 𐴎𐴝𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴔𐴡𐴕𐴠𐴈𐴡𐴘𐴃𐴡𐴥, 𐴔𐴡𐴕𐴃𐴡𐴌 𐴕𐴡𐴥 𐴉𐴝𐴌𐴠,²⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴈𐴠𐴥𐴌𐴟𐴊𐴠 𐴘𐴝𐴇𐴝𐴥𐴘𐴝𐴌𐴠 𐴋𐴡𐴦𐴌𐴝𐴘𐴃𐴡𐴥, 𐴘𐴡𐴥𐴒𐴧𐴗𐴝𐴘𐴠 𐴎𐴝𐴙𐴕𐴃𐴡 𐴊𐴠, 𐴀𐴞𐴥𐴁𐴝 𐴀𐴠𐴥𐴎𐴧𐴡𐴕 𐴉𐴡𐴌𐴇𐴠𐴥𐴏𐴒𐴝𐴌 𐴀𐴠𐴊𐴧𐴠 𐴂𐴝𐴑 𐴔𐴝𐴕𐴟𐴥𐴙𐴐𐴢, 𐴀𐴝𐴦𐴌 𐴇𐴠𐴥 𐴀𐴞𐴥𐴏𐴝𐴉𐴠 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴈𐴠𐴥𐴉𐴝𐴎𐴡𐴃𐴢 𐴌𐴝𐴑𐴞𐴥𐴃𐴡. 𐴘𐴡𐴥𐴒𐴧𐴗𐴝𐴘𐴠 𐴘𐴝𐴇𐴝𐴥𐴘𐴝𐴌 𐴈𐴡𐴃𐴝𐴤 𐴉𐴟𐴥𐴕𐴞𐴓𐴠 𐴁𐴞𐴐𐴞𐴤 𐴀𐴡𐴓𐴎𐴡𐴥𐴓𐴡𐴃𐴢 𐴉𐴡𐴌𐴞𐴎𐴝𐴘𐴃𐴡𐴥𐴘; 𐴃𐴡𐴀 𐴘𐴡𐴥𐴒𐴧𐴗𐴝𐴃𐴧𐴟 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴉𐴟𐴥𐴙𐴕𐴃𐴠 𐴒𐴡𐴔 𐴓𐴝𐴒𐴞𐴃𐴡𐴥.

²¹𐴀𐴝𐴇𐴠𐴥𐴌𐴞𐴃𐴢 𐴈𐴠𐴥𐴌𐴟𐴊𐴞𐴀𐴝𐴏𐴠 𐴀𐴠𐴑𐴧𐴝𐴥𐴕 𐴔𐴡𐴑𐴝 𐴉𐴝𐴀𐴙𐴓𐴢, 𐴎𐴠𐴣𐴃𐴧𐴠𐴥 𐴈𐴠𐴥𐴌𐴟𐴊𐴠 𐴕𐴞𐴎𐴡𐴌 𐴎𐴡𐴌𐴔𐴡-𐴊𐴞𐴕𐴡𐴌 𐴊𐴞𐴕 𐴐𐴡𐴥𐴌𐴑𐴝𐴌𐴞 𐴋𐴡𐴣𐴀𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢, 𐴉𐴡𐴥𐴗𐴏𐴡𐴌 𐴎𐴡𐴕𐴧𐴝𐴓𐴢 𐴀𐴡𐴥𐴑𐴧𐴡𐴓𐴢, 𐴀𐴠𐴊𐴧𐴠 𐴒𐴝𐴓𐴞𐴓𐴡𐴌 𐴋𐴝𐴘𐴋𐴡𐴣𐴀𐴌 𐴀𐴡𐴥𐴑𐴧𐴡𐴓𐴡𐴓𐴧𐴝 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴈𐴝𐴥𐴕𐴝 𐴒𐴡𐴙𐴅𐴧𐴠𐴥.²²𐴈𐴠𐴥𐴌𐴟𐴊𐴞𐴀𐴝𐴏𐴡𐴌 𐴎𐴞𐴥𐴀 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴇𐴠𐴥𐴍𐴠 𐴁𐴟𐴥𐴃𐴡𐴌𐴠 𐴀𐴝𐴀𐴘𐴢, 𐴕𐴝𐴏𐴞𐴘𐴡𐴌𐴠 𐴈𐴠𐴥𐴌𐴟𐴊𐴢 𐴀𐴠𐴊𐴧𐴠 𐴘𐴡𐴥𐴒𐴧𐴗𐴝𐴌 𐴔𐴠𐴀𐴔𐴝𐴕 𐴀𐴡𐴥𐴑𐴧𐴡𐴓𐴡𐴌𐴠 𐴑𐴟𐴥𐴐𐴞 𐴒𐴡𐴙𐴅𐴧𐴠𐴥 𐴌𐴝𐴥𐴌, 𐴁𐴝𐴀𐴣𐴐𐴧𐴝𐴘𐴠 𐴎𐴠𐴥𐴌𐴉𐴟𐴖𐴝 𐴖𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴌𐴃𐴧𐴟 𐴎𐴞𐴘𐴝𐴥𐴕 𐴔𐴡𐴕𐴠𐴈𐴡𐴀 𐴇𐴞𐴥𐴘𐴝𐴕 𐴀𐴝𐴣𐴀𐴃𐴧𐴟 𐴔𐴝𐴒, 𐴀𐴝𐴀𐴛 𐴃𐴡𐴌𐴠𐴥 𐴇𐴞𐴥𐴘𐴝𐴕 𐴊𐴞𐴦𐴘𐴟𐴔.“²³𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴁𐴝𐴌𐴠 𐴈𐴡𐴏𐴡𐴥𐴔 𐴇𐴝𐴥𐴘 𐴈𐴡𐴘𐴧𐴠𐴥 𐴊𐴠, ”𐴃𐴟𐴘 𐴀𐴝𐴣𐴀𐴃𐴧𐴟 𐴎𐴞𐴘𐴝𐴥𐴕 𐴔𐴝𐴒𐴡𐴏𐴢, 𐴀𐴝𐴀𐴛 𐴃𐴡𐴌𐴠𐴥 𐴇𐴞𐴥𐴘𐴝𐴕 𐴊𐴞𐴦𐴘𐴟𐴔, 𐴀𐴝𐴣𐴀𐴌 𐴌𐴝𐴙𐴅𐴧𐴡 𐴀𐴠𐴑𐴊𐴡𐴥𐴑 𐴀𐴡𐴥𐴘𐴓𐴠 𐴀𐴟𐴥𐴊𐴧𐴗𐴝 𐴊𐴞𐴦𐴉𐴠𐴥𐴓𐴝𐴘𐴧𐴟𐴔.“

²⁴𐴁𐴝𐴦𐴊𐴠 𐴇𐴞𐴥𐴁𐴝 𐴕𐴠𐴦𐴓𐴞 𐴎𐴝𐴘 𐴔𐴝𐴦𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴑𐴞𐴦 𐴔𐴝𐴒𐴞𐴃𐴝𐴥𐴔؟“
𐴔𐴝𐴦𐴘𐴠 𐴈𐴡𐴀𐴌 𐴊𐴠, ”𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴖𐴝.“

²⁵𐴀𐴠𐴥𐴇𐴡𐴕 𐴇𐴞𐴥𐴁𐴝 𐴃𐴡𐴌𐴝𐴃𐴡𐴌𐴞 𐴁𐴟𐴥𐴃𐴡𐴌𐴠 𐴁𐴝𐴀𐴣𐴐𐴧𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴣𐴃𐴧𐴟 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴖𐴝 𐴀𐴠𐴑𐴧𐴝𐴥𐴕 𐴃𐴝𐴥𐴓𐴞𐴃𐴢 𐴒𐴡𐴥𐴌𐴞 𐴀𐴠𐴇𐴡𐴥𐴕 𐴏𐴝𐴀𐴘𐴢.“

²⁶𐴇𐴞𐴥𐴘𐴝𐴕 𐴉𐴟𐴥𐴕𐴞 𐴁𐴝𐴀𐴣𐴐𐴧𐴝𐴃𐴧𐴟 𐴁𐴞𐴐𐴞𐴤 𐴀𐴝𐴉𐴏𐴟𐴥𐴏𐴢 𐴓𐴝𐴙𐴒𐴧𐴠𐴥, 𐴔𐴡𐴕𐴃𐴡𐴌 𐴃𐴡𐴀 𐴕𐴞𐴎𐴡𐴌 𐴈𐴡𐴏𐴡𐴥𐴔 𐴀𐴠𐴊𐴧𐴠 𐴔𐴠𐴀𐴔𐴝𐴕 𐴕𐴟𐴥𐴕𐴡𐴌 𐴎𐴡𐴌𐴞𐴘𐴝 𐴘𐴡𐴥𐴒𐴧𐴗𐴝𐴘𐴠 𐴇𐴞𐴥𐴁𐴝𐴌𐴠 𐴀𐴞𐴕𐴑𐴝𐴌 𐴒𐴡𐴙𐴃𐴧𐴡𐴥 𐴕𐴡𐴥 𐴏𐴝𐴀.²⁷𐴁𐴝𐴀𐴣𐴐𐴧𐴝𐴘𐴠 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴀𐴠𐴎𐴧𐴡𐴕 𐴎𐴡𐴓𐴧𐴝𐴃𐴡𐴌𐴠 𐴘𐴝𐴇𐴝𐴥𐴘𐴝𐴌 𐴈𐴡𐴓𐴧𐴝 𐴖𐴝 𐴀𐴝𐴙𐴕𐴃𐴡𐴤 𐴇𐴡𐴥𐴑𐴟𐴔 𐴊𐴞𐴥 𐴊𐴞𐴉𐴠𐴍𐴝𐴥𐴘𐴧𐴠. 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴎𐴝𐴘, 𐴎𐴞𐴘𐴡𐴥𐴓𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴁𐴝𐴌 𐴈𐴡𐴓𐴧𐴝 𐴖𐴝 𐴈𐴝𐴍𐴞𐴉𐴠𐴓𐴝𐴘𐴧𐴠,²⁸𐴀𐴝𐴦𐴌 𐴈𐴡𐴓𐴧𐴝 𐴖𐴝𐴌𐴠 𐴀𐴠𐴑𐴧𐴝𐴥𐴕 𐴃𐴝𐴥𐴓𐴞𐴃𐴢 𐴒𐴡𐴥𐴌𐴞 𐴀𐴝𐴕𐴞𐴤 𐴎𐴠𐴥𐴌𐴉𐴟𐴖𐴝 𐴖𐴝𐴌𐴠 𐴊𐴞𐴦𐴘𐴠𐴥; 𐴁𐴝𐴦𐴊𐴠 𐴎𐴠𐴥𐴌𐴉𐴟𐴖𐴝 𐴖𐴝𐴘𐴠 𐴇𐴞𐴥𐴁𐴝𐴌 𐴔𐴝𐴦𐴌𐴠 𐴊𐴞𐴦𐴘𐴠𐴥𐴒𐴡𐴘.²⁹𐴎𐴠𐴣𐴃𐴧𐴠𐴥 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴓𐴝𐴐𐴧𐴗𐴝 𐴓𐴡𐴘𐴎𐴝𐴘 𐴈𐴡𐴁𐴡𐴌𐴡𐴃𐴢 𐴊𐴡𐴇𐴡𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.

𐴉𐴝𐴣𐴏𐴢 𐴀𐴝𐴥𐴎𐴝𐴌 𐴔𐴝𐴙𐴕𐴐𐴡𐴥𐴌𐴠 𐴈𐴝𐴥𐴕𐴝 𐴈𐴝𐴥𐴁𐴝𐴘𐴧𐴠

³⁰𐴏𐴝𐴥𐴇𐴝𐴁𐴞 𐴒𐴟𐴥𐴕 𐴀𐴝𐴀𐴘𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴑𐴞𐴦-𐴑𐴞𐴦 𐴒𐴡𐴙𐴅𐴧𐴞𐴥𐴓𐴢 𐴀𐴠𐴊𐴧𐴠 𐴑𐴞𐴦-𐴑𐴞𐴦 𐴐𐴞𐴥𐴑𐴝𐴙𐴓𐴢 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴌𐴠 𐴎𐴝𐴕𐴝𐴘𐴧𐴠𐴥.³¹𐴇𐴠𐴥𐴣𐴃𐴧𐴠 𐴁𐴡𐴀𐴗𐴃𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴝𐴀-𐴎𐴝𐴦𐴃𐴢 𐴀𐴝𐴐𐴧𐴞𐴥𐴓𐴢 𐴀𐴞𐴥𐴏𐴝𐴉𐴠 𐴀𐴞𐴥𐴃𐴝𐴌𐴝 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴀𐴟𐴥𐴊𐴧𐴗𐴝 𐴄𐴝𐴙𐴔 𐴕𐴡𐴥 𐴉𐴝𐴦 𐴊𐴠 𐴇𐴠𐴥𐴃𐴡𐴓𐴧𐴝, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴠𐴑𐴧𐴝𐴥𐴕 𐴕𐴞𐴎𐴝𐴥𐴔 𐴎𐴝𐴒𐴝𐴃𐴢 𐴀𐴝𐴀𐴘𐴢 𐴀𐴠𐴏𐴧𐴝𐴥𐴃𐴢 𐴎𐴞𐴌𐴡𐴒𐴝𐴥𐴘.“

³²𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴕𐴡𐴦𐴃𐴢 𐴒𐴡𐴌𐴞 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝𐴃𐴢 𐴒𐴞𐴦𐴘𐴠𐴥.³³𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝 𐴎𐴝𐴦𐴌 𐴊𐴠 𐴊𐴠𐴙𐴑𐴧𐴠𐴥, 𐴃𐴝𐴌𐴝𐴥 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴃𐴝𐴌𐴝𐴌𐴠 𐴏𐴞𐴕𐴞𐴥 𐴉𐴝𐴌𐴞 𐴃𐴝𐴔𐴝𐴥𐴔 𐴐𐴡𐴥𐴀𐴌 𐴀𐴡𐴥𐴑𐴧𐴡𐴓𐴡𐴃𐴧𐴟 𐴊𐴟𐴣𐴌𐴞-𐴊𐴟𐴣𐴌𐴞 𐴇𐴠𐴥𐴍𐴠 𐴒𐴞𐴦𐴘𐴠𐴥, 𐴎𐴝𐴘 𐴀𐴞𐴥𐴃𐴝𐴌𐴝𐴌 𐴀𐴝𐴒𐴠 𐴇𐴠𐴥𐴍𐴠 𐴉𐴡𐴀𐴣𐴙𐴐𐴧𐴠.³⁴𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴕𐴡𐴦𐴃𐴧𐴟 𐴓𐴝𐴙𐴔𐴧𐴠𐴥, 𐴀𐴞𐴥𐴁𐴝𐴘𐴠 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴊𐴠𐴙𐴑𐴧𐴠𐴥, 𐴀𐴝𐴦𐴌 𐴀𐴞𐴥𐴁𐴝𐴃𐴧𐴟 𐴀𐴞𐴥𐴃𐴝𐴌𐴝𐴓𐴧𐴝 𐴉𐴠𐴄𐴉𐴟𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴡𐴌𐴡𐴘𐴝 𐴏𐴝𐴥𐴌𐴝 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘 𐴀𐴝𐴐𐴧𐴞𐴥𐴓𐴢. 𐴃𐴡𐴥𐴘 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.

³⁵𐴎𐴠𐴣𐴃𐴧𐴠𐴥 𐴁𐴞𐴐𐴞𐴤 𐴇𐴝𐴥𐴣𐴎𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴘𐴝𐴀𐴕 𐴃𐴡 𐴀𐴠𐴑𐴧𐴝𐴥𐴕 𐴁𐴡𐴐𐴡𐴥𐴃𐴞-𐴏𐴝𐴥𐴌𐴝 𐴎𐴝𐴒𐴝 𐴀𐴝𐴦𐴌 𐴁𐴞𐴐𐴞𐴤 𐴇𐴝𐴥𐴣𐴎𐴢 𐴀𐴡𐴥𐴘𐴒𐴞𐴘𐴡𐴘;³⁶𐴃𐴝𐴌𐴝𐴥𐴌𐴠 𐴊𐴟𐴣𐴌𐴝𐴘𐴊𐴡, 𐴎𐴠𐴀𐴕𐴠 𐴃𐴝𐴌𐴝𐴥 𐴀𐴝𐴃𐴠𐴇𐴝𐴣𐴏𐴡𐴥𐴌 𐴒𐴝𐴚 𐴎𐴝𐴒𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴉𐴝𐴌𐴝 𐴀𐴡𐴥𐴑𐴧𐴡𐴓𐴡𐴃𐴢 𐴎𐴝𐴘 𐴕𐴞𐴎𐴠 𐴇𐴝𐴥𐴘 𐴁𐴡𐴓𐴧𐴝 𐴑𐴠𐴏𐴧𐴟𐴥 𐴑𐴞𐴕𐴞 𐴉𐴝𐴌𐴠.“

³⁷𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴇𐴝𐴥𐴘 𐴁𐴡𐴓𐴧𐴝 𐴑𐴠𐴏𐴧𐴟𐴥 𐴃𐴝𐴌𐴝𐴥𐴌𐴠 𐴃𐴟𐴣𐴀𐴝𐴥𐴌𐴝 𐴊𐴡𐴦.“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴎𐴝𐴘 𐴊𐴟𐴘 𐴐𐴡𐴥𐴃𐴢 𐴊𐴞𐴕𐴝𐴥𐴌𐴡𐴌 𐴌𐴟𐴄𐴞 𐴑𐴞𐴕𐴞 𐴀𐴝𐴕𐴞𐴤 𐴃𐴝𐴌𐴝𐴥𐴌𐴠 𐴈𐴝𐴥𐴁𐴝𐴘𐴃𐴝𐴔 𐴕𐴠𐴥؟“

³⁸𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴃𐴧𐴟 𐴌𐴟𐴄𐴞 𐴈𐴡𐴖𐴝𐴤 𐴀𐴝𐴏𐴠𐴤؟ 𐴎𐴝𐴘 𐴏𐴡𐴀𐴒𐴡𐴘.“
𐴀𐴞𐴥𐴃𐴝𐴌𐴝 𐴏𐴝𐴀𐴘𐴢 𐴁𐴝𐴦𐴊𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴉𐴝𐴣𐴏𐴢 𐴏𐴗𐴝𐴥, 𐴀𐴝𐴦𐴌 𐴊𐴟𐴖𐴝𐴥 𐴔𐴝𐴏𐴢 𐴀𐴡𐴥 𐴀𐴝𐴏𐴠𐴤.“

³⁹𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝 𐴌𐴠, 𐴔𐴝𐴕𐴟𐴥𐴙𐴐𐴧𐴟𐴥𐴕 𐴁𐴠𐴒𐴧𐴟𐴥𐴕𐴡𐴌𐴠 𐴀𐴝𐴥𐴙𐴓𐴢 𐴑𐴠𐴥𐴌𐴡𐴌 𐴖𐴡𐴌𐴠 𐴋𐴝𐴀𐴘𐴢-𐴋𐴝𐴀𐴘𐴢 𐴒𐴡𐴥𐴌𐴞 𐴁𐴟𐴀𐴝𐴥𐴒𐴝𐴌𐴝𐴘𐴃𐴡 𐴇𐴡𐴥𐴑𐴟𐴔 𐴊𐴞𐴥𐴘𐴠.⁴⁰𐴃𐴡𐴥𐴘 𐴃𐴝𐴌𐴝𐴥 𐴀𐴠𐴑 𐴐𐴡𐴥𐴃𐴢 𐴎𐴡𐴙𐴕𐴧𐴝 𐴀𐴠𐴊𐴧𐴠 𐴉𐴡𐴕𐴎𐴝𐴙𐴐𐴢 𐴎𐴡𐴙𐴕𐴧𐴝 𐴋𐴝𐴀𐴘𐴢 𐴒𐴡𐴥𐴌𐴞-𐴒𐴡𐴥𐴌𐴞 𐴁𐴡𐴙𐴐𐴧𐴠𐴥.⁴¹𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴇𐴠𐴥 𐴉𐴝𐴣𐴏𐴢 𐴏𐴗𐴝𐴥 𐴌𐴟𐴄𐴞 𐴀𐴠𐴊𐴧𐴠 𐴊𐴟𐴖𐴝𐴥 𐴔𐴝𐴏𐴢 𐴏𐴟𐴥𐴕 𐴓𐴡𐴦𐴘𐴢 𐴀𐴝𐴏𐴔𐴝𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴊𐴞𐴦 𐴁𐴡𐴓𐴧𐴝 𐴌𐴟𐴄𐴞 𐴒𐴟𐴥𐴕 𐴁𐴝𐴥𐴚𐴒𐴞-𐴁𐴝𐴥𐴚𐴒𐴞 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴊𐴞𐴦𐴘𐴠𐴥; 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴞𐴥 𐴀𐴞𐴥𐴁𐴝𐴘𐴠 𐴔𐴝𐴏𐴢 𐴊𐴟𐴕𐴞𐴥 𐴖𐴝 𐴘𐴡𐴥 𐴃𐴝𐴌𐴝𐴥 𐴁𐴠𐴒𐴧𐴟𐴥𐴕𐴡𐴌𐴠 𐴁𐴝𐴍𐴞𐴊𐴞𐴘𐴠𐴥.⁴²𐴀𐴝𐴦𐴌 𐴃𐴝𐴌𐴝𐴥 𐴁𐴠𐴒𐴧𐴟𐴥𐴕𐴠 𐴉𐴠𐴄𐴢 𐴁𐴡𐴥𐴌𐴞 𐴈𐴝𐴥𐴘𐴧𐴠.⁴³𐴁𐴝𐴦𐴊𐴠 𐴌𐴟𐴄𐴞𐴌 𐴀𐴠𐴊𐴧𐴠 𐴔𐴝𐴏𐴡𐴌 𐴎𐴠 𐴃𐴟𐴑𐴟𐴍𐴝 𐴀𐴡𐴥𐴑𐴧𐴡𐴓𐴢 𐴁𐴝𐴏𐴞𐴒𐴞𐴘𐴡𐴥𐴘, 𐴐𐴝𐴥𐴌𐴞𐴃𐴧𐴟𐴕𐴠 𐴇𐴞𐴥𐴀𐴕 𐴉𐴠𐴣𐴍𐴝𐴘 𐴓𐴡𐴦𐴘𐴢 𐴉𐴟𐴌𐴝 𐴁𐴝𐴌𐴡𐴥 𐴁𐴝𐴥𐴙𐴌 𐴁𐴡𐴥𐴙𐴅𐴧𐴠.⁴⁴𐴎𐴠𐴃𐴝𐴌𐴝𐴤 𐴌𐴟𐴄𐴞 𐴈𐴝𐴥𐴘𐴧𐴠 𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠 𐴉𐴝𐴣𐴏𐴢 𐴀𐴝𐴥𐴎𐴝𐴌 𐴁𐴠𐴍𐴝𐴀𐴙𐴕.

𐴀𐴞𐴏𐴝𐴤 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴙𐴄𐴧𐴠

⁴⁵𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥 𐴊𐴞𐴃𐴠-𐴊𐴞𐴃𐴠 𐴀𐴞𐴥𐴃𐴝𐴌𐴝 𐴎𐴠𐴀𐴕𐴠 𐴕𐴡𐴦𐴃𐴢 𐴀𐴟𐴍𐴞𐴤 𐴀𐴞𐴥𐴁𐴝𐴌 𐴀𐴝𐴒𐴠 𐴀𐴡𐴑𐴟𐴓𐴠 𐴁𐴠𐴃𐴏𐴝𐴥𐴘𐴊𐴝𐴃𐴢 𐴎𐴝𐴦𐴒𐴡𐴥𐴘.⁴⁶𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴁𐴞𐴊𐴝𐴘 𐴒𐴡𐴌𐴞𐴥𐴊𐴞 𐴁𐴝𐴦𐴊𐴠, 𐴀𐴞𐴥𐴁𐴝 𐴉𐴝𐴀𐴌𐴡𐴌 𐴖𐴡𐴌𐴠 𐴊𐴟𐴖𐴝 𐴒𐴡𐴙𐴃𐴧𐴡𐴥 𐴒𐴞𐴦𐴘𐴠𐴥.

⁴⁷𐴀𐴝𐴦𐴌 𐴇𐴝𐴥𐴣𐴎𐴢 𐴀𐴡𐴥𐴘𐴧𐴠 𐴊𐴠 𐴇𐴠𐴥𐴣𐴃𐴧𐴠, 𐴕𐴡𐴦 𐴒𐴝𐴥𐴕 𐴋𐴞𐴀𐴌 𐴔𐴝𐴎𐴠𐴥 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴞𐴏𐴝𐴤 𐴇𐴝𐴥𐴓𐴞𐴒𐴝 𐴑𐴟𐴓𐴡𐴌 𐴖𐴡𐴌𐴠.⁴⁸𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴐𐴝𐴥𐴌𐴞𐴃𐴧𐴟𐴕𐴠 𐴔𐴡𐴐𐴑𐴞𐴓𐴡𐴌 𐴏𐴝𐴥𐴀𐴣𐴃𐴠 𐴊𐴝𐴌 𐴁𐴝𐴀𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴡𐴘𐴧𐴝𐴌 𐴀𐴞𐴥𐴃𐴝𐴌𐴝𐴌 𐴀𐴟𐴎𐴝𐴕 𐴁𐴝𐴀𐴃𐴢 𐴀𐴝𐴐𐴧𐴞𐴥𐴓𐴢. 𐴉𐴟𐴀𐴝𐴥𐴣𐴙𐴃𐴧𐴝, 𐴀𐴞𐴥𐴁𐴝 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴞-𐴀𐴝𐴥𐴣𐴍𐴞 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴁𐴝𐴥𐴌𐴝𐴘 𐴎𐴝𐴘𐴃𐴡 𐴏𐴝𐴀𐴙𐴓𐴢.⁴⁹𐴓𐴠𐴑𐴞𐴕 𐴀𐴞𐴥𐴁𐴝 𐴉𐴝𐴕𐴞𐴥𐴌 𐴖𐴡𐴃𐴧𐴟𐴥 𐴀𐴝𐴥𐴣𐴍𐴠𐴌 𐴊𐴠 𐴇𐴞𐴥𐴘𐴝𐴕 𐴐𐴝𐴥𐴌𐴞𐴃𐴧𐴟𐴕𐴠 𐴊𐴠𐴑𐴞𐴥, 𐴁𐴟𐴥𐴃𐴢 𐴁𐴡𐴥𐴓𐴞 𐴄𐴝𐴥𐴀𐴌𐴞 𐴒𐴟𐴎𐴡𐴌𐴞 𐴀𐴟𐴙𐴄𐴧𐴞𐴥𐴓𐴢,⁵⁰𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌𐴠 𐴊𐴠𐴑𐴞𐴥 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴋𐴡𐴦𐴌𐴝𐴀𐴙𐴓𐴢.
𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴠𐴥𐴇𐴡𐴕-𐴀𐴠𐴥𐴇𐴡𐴕 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴧𐴠𐴥; 𐴀𐴞𐴥𐴃𐴝𐴌𐴝𐴌𐴠 𐴈𐴡𐴘𐴧𐴠𐴥 𐴊𐴠, ”𐴇𐴞𐴥𐴔𐴧𐴡𐴃𐴢 𐴒𐴡𐴌𐴡𐴤! 𐴀𐴞𐴁𐴝𐴤 𐴀𐴝𐴀𐴛; 𐴕𐴡 𐴋𐴡𐴦𐴌𐴝𐴘𐴧𐴡𐴥.“⁵¹𐴃𐴝𐴌𐴉𐴡𐴌𐴠 𐴀𐴞𐴥𐴁𐴝 𐴀𐴞𐴥𐴃𐴝𐴌𐴝 𐴀𐴝𐴏𐴠𐴤 𐴊𐴠 𐴕𐴡𐴦𐴃𐴢 𐴀𐴟𐴙𐴄𐴧𐴠𐴥𐴒𐴡𐴘, 𐴀𐴝𐴦𐴌 𐴇𐴠𐴥𐴃𐴟𐴕𐴡𐴃𐴢 𐴁𐴡𐴘𐴧𐴝𐴌 𐴃𐴝𐴥𐴔𐴝𐴘𐴒𐴞𐴘𐴡𐴘. 𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴀𐴠𐴁𐴧𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘,⁵²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴌𐴟𐴄𐴞𐴌 𐴑𐴠𐴌𐴝𐴔𐴡𐴃𐴢 𐴃𐴝𐴥𐴕 𐴕𐴡𐴥 𐴁𐴟𐴎𐴠𐴥, 𐴁𐴡𐴥𐴓𐴑𐴠 𐴀𐴞𐴥𐴃𐴝𐴌𐴝𐴌 𐴊𐴞𐴓𐴢 𐴊𐴡𐴌𐴡𐴤 𐴀𐴡𐴥𐴘𐴒𐴞𐴓𐴒𐴡𐴘.

𐴒𐴠𐴕𐴠𐴏𐴝𐴥𐴌𐴠𐴃𐴡𐴃𐴢 𐴁𐴞𐴘𐴝𐴌𐴝𐴙𐴔𐴧𐴝 𐴒𐴡𐴔 𐴒𐴡𐴙𐴅𐴧𐴠𐴥

⁵³𐴀𐴞𐴥𐴃𐴝𐴌𐴝 𐴋𐴞𐴀 𐴉𐴝𐴌𐴝𐴤𐴘, 𐴒𐴠𐴕𐴠𐴏𐴝𐴥𐴌𐴠𐴃𐴢 𐴀𐴠𐴓𐴝𐴑𐴝𐴃𐴢 𐴉𐴡𐴀𐴣𐴏𐴞 𐴕𐴡𐴦 𐴒𐴝𐴥𐴕 𐴁𐴞𐴥𐴌𐴝𐴘𐴧𐴠.⁵⁴𐴀𐴝𐴦𐴌 𐴕𐴡𐴦𐴃𐴧𐴟 𐴓𐴝𐴙𐴔𐴧𐴠𐴥 𐴔𐴡𐴃𐴧𐴡𐴌, 𐴔𐴝𐴙𐴕𐴐𐴠𐴥 𐴀𐴞𐴏𐴝𐴤𐴌𐴠 𐴏𐴞𐴕𐴞𐴥,⁵⁵𐴇𐴠𐴥 𐴀𐴠𐴓𐴝𐴑𐴝𐴌 𐴀𐴝𐴒𐴝𐴒𐴟𐴌𐴝𐴃𐴢 𐴊𐴟𐴣𐴌𐴞 𐴎𐴝𐴘 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴁𐴞𐴏𐴝𐴥𐴕𐴝𐴃𐴢 𐴒𐴡𐴥𐴌𐴞, 𐴀𐴞𐴥𐴁𐴝 𐴎𐴠𐴍𐴠𐴥-𐴎𐴠𐴍𐴠𐴥 𐴀𐴝𐴏𐴠𐴤 𐴁𐴡𐴥𐴓𐴞 𐴈𐴡𐴥𐴁𐴡𐴌 𐴉𐴝𐴘𐴧𐴠𐴥 𐴇𐴠𐴥𐴍𐴠-𐴇𐴠𐴥𐴍𐴠 𐴀𐴝𐴕𐴝𐴤𐴃𐴢 𐴊𐴡𐴙𐴅𐴧𐴠.⁵⁶𐴀𐴞𐴥𐴁𐴝 𐴎𐴠𐴍𐴠𐴥-𐴎𐴠𐴍𐴠𐴥 𐴎𐴝𐴘𐴃𐴡, 𐴉𐴝𐴌𐴝𐴃𐴢 𐴀𐴡𐴥𐴑, 𐴐𐴡𐴥𐴀𐴌𐴡𐴃𐴢 𐴀𐴡𐴥𐴑, 𐴘𐴝𐴥 𐴒𐴝𐴚 𐴎𐴝𐴒𐴝𐴃𐴢 𐴀𐴡𐴥𐴑, 𐴇𐴠𐴥𐴍𐴠 𐴔𐴝𐴙𐴕𐴐𐴠𐴥 𐴁𐴞𐴘𐴝𐴌𐴝𐴙𐴔𐴧𐴝 𐴀𐴡𐴥𐴑𐴧𐴡𐴓𐴡𐴌𐴠 𐴁𐴝𐴎𐴝𐴌𐴡𐴃𐴢 𐴀𐴝𐴕𐴞𐴤 𐴀𐴞𐴥𐴁𐴝𐴌𐴠 𐴀𐴝𐴌𐴡𐴏𐴢 𐴒𐴡𐴙𐴃𐴧𐴡𐴥 𐴊𐴠, 𐴀𐴞𐴥𐴃𐴝𐴌𐴝𐴌𐴠 𐴏𐴞𐴌𐴞𐴥𐴉𐴢 𐴀𐴞𐴥𐴁𐴝𐴌 𐴉𐴟𐴐𐴝𐴥𐴑𐴡𐴌 𐴇𐴝𐴣𐴌𐴝 𐴀𐴡𐴥𐴘𐴓𐴠 𐴏𐴟𐴥𐴘𐴃𐴡 𐴊𐴞𐴥 𐴁𐴡𐴓𐴧𐴝; 𐴀𐴝𐴦𐴌 𐴎𐴠𐴃𐴡𐴥 𐴎𐴡𐴕𐴠 𐴏𐴟𐴥𐴘𐴃𐴡, 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕 𐴒𐴡𐴔 𐴀𐴡𐴥𐴘𐴎𐴝𐴘𐴃𐴡𐴘.

The Word for the World International

https://app.library.bible/content/87faca8b51c22590