Basahin ang 𐴈𐴝𐴔𐴡𐴥𐴓𐴢 15

𐴈𐴝𐴔𐴡𐴥𐴓𐴢15

𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴔𐴟𐴅𐴞𐴓𐴞𐴥𐴐𐴢

¹𐴘𐴡𐴇𐴟𐴥𐴊𐴞𐴘𐴝𐴃𐴧𐴟 𐴑𐴠𐴏𐴧𐴟𐴥 𐴔𐴝𐴕𐴟𐴥𐴙𐴐𐴢 𐴕𐴞𐴏𐴠 𐴀𐴝𐴀𐴘𐴢 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴀𐴠𐴕𐴊𐴞𐴓𐴧𐴝 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠 𐴊𐴠, ”𐴎𐴡𐴊𐴞 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴔𐴡𐴎𐴞𐴕 𐴀𐴝𐴥𐴎𐴡𐴔𐴞 𐴕𐴡 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴌𐴝 𐴕𐴠𐴅𐴝𐴃𐴢 𐴉𐴝𐴘 𐴕𐴡 𐴉𐴝𐴌𐴞𐴁𐴝𐴥.“²𐴇𐴞𐴥𐴘𐴝𐴕𐴡𐴃𐴢 𐴂𐴝𐴥𐴀𐴟𐴓𐴠 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴠 𐴀𐴞𐴥𐴃𐴝𐴌𐴝 𐴓𐴧𐴡𐴥𐴘 𐴊𐴡𐴌𐴡𐴤 𐴃𐴡𐴌𐴑𐴝𐴃𐴡𐴌𐴑𐴞 𐴀𐴠𐴊𐴧𐴠 𐴁𐴝𐴌𐴝𐴤𐴁𐴝𐴌𐴞 𐴊𐴞𐴥𐴘𐴠. 𐴀𐴝𐴇𐴠𐴥𐴌𐴞𐴃𐴢 𐴎𐴡𐴔𐴝𐴥𐴃𐴠 𐴉𐴝𐴥𐴘𐴏𐴠𐴓𐴝 𐴓𐴡𐴥𐴘𐴧𐴠 𐴊𐴠, 𐴂𐴝𐴥𐴀𐴟𐴓𐴢, 𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴡𐴦𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴖𐴡𐴌𐴠 𐴅𐴠𐴌𐴟𐴥𐴏𐴝𐴓𐴠𐴔 𐴎𐴝𐴘 𐴏𐴝𐴥𐴇𐴝𐴁𐴞 𐴒𐴟𐴥𐴕 𐴓𐴡𐴥𐴘 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴀𐴠 𐴔𐴡𐴏𐴡𐴥𐴓𐴝𐴌 𐴁𐴝𐴦𐴁𐴟𐴃𐴠 𐴔𐴡𐴐𐴖𐴝𐴌𐴝 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.³𐴁𐴝𐴦𐴊𐴠 𐴎𐴡𐴔𐴝𐴥𐴃𐴠 𐴃𐴝𐴌𐴝𐴥𐴌𐴠 𐴊𐴞𐴉𐴠𐴍𐴝𐴥𐴘𐴧𐴠; 𐴃𐴝𐴌𐴝𐴥 𐴉𐴡𐴕𐴞𐴑𐴐𐴞𐴥𐴘𐴝𐴌 𐴀𐴠𐴊𐴧𐴠 𐴏𐴝𐴔𐴝𐴥𐴌𐴞𐴘𐴝𐴌 𐴁𐴟𐴥𐴃𐴡𐴃𐴧𐴟 𐴎𐴝𐴘𐴃𐴠-𐴎𐴝𐴘𐴃𐴠 𐴇𐴠𐴥𐴍𐴠 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴎𐴝𐴕𐴝𐴘𐴧𐴠𐴥 𐴊𐴠, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴑𐴠𐴀𐴕𐴒𐴡𐴌𐴞 𐴀𐴝𐴓𐴧𐴝𐴌 𐴀𐴟𐴎𐴟 𐴉𐴞𐴥𐴌𐴠𐴌; 𐴇𐴞𐴥𐴘𐴝𐴕𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴇𐴝𐴣𐴏𐴠 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴝𐴙𐴕𐴧𐴠𐴤.⁴𐴃𐴝𐴌𐴝𐴥 𐴎𐴠𐴣𐴃𐴧𐴠𐴥 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴉𐴡𐴀𐴣𐴙𐴐𐴧𐴠, 𐴎𐴡𐴔𐴝𐴥𐴃𐴡𐴌 𐴔𐴝𐴙𐴕𐴐𐴠𐴥, 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴠 𐴃𐴝𐴌𐴝𐴥𐴌𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥, 𐴁𐴝𐴦𐴊𐴠 𐴀𐴝𐴓𐴧𐴝𐴘𐴠 𐴃𐴝𐴌𐴝𐴥𐴌 𐴀𐴝𐴥𐴃𐴝 𐴎𐴞𐴀𐴕-𐴎𐴞𐴀𐴕 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴁𐴡𐴘𐴧𐴝𐴕 𐴒𐴡𐴙𐴅𐴧𐴠𐴥.⁵𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴉𐴞𐴥𐴌𐴑𐴝𐴃𐴧𐴟 𐴀𐴞𐴔𐴝𐴕𐴊𐴝𐴥𐴌 𐴁𐴡𐴙𐴕𐴧𐴠𐴥 𐴊𐴠 𐴇𐴡𐴦𐴎𐴧𐴡𐴕𐴠 𐴀𐴟𐴍𐴞𐴤 𐴈𐴡𐴀𐴌 𐴊𐴠, ”𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥𐴌 𐴎𐴡𐴌𐴟𐴌 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌𐴠 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴝𐴌 𐴎𐴡𐴌𐴟𐴌.“

⁶𐴇𐴠𐴥𐴃𐴟𐴕𐴡𐴃𐴢 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴠 𐴇𐴠𐴥 𐴔𐴡𐴏𐴡𐴥𐴓𐴝 𐴒𐴝𐴥𐴕𐴡𐴌 𐴖𐴡𐴌𐴠 𐴁𐴝𐴥𐴉𐴞 𐴁𐴡𐴓𐴧𐴝 𐴎𐴡𐴔𐴝 𐴀𐴡𐴥𐴘𐴧𐴠.⁷𐴇𐴠𐴥𐴍𐴠 𐴁𐴡𐴀𐴗𐴃𐴢 𐴃𐴡𐴌𐴑𐴝𐴃𐴡𐴌𐴑𐴞 𐴀𐴡𐴥𐴘 𐴁𐴝𐴦𐴊𐴠 𐴉𐴞𐴃𐴡𐴌𐴠 𐴀𐴟𐴍𐴞𐴤 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴁𐴝𐴥𐴘𐴧𐴝𐴙𐴕, 𐴃𐴟𐴣𐴀𐴝𐴥𐴌𐴝 𐴃𐴡 𐴎𐴝𐴕𐴡, 𐴁𐴡𐴀𐴗𐴃𐴢 𐴊𐴞𐴕 𐴀𐴝𐴒𐴠 𐴀𐴝𐴓𐴧𐴝𐴘𐴠 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴌𐴝𐴌 𐴈𐴠𐴥𐴕𐴃𐴟 𐴁𐴝𐴏𐴞𐴥𐴓𐴡𐴘𐴧𐴠, 𐴎𐴠𐴀𐴕𐴠 𐴀𐴝𐴣𐴀𐴌 𐴔𐴟𐴑𐴡𐴃𐴧𐴟 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴑𐴟𐴥𐴐𐴈𐴡𐴥𐴁𐴡𐴌𐴡𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴀𐴞𐴔𐴝𐴕 𐴀𐴝𐴕𐴠𐴤.⁸𐴀𐴝𐴦𐴌 𐴀𐴝𐴓𐴧𐴝, 𐴎𐴞𐴁𐴝𐴤𐴘𐴠 𐴉𐴡𐴃𐴧𐴞𐴥 𐴀𐴠𐴑𐴎𐴡𐴕𐴡𐴌 𐴊𐴞𐴓𐴢 𐴎𐴝𐴕𐴠, 𐴀𐴞𐴥𐴁𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴑𐴡𐴁𐴟𐴓𐴢 𐴒𐴡𐴌𐴠𐴥 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝𐴌𐴠 𐴂𐴝𐴑-𐴌𐴟𐴀 𐴊𐴞𐴦𐴘𐴡𐴌𐴠 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌𐴠 𐴘𐴡𐴥 𐴊𐴞𐴀𐴓𐴢.⁹𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴉𐴡𐴌𐴡𐴥𐴑 𐴕𐴡𐴥 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴃𐴡 𐴀𐴞𐴥𐴃𐴝𐴌𐴝 𐴀𐴞𐴔𐴝𐴕 𐴀𐴝𐴕𐴡𐴤𐴕𐴠 𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴌𐴠 𐴘𐴡𐴥 𐴏𐴝𐴥𐴉𐴢 𐴒𐴡𐴙𐴅𐴧𐴠𐴥.¹⁰𐴃𐴡𐴥𐴘 𐴘𐴝𐴓𐴝, 𐴎𐴠 𐴎𐴟𐴣𐴖𐴝𐴓𐴢 𐴀𐴝𐴣𐴀𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴁𐴡𐴀𐴘𐴢 𐴕𐴡𐴥 𐴉𐴝𐴌𐴠 𐴀𐴝𐴦𐴌 𐴀𐴝𐴣𐴀𐴌𐴝 𐴘𐴡𐴥 𐴕𐴡𐴥 𐴉𐴝𐴌𐴞, 𐴘𐴞𐴥𐴁𐴝 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴈𐴝𐴣𐴊𐴡𐴥𐴃𐴢 𐴃𐴟𐴓𐴞𐴤𐴊𐴞 𐴀𐴝𐴓𐴧𐴝𐴌𐴠 𐴑𐴞𐴘𐴡𐴥𐴓𐴧𐴝 𐴀𐴠𐴕𐴃𐴝𐴥𐴕 𐴒𐴡𐴌𐴡𐴤𐴌؟¹¹𐴀𐴝𐴣𐴀𐴌𐴝 𐴁𐴞𐴐𐴧𐴝𐴥𐴐𐴢 𐴒𐴡𐴌𐴞𐴥 𐴊𐴠, 𐴀𐴝𐴣𐴀𐴌𐴝 𐴕𐴠𐴅𐴝𐴃𐴢 𐴉𐴝𐴘𐴧𐴞𐴥 𐴊𐴠 𐴔𐴝𐴓𐴞𐴑 𐴀𐴞𐴏𐴝𐴤𐴌 𐴌𐴝𐴇𐴝𐴥𐴔𐴡𐴃𐴠, 𐴎𐴠𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝 𐴘𐴡𐴥 𐴉𐴝𐴘𐴧𐴠𐴥.“

¹²𐴇𐴠𐴥𐴃𐴟𐴕𐴡𐴃𐴢 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴕𐴞𐴎𐴝𐴥𐴔 𐴔𐴝𐴥𐴌𐴞 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴡𐴌 𐴀𐴝𐴥𐴃𐴝 𐴀𐴝𐴓𐴧𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴎𐴠 𐴀𐴞𐴓𐴧𐴝𐴘𐴞-𐴕𐴞𐴐𐴝𐴥𐴕 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴃𐴝𐴦𐴅𐴟𐴙𐴂𐴧𐴝 𐴇𐴝𐴌𐴇𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴙𐴓𐴢 𐴇𐴞𐴥𐴀𐴕 𐴃𐴝𐴌𐴝𐴥𐴃𐴧𐴟 𐴉𐴟𐴥𐴕𐴝𐴃𐴢 𐴀𐴝𐴐𐴧𐴞𐴥𐴓𐴢.¹³𐴃𐴝𐴌𐴝𐴥𐴃𐴧𐴟 𐴈𐴡𐴃𐴝𐴤 𐴈𐴡𐴘𐴧𐴝𐴤 𐴀𐴡𐴥𐴘 𐴁𐴝𐴦𐴊𐴠, 𐴘𐴝𐴑𐴟𐴁𐴠 𐴈𐴡𐴀𐴌 𐴊𐴠, ”𐴁𐴝𐴥𐴘𐴧𐴝𐴙𐴕, 𐴀𐴝𐴣𐴀𐴌 𐴈𐴡𐴃𐴝𐴤 𐴉𐴟𐴥𐴕𐴡.¹⁴𐴏𐴝𐴥𐴘𐴔𐴡𐴕𐴠 𐴀𐴝𐴣𐴀𐴌𐴝𐴌𐴠 𐴁𐴟𐴎𐴝𐴥𐴘𐴊𐴞𐴘𐴠, 𐴀𐴝𐴓𐴧𐴝𐴘𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴃𐴧𐴟 𐴕𐴞𐴎𐴡𐴌 𐴓𐴧𐴝 𐴀𐴠𐴒𐴧𐴗𐴝𐴤 𐴑𐴡𐴗𐴔 𐴁𐴝𐴏𐴞𐴥𐴓𐴡𐴘𐴃𐴡 𐴐𐴟𐴥𐴌𐴟𐴃𐴢 𐴇𐴡𐴕𐴊𐴞𐴓𐴧𐴝 𐴒𐴡𐴌𐴞 𐴀𐴞𐴥𐴃𐴝𐴌𐴝𐴌 𐴀𐴟𐴎𐴟 𐴕𐴡𐴎𐴡𐴌 𐴊𐴞𐴘𐴠𐴥 𐴊𐴠.¹⁵𐴈𐴡𐴃𐴝𐴤 𐴇𐴞𐴥𐴘𐴝𐴕 𐴓𐴡𐴥𐴘 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤 𐴘𐴡𐴥 𐴔𐴞𐴓𐴢 𐴇𐴝𐴥; 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,¹⁶’𐴇𐴞𐴥𐴀𐴕 𐴁𐴝𐴦𐴊𐴠 𐴀𐴝𐴀𐴛 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴟𐴤𐴔,𐴀𐴝𐴦𐴌 𐴊𐴝𐴖𐴟𐴊𐴡𐴌 𐴌𐴝𐴙𐴅𐴧𐴡𐴌𐴠 𐴀𐴝𐴒𐴡𐴌 𐴋𐴡𐴥𐴙𐴓𐴧𐴝 𐴁𐴝𐴕𐴝𐴘 𐴉𐴠𐴓𐴝𐴘𐴧𐴟𐴔.𐴇𐴞𐴥𐴘𐴝𐴕𐴡𐴌 𐴁𐴝𐴥𐴣𐴒𐴝𐴏𐴟𐴥𐴌𐴝 𐴀𐴡𐴥𐴑𐴧𐴡𐴓𐴢 𐴇𐴡𐴥𐴚𐴒𐴡𐴌𐴞𐴘𐴡𐴌𐴠𐴀𐴝𐴁𐴝𐴌 𐴊𐴡𐴌𐴡𐴤 𐴒𐴡𐴌𐴞𐴥𐴘𐴟𐴔,¹⁷𐴎𐴠𐴀𐴕𐴠 𐴀𐴝𐴌 𐴁𐴝𐴑𐴞 𐴀𐴞𐴕𐴏𐴝𐴥𐴕 𐴁𐴠𐴒𐴧𐴟𐴥𐴕𐴠 𐴔𐴝𐴁𐴟𐴊𐴡𐴌𐴠 𐴃𐴟𐴖𐴝,𐴃𐴝𐴔𐴝𐴥𐴔 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝, 𐴎𐴠𐴃𐴝𐴌𐴝𐴤𐴌𐴠 𐴀𐴝𐴣𐴀𐴌 𐴁𐴡𐴕𐴊𐴝 𐴀𐴡𐴥𐴘 𐴁𐴡𐴓𐴧𐴝 𐴋𐴝𐴈𐴝 𐴒𐴞𐴘𐴠𐴥.𐴔𐴝𐴁𐴟𐴊𐴠 𐴇𐴠𐴥𐴕𐴊𐴞𐴓𐴧𐴝 𐴉𐴡𐴥𐴌𐴔𐴝𐴘𐴧𐴠, 𐴎𐴞𐴁𐴝𐴤𐴘𐴠 𐴇𐴞𐴥𐴀𐴕¹⁸𐴁𐴡𐴀𐴗𐴃𐴢 𐴀𐴝𐴒𐴠 𐴓𐴡𐴥𐴃𐴞 𐴎𐴝𐴕𐴝𐴘𐴊𐴞 𐴊𐴞 𐴀𐴝𐴘𐴧𐴠𐴤𐴌.‘ “

¹⁹𐴘𐴝𐴑𐴟𐴁𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌 𐴌𐴝𐴘 𐴀𐴡𐴥𐴙𐴓𐴊𐴠, 𐴁𐴠𐴘𐴡𐴇𐴟𐴥𐴊𐴞 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴀𐴟𐴎𐴟 𐴉𐴞𐴥𐴌𐴠𐴌 𐴀𐴞𐴥𐴃𐴝𐴌𐴝𐴌𐴠 𐴀𐴝𐴣𐴀𐴌𐴝 𐴃𐴡𐴑𐴡𐴓𐴞𐴉𐴢 𐴕𐴡 𐴊𐴞,²⁰𐴁𐴡𐴥𐴓𐴑𐴠 𐴀𐴝𐴣𐴀𐴌𐴝 𐴀𐴞𐴥𐴃𐴝𐴌𐴝𐴌 𐴇𐴝𐴣𐴏𐴠 𐴀𐴠𐴕𐴊𐴞𐴓𐴧𐴝 𐴓𐴠𐴑𐴞𐴥, 𐴀𐴞𐴥𐴃𐴝𐴌𐴝 𐴎𐴠𐴕 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴕𐴝𐴉𐴝𐴑 𐴈𐴝𐴥𐴕𐴝 𐴕𐴝 𐴈𐴝𐴥𐴀, 𐴎𐴠𐴕𐴝𐴤 𐴕𐴡 𐴒𐴡𐴌𐴠𐴥, 𐴒𐴡𐴓𐴝 𐴏𐴞𐴁𐴞 𐴔𐴝𐴌𐴞𐴉𐴠𐴥𐴓𐴝𐴘𐴧𐴝 𐴅𐴝𐴕𐴟𐴖𐴝𐴌𐴡𐴌 𐴒𐴟𐴏𐴧𐴡 𐴕𐴝 𐴈𐴝𐴥𐴀, 𐴀𐴠𐴊𐴧𐴠 𐴓𐴡𐴖𐴢 𐴕𐴝 𐴈𐴝𐴥𐴀.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴃𐴡 𐴀𐴝𐴒𐴡𐴌 𐴎𐴡𐴁𐴝𐴕𐴝𐴃𐴧𐴟 𐴓𐴡𐴥𐴃𐴞 𐴉𐴡𐴃𐴧𐴞𐴥 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌, 𐴀𐴝𐴦𐴌 𐴉𐴡𐴃𐴧𐴞𐴥 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴃𐴠𐴓𐴝𐴖𐴡𐴃𐴢 𐴒𐴡𐴌𐴝𐴥 𐴎𐴝𐴌.“

𐴔𐴟𐴅𐴞𐴓𐴞𐴥𐴐𐴡𐴌 𐴎𐴟𐴖𐴝𐴁𐴢

²²𐴁𐴝𐴦𐴊𐴠 𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴠 𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴓𐴡𐴥𐴘 𐴔𐴞𐴓𐴞 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴠𐴥 𐴊𐴠, 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴡𐴦𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴁𐴝𐴏𐴞𐴥𐴓𐴡𐴘 𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴡𐴌 𐴉𐴟𐴥𐴖𐴝𐴣𐴃𐴞 𐴀𐴠𐴕𐴄𐴞𐴘𐴡𐴑𐴡𐴃𐴢 𐴊𐴞𐴉𐴠𐴍𐴝𐴥𐴘𐴁𐴡. 𐴀𐴞𐴥𐴃𐴝𐴌𐴝 𐴁𐴝𐴏𐴞𐴥𐴓𐴡𐴘𐴧𐴠 𐴊𐴠 𐴀𐴡𐴥𐴙𐴓𐴊𐴠, 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴁𐴟𐴥𐴃𐴡𐴌𐴠 𐴏𐴡𐴥𐴊𐴧𐴝𐴌 𐴀𐴝𐴐𐴧𐴞𐴥𐴓𐴢 𐴊𐴠 𐴘𐴡𐴇𐴟𐴥𐴊𐴝 𐴌𐴠, 𐴎𐴞𐴁𐴝𐴤𐴌𐴠 𐴁𐴝𐴌𐴏𐴝𐴥𐴁𐴝 𐴁𐴡𐴥𐴓𐴞 𐴈𐴡𐴀, 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢 𐴀𐴡𐴌𐴠.²³𐴃𐴝𐴌𐴝𐴥𐴌 𐴀𐴝𐴥𐴃𐴝 𐴀𐴞𐴥𐴃𐴝𐴌𐴝 𐴀𐴠 𐴐𐴠𐴣𐴍𐴞𐴥 𐴒𐴝𐴥𐴕 𐴊𐴞𐴉𐴠𐴍𐴝𐴥𐴙𐴓𐴢:
”𐴀𐴠𐴕𐴄𐴞𐴘𐴡𐴑 𐴀𐴡𐴃𐴢, 𐴏𐴞𐴀𐴌𐴞𐴘𐴝𐴃𐴢, 𐴑𐴞𐴓𐴞𐴐𐴞𐴥𐴘𐴝𐴃𐴢 𐴀𐴝𐴏𐴡𐴤 𐴊𐴠 𐴁𐴠𐴘𐴡𐴇𐴟𐴥𐴊𐴞 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕, 𐴃𐴟𐴣𐴀𐴝𐴥𐴌𐴝𐴌 𐴁𐴝𐴥𐴘𐴧𐴝𐴙𐴕 𐴀𐴝𐴣𐴀𐴌𐴝 𐴏𐴝𐴥𐴇𐴝𐴁𐴞 𐴒𐴟𐴥𐴕𐴡𐴌 𐴀𐴠𐴊𐴧𐴠 𐴁𐴟𐴎𐴟𐴌𐴒𐴡𐴥 𐴀𐴡𐴥𐴑𐴧𐴡𐴓𐴡𐴌 𐴃𐴡𐴌𐴉𐴡𐴥𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴓𐴝𐴔.

²⁴”𐴀𐴝𐴣𐴀𐴌𐴝 𐴉𐴟𐴥𐴙𐴕𐴧𐴞 𐴊𐴠, 𐴀𐴝𐴣𐴀𐴌𐴝𐴌 𐴈𐴠𐴥𐴕𐴃𐴟 𐴇𐴡𐴦𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴀𐴝𐴣𐴀𐴌𐴝𐴌 𐴇𐴡𐴕𐴡𐴤 𐴇𐴡𐴥𐴑𐴟𐴔 𐴏𐴝𐴥𐴌𐴝 𐴀𐴝𐴀𐴘𐴢 𐴃𐴟𐴣𐴀𐴝𐴥𐴌𐴝𐴌𐴠 𐴃𐴝𐴌𐴝𐴥𐴌 𐴈𐴡𐴃𐴝𐴤 𐴓𐴡𐴥𐴘 𐴉𐴠𐴌𐴠𐴐𐴝𐴕 𐴒𐴡𐴙𐴅𐴧𐴠𐴥, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴊𐴟𐴑 𐴊𐴞𐴘𐴠𐴥.²⁵𐴇𐴠𐴥𐴃𐴡𐴓𐴧𐴝 𐴀𐴝𐴣𐴀𐴌𐴝 𐴁𐴠𐴒𐴧𐴟𐴥𐴕𐴠 𐴌𐴝𐴎𐴞𐴌𐴡𐴁𐴧𐴡𐴃𐴢 𐴀𐴡𐴥𐴘 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴞𐴥 𐴊𐴠, 𐴇𐴡𐴦𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴁𐴝𐴏𐴞𐴥𐴓𐴡𐴘 𐴃𐴟𐴣𐴀𐴝𐴥𐴌𐴝𐴌 𐴇𐴠𐴥𐴍𐴠 𐴀𐴝𐴣𐴀𐴌𐴝𐴌 𐴀𐴝𐴊𐴡𐴙𐴅𐴧𐴝 𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴂𐴝𐴥𐴀𐴟𐴓𐴡𐴌 𐴉𐴟𐴥𐴖𐴝𐴣𐴃𐴞 𐴊𐴞𐴉𐴠𐴍𐴝𐴥𐴘 𐴁𐴡𐴓𐴧𐴝.²⁶𐴁𐴝𐴥𐴌𐴕𐴝𐴁𐴝𐴏𐴢 𐴀𐴠𐴊𐴧𐴠 𐴂𐴝𐴥𐴀𐴟𐴓𐴢 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝𐴌 𐴔𐴝𐴓𐴞𐴑 𐴀𐴞𐴏𐴝𐴤 𐴔𐴡𐴀𐴏𐴞𐴤𐴌 𐴕𐴝𐴔𐴡𐴌 𐴖𐴝𐴏𐴃𐴠𐴥 𐴕𐴞𐴎𐴡𐴌 𐴎𐴝𐴕 𐴇𐴡𐴥𐴃𐴝𐴌𐴝𐴃𐴢 𐴉𐴠𐴥𐴓𐴝𐴘𐴧𐴠.²⁷𐴀𐴝𐴣𐴀𐴌𐴝 𐴘𐴡𐴇𐴟𐴥𐴊𐴝𐴌𐴠 𐴀𐴠𐴊𐴧𐴠 𐴏𐴞𐴥𐴓𐴝𐴏𐴡𐴌𐴠 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴙𐴌, 𐴎𐴠𐴃𐴝𐴌𐴝𐴤 𐴕𐴞𐴎𐴡𐴌 𐴔𐴟𐴑𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴣𐴀𐴌𐴝 𐴓𐴠𐴙𐴑𐴧𐴞𐴥 𐴊𐴠 𐴇𐴞𐴥𐴀𐴕 𐴉𐴡𐴌𐴞𐴥 𐴉𐴟𐴥𐴕𐴝𐴘𐴁𐴡.²⁸𐴂𐴝𐴑-𐴌𐴟𐴀𐴃𐴧𐴟 𐴀𐴠𐴊𐴧𐴠 𐴀𐴝𐴣𐴀𐴌𐴝𐴃𐴧𐴟 𐴒𐴡𐴔 𐴓𐴝𐴙𐴒𐴧𐴠𐴥 𐴊𐴠, 𐴀𐴠 𐴎𐴡𐴌𐴟𐴌𐴞 𐴈𐴡𐴃𐴝𐴤 𐴒𐴟𐴥𐴕 𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴀𐴝𐴌 𐴇𐴡𐴕𐴡𐴤 𐴉𐴟𐴣𐴎𐴝𐴤 𐴃𐴟𐴓𐴞𐴤 𐴕𐴡 𐴊𐴞 𐴁𐴡𐴓𐴧𐴝,²⁹𐴑𐴞 𐴈𐴡𐴘𐴓𐴠𐴥, 𐴃𐴟𐴣𐴀𐴝𐴥𐴌𐴝 𐴔𐴟𐴃𐴧𐴞𐴌 𐴇𐴝𐴣𐴏𐴠 𐴑𐴟𐴌𐴁𐴝𐴕𐴞 𐴊𐴞𐴘𐴝 𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴢 𐴕𐴝 𐴈𐴝𐴥𐴘𐴧𐴡, 𐴓𐴡𐴖𐴢 𐴕𐴝 𐴈𐴝𐴥𐴘𐴧𐴡, 𐴒𐴡𐴓𐴝 𐴏𐴞𐴁𐴞 𐴔𐴝𐴌𐴞𐴉𐴠𐴥𐴓𐴝𐴘𐴧𐴝 𐴅𐴝𐴕𐴟𐴖𐴝𐴌𐴡𐴌 𐴒𐴟𐴏𐴧𐴡 𐴕𐴝 𐴈𐴝𐴥𐴘𐴧𐴡, 𐴀𐴠𐴊𐴧𐴠 𐴎𐴠𐴕𐴝𐴤 𐴕𐴡 𐴒𐴡𐴌𐴞𐴥𐴘𐴡. 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴒𐴡𐴌𐴝𐴥𐴃𐴧𐴟 𐴁𐴝𐴏𐴞 𐴃𐴝𐴥𐴑𐴡, 𐴁𐴝𐴥𐴓𐴝 𐴀𐴡𐴥𐴘𐴁𐴡. 𐴑𐴟𐴥𐴊𐴝 𐴇𐴝𐴥𐴉𐴞𐴎𐴢.“

³⁰𐴁𐴝𐴦𐴊𐴠 𐴃𐴝𐴌𐴝𐴥𐴌𐴠 𐴊𐴞𐴉𐴠𐴍𐴝𐴥 𐴒𐴞𐴥𐴘𐴠, 𐴀𐴝𐴦𐴌 𐴃𐴝𐴌𐴝𐴥 𐴕𐴞𐴏𐴠 𐴀𐴠𐴕𐴄𐴞𐴘𐴡𐴑𐴡𐴃𐴢 𐴒𐴞𐴦𐴘𐴠𐴥. 𐴇𐴠𐴥𐴍𐴠 𐴃𐴝𐴌𐴝𐴥 𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴎𐴡𐴔𐴝 𐴒𐴡𐴌𐴞𐴥 𐴐𐴠𐴣𐴍𐴞𐴥 𐴒𐴝𐴥𐴕 𐴊𐴞𐴦𐴘𐴠𐴥.³¹𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴐𐴠𐴣𐴍𐴞𐴥 𐴒𐴝𐴥𐴕 𐴉𐴡𐴌𐴞𐴥 𐴕𐴡𐴏𐴞𐴥𐴘𐴡𐴃𐴞 𐴈𐴡𐴃𐴝𐴤 𐴓𐴡𐴦𐴃𐴢 𐴉𐴝𐴘𐴧𐴠𐴥 𐴌𐴝𐴥𐴌, 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴧𐴠.³²𐴘𐴡𐴇𐴟𐴥𐴊𐴝 𐴀𐴠𐴊𐴧𐴠 𐴏𐴞𐴥𐴓𐴝𐴏𐴢, 𐴎𐴠𐴃𐴝𐴌𐴝𐴤 𐴕𐴞𐴎𐴠 𐴕𐴡𐴁𐴞, 𐴃𐴝𐴌𐴝𐴥 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌𐴠 𐴁𐴡𐴀𐴗𐴃𐴢 𐴈𐴡𐴃𐴝𐴤 𐴓𐴡𐴥𐴘 𐴕𐴡𐴏𐴞𐴥𐴘𐴡𐴃𐴢 𐴒𐴡𐴙𐴅𐴧𐴞𐴥𐴓𐴢 𐴀𐴠𐴊𐴧𐴠 𐴔𐴡𐴎𐴁𐴟𐴃𐴢 𐴒𐴡𐴙𐴅𐴧𐴞𐴥𐴓𐴢.³³𐴃𐴝𐴌𐴝𐴥 𐴇𐴠𐴥𐴍𐴠 𐴁𐴡𐴀𐴗𐴃𐴢 𐴊𐴞𐴕 𐴃𐴝𐴥𐴑𐴞 𐴁𐴝𐴦𐴊𐴠, 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴃𐴝𐴌𐴝𐴥𐴌𐴠 𐴐𐴝𐴥𐴕𐴃𐴞𐴌 𐴊𐴟𐴖𐴝 𐴓𐴡𐴘 𐴁𐴞𐴊𐴝𐴘 𐴊𐴞𐴘𐴠𐴥, 𐴎𐴠𐴀𐴕𐴠 𐴎𐴠𐴃𐴝𐴌𐴝𐴤 𐴃𐴝𐴌𐴝𐴥𐴌𐴠 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴃𐴝𐴌𐴝𐴥 𐴖𐴝𐴦𐴉𐴠𐴏𐴢 𐴎𐴝𐴘𐴒𐴡𐴥𐴘 𐴉𐴝𐴌𐴠.³⁴𐴓𐴠𐴑𐴞𐴕 𐴏𐴞𐴥𐴓𐴝𐴏𐴡𐴃𐴧𐴟 𐴇𐴠𐴥𐴍𐴠 𐴃𐴝𐴥𐴀𐴘𐴎𐴝 𐴒𐴡𐴔 𐴓𐴝𐴙𐴒𐴧𐴞𐴥𐴓𐴢.³⁵𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴢 𐴀𐴡𐴥 𐴀𐴠𐴕𐴄𐴞𐴘𐴡𐴑𐴡𐴃𐴢 𐴀𐴝𐴌𐴡𐴤 𐴃𐴝𐴥𐴙𐴑𐴧𐴞𐴓𐴢, 𐴀𐴝𐴦𐴌 𐴇𐴠𐴥𐴍𐴠 𐴃𐴝𐴌𐴝𐴥 𐴀𐴝𐴌𐴡𐴤 𐴁𐴞𐴐𐴞𐴤 𐴔𐴝𐴙𐴕𐴐𐴡𐴥𐴌 𐴉𐴟𐴥𐴖𐴝𐴣𐴃𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔𐴡𐴌 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴀𐴠𐴊𐴧𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

𐴂𐴝𐴥𐴀𐴟𐴓𐴢 𐴀𐴠𐴊𐴧𐴠 𐴁𐴝𐴥𐴌𐴕𐴝𐴁𐴝𐴏𐴢 𐴏𐴞𐴥𐴌𐴝 𐴀𐴡𐴥𐴘𐴒𐴞𐴘𐴡𐴘

³⁶𐴇𐴡𐴦𐴊𐴧𐴞𐴕 𐴁𐴝𐴦𐴊𐴠 𐴂𐴝𐴥𐴀𐴟𐴓𐴠 𐴁𐴝𐴥𐴌𐴕𐴝𐴁𐴝𐴏𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴎𐴠 𐴐𐴡𐴥𐴀𐴌 𐴒𐴟𐴥𐴕𐴡𐴃𐴢 𐴔𐴝𐴓𐴞𐴑𐴡𐴌 𐴑𐴝𐴓𐴝𐴔 𐴃𐴡𐴁𐴡𐴓𐴞𐴑 𐴒𐴡𐴙𐴅𐴧𐴞𐴥𐴓𐴝𐴔 𐴇𐴞𐴥𐴀𐴕𐴡𐴃𐴢 𐴖𐴝𐴦𐴉𐴠𐴏𐴢 𐴎𐴝𐴘 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴀𐴡𐴥𐴑𐴧𐴡𐴓𐴢 𐴑𐴠𐴀𐴕 𐴀𐴝𐴏𐴠𐴤 𐴏𐴝𐴀𐴘𐴒𐴡𐴘.“³⁷𐴁𐴝𐴥𐴌𐴕𐴝𐴁𐴝𐴏𐴠 𐴘𐴡𐴇𐴝𐴥𐴕𐴧𐴝𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴘𐴎𐴝𐴘𐴃𐴡𐴥 𐴏𐴝𐴀𐴙𐴓𐴢. 𐴇𐴠𐴥 𐴘𐴡𐴇𐴝𐴥𐴕𐴧𐴝𐴌𐴠 𐴔𐴝𐴌𐴑𐴟𐴏𐴢 𐴈𐴡𐴀𐴘𐴢 𐴘𐴡𐴥 𐴋𐴝𐴑𐴠.³⁸𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴀𐴞𐴥𐴁𐴝𐴌𐴠 𐴓𐴡𐴘𐴎𐴡𐴕 𐴒𐴡𐴔 𐴕𐴡 𐴀𐴡𐴥𐴘𐴁𐴡 𐴁𐴡𐴓𐴞 𐴁𐴝𐴥𐴙𐴂𐴧𐴞𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴝𐴥𐴌 𐴀𐴝𐴒𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴂𐴝𐴔𐴂𐴟𐴥𐴓𐴞𐴘𐴝𐴃𐴢 𐴉𐴠𐴥𐴓𐴝𐴘 𐴎𐴝𐴘 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴔 𐴀𐴝𐴌 𐴕𐴡𐴥 𐴒𐴡𐴌𐴠𐴥.³⁹𐴇𐴞𐴥𐴘𐴝𐴕𐴡𐴓𐴧𐴝 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴀𐴕 𐴃𐴡𐴌𐴑𐴝𐴃𐴡𐴌𐴑𐴞 𐴀𐴡𐴥𐴘𐴧𐴠 𐴎𐴠𐴀𐴕 𐴕𐴞𐴥𐴑𐴞 𐴀𐴞𐴥𐴃𐴝𐴌𐴝 𐴀𐴠𐴎𐴧𐴡𐴕𐴡𐴃𐴧𐴟 𐴀𐴠𐴎𐴧𐴡𐴕 𐴏𐴞𐴥𐴌𐴝 𐴀𐴡𐴥𐴘𐴒𐴞𐴘𐴡𐴘. 𐴁𐴝𐴦𐴊𐴠 𐴁𐴝𐴥𐴌𐴕𐴝𐴁𐴝𐴏𐴠 𐴔𐴝𐴌𐴑𐴟𐴏𐴡𐴌𐴠 𐴉𐴟𐴥𐴖𐴝𐴣𐴃𐴞 𐴓𐴡𐴦𐴘𐴢 𐴎𐴝𐴀𐴣𐴏𐴡𐴃𐴢 𐴒𐴡𐴥𐴌𐴞 𐴏𐴝𐴥𐴘𐴉𐴌𐴟𐴏𐴡𐴓𐴧𐴝 𐴁𐴝𐴐𐴝𐴥 𐴓𐴡𐴥𐴘𐴧𐴠.⁴⁰𐴔𐴡𐴕𐴃𐴡𐴌 𐴂𐴝𐴥𐴀𐴟𐴓𐴠 𐴏𐴞𐴥𐴓𐴝𐴏𐴡𐴌𐴠 𐴁𐴝𐴙𐴐𐴧𐴠𐴥, 𐴀𐴝𐴦𐴌 𐴀𐴞𐴔𐴝𐴕𐴊𐴝𐴥𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴔𐴝𐴓𐴞𐴑𐴡𐴌 𐴌𐴝𐴇𐴝𐴥𐴔𐴡𐴃𐴡𐴌 𐴀𐴝𐴥𐴃𐴡𐴃𐴢 𐴒𐴡𐴏𐴝𐴥𐴘𐴊𐴞 𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴌𐴡𐴖𐴝𐴕𐴝 𐴓𐴡𐴘𐴧𐴠𐴥,⁴¹𐴀𐴝𐴦𐴌 𐴎𐴡𐴔𐴝𐴥𐴃𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴀𐴞𐴔𐴝𐴕𐴡𐴃𐴢 𐴔𐴡𐴎𐴁𐴟𐴃𐴢 𐴒𐴡𐴌𐴝𐴥𐴘-𐴒𐴡𐴌𐴝𐴥𐴘 𐴏𐴞𐴀𐴌𐴞𐴘𐴝 𐴀𐴠𐴊𐴧𐴠 𐴑𐴞𐴓𐴞𐴐𐴞𐴥𐴘𐴝 𐴁𐴝𐴥𐴘 𐴎𐴝𐴦𐴃𐴢 𐴊𐴡𐴙𐴅𐴧𐴠.

The Word for the World International

https://app.library.bible/content/87faca8b51c22590