2 Timothy2
1Yơu nữn, ơ anàq kơu, anàq iỡuq ngãq ga drơi tơviãq jỡc prãn khãc dơlãp kaya anĩt di Yàc Dõc Pơ-tlah Je-su.2Dơgrữq kaya anàq song hmỡq mưng anĩh kơu pãq khrãh lũ mơnuĩh ngãq chưng, iỡuq pơjao pơnõq nhũ ga dơgrữq mơnuĩh đang mang sì chàc gơnang nữn pơnõq nhũ kung ròq hũ kaya rgơi thơu pioh pơto pơđar mơnuĩh tơmo.3Iỡuq ãt dleh dlàr sigỡuq sì kơu, yơu sa aràc mơnuĩh lĩng jãc Yàc Dõc Pơ-tlah Je-su hũ.4Tũq duh vruãq dơlãp tơpuôl lĩng, ôh asơi vloh luơi ga drơi kađòc tơwãq dơgrữq vruãq rài hadiuq vual vơla hũ, pioh ga mơnuĩh duh vruãq dơlãp tơpuôl ling nữn pơlih hũ ngãq siàp hatai mơnuĩh song iơu ruãh drơi.5Kung yơu nữn, tũq nữn hũ mơnuĩh nữn tơma dơlãp kaya pa-lòc prãn, mơnuĩh nữn ròq ôh hũ tồq mãq sagỡn vơngà pha rlao mơyah làiq ôh hũ nữn pơlòc tui voh-va.6Mơnuĩh ngãq apôh hamã tơriãc ahmãc iỡuq hũ tồq hajũc hlàq hlơu avih.7Iỡuq sanơng dơlãp hatai kaya kơu ãn đơp sì anàq, kơyua Yàc ròq vrơi ga anàq kaya thơu pãc dơlãp dơgrữq vruãq.8Iỡuq sơdor trôh Yàc Dõc Pơ-tlah Je-su, song hũ ngãq hadiuq wỡq mưng anĩh mơtai, pơweh gah pơjẽh pơtiàt Da-vĩt, tui yơu Pơnuaĩq Siàp kơu hũ,9kơyua Pơnuaĩq siàp nữn, kơu ãt dleh dlàr tơviãq jỡc gui kađòc akãq srẽng yơu sa aràc mơnuĩh sỗq dlàiq. Bôh làiq pơnuaĩq Yàc Pô Lơngĩq ôh kađòc akãq ôh.10Kơyua yơu nữn, kơu ãt-ỡl dơgrữq kaya kơyua dơgrữq mơnuĩh hũ duỡt ruãh, pioh pơnõq nhũ kung pơlih hũ kaya dõc pơ-tlah dơlãp Yàc Dõc Pơ-tlah Je-su, sigỡuq sì kaya gơhluh gãm gãm.11Pơnuaĩq nĩ la đang mang chàc gơnang:“Kơyua mơyah làiq pơnõq drơi song mơtai sì Pitrai, nữn pơnõq drơi kung ròq hadiuq sì Pitrai.12Mơyah làiq pơnõq drơi ãt-ỡl jỡc, nữn pơnõq drơi kung ròq apãt akõq sigỡuq sì Pitrai.Mơyah làiq pơnõq drơi kơmlah luơi Pitrai, nữn Pitrai kung ròq kơmlah luơi pơnõq drơi.13Mơyah làiq pơnõq drơi ôh tui tơpãq, nữn Pitrai ròq miẽt gãm tui tơpãq,kơyua Pitrai pơlih ôh tũq halơi kơmlah luơi drơi jỡc.”14Iỡuq pa-sơdor mơnuĩh pãc-tui yàc dơgrữq kaya nữn, dơlãp tũq pơto pơđar pơnõq nhũ pãq anãq Yàc Pô Lơngĩq vloh juơi hũ gơrlah pơnuaĩq mưng ơkhar gơtha, kơyua ôh hũ kuơ màc hagĩq, mĩn va trôh kaya pa-lơhiãq pơweh sì mơnuĩh hmỡq.15Iỡuq ngãq avih hatai sì avih prãn yua pioh ràc tơviãq mĩn rùp phàp anàq yơu mơnuĩh ngãq chưng viãq pãq anãq Yàc Pô Lơngĩq, la sa aràc mơnuĩh ngãq vruãq ôh malơu ơlah, pơto akhàt nĩq nũn mưng pơnuaĩq tơpãq.16Vơnah tơmo, iỡuq pleh dơgrữq vruãq pơnuaĩq vơyai iãh dun kơyua, kơyua nhũ nữn ròq va trôh kaya ôh duh huaĩq brõq rlao,17sì pơnuaĩq đơp vơyai ga dơgrữq mơnuĩh nữn ròq tơviãq jỡc kaya tơbàq tom drưh yơu kơtiãc tòc va pãq kaya mơtai, nữn dơlãp katih nữn hũ Hy-me-ne sì Phi-let,18dơgrữq mơnuĩh song nao sỗq suẽl pơweh sì pơnuaĩq tơpãq, tũq đơp làiq kaya hadiuq wỡq song tơviãq trôh vloh, sì pơnõq nhũ ãn ngãq pa-lơhiãq voh tui hũ sa tơkìq mơnuĩh.19Bôh làiq, kaya ranỡq khãc gơjãp Yàc Pô Lơngĩq hũ ròq dòq dữc gơjãp, sì hũ pơnuaĩq ngãq chưng nĩ: “Yàc thơu mơnuĩh halơi pơweh sì Pitrai” sì “Mơnuĩh halơi rãn lakơu mãq angãn Yàc iỡuq kadũn ơtah tlah di kaya ôh tơpãq dãng.”20Vơnah tơmo, dơlãp sa voh sàc prõng, ôh mĩn hũ kadoh mưng mữh sì priãq, nữn gãm mưng kayơu sì hlùq tliãq, hũ sa katih pioh angui ga vruãq mơ-àc mơyàc, sì hũ katih tơmo nữn pioh angui ga vruãq ôh kua la vơhiãn.21Yơu nữn, mơyah làiq asơi song sapỡq rao ngãq sơchih drơi tlah dơgrữq kaya nữn, sì mơnuĩh nữn ròq la sa voh kadoh angui ga vruãq mơ-àc mơyàc, hũ mãq chẽq krơi, hũ kuơ pơweh sì Pô, hũ rơchãc lơĩh ga dơgrữq vruãq siàp.22Iỡuq pleh atah tlah dơgrữq kaya ham ưng krơi mơnuĩh lơđeh thũt, sì pagui tui kaya tơpãq dãng, voh tui, kaya khiãng duman, sigỡuq sì kaya salơnuãq sigỡuq gãm sì dơgrữq mơnuĩh iơu lakơu Yàc mưng tũc hatai sơđah sơchih.23Nữn iỡuq kơmlah luơi dơgrữq kaya đơp prơjai gơla pơtòq sì ôh iỡuq, kơyua thơu làiq pơnõq nhũ mĩn pơcheh tơviãq kaya gơrlah pơnuaĩq.24Mơnuĩh halỗt mơnãq Yàc hũ ôh tũq halơi đơp kaya gơrlah gỡuq, nữn iỡuq ki ngãm sì dơgrữq mơnuĩh, hũ kaya jãc thơu rgơi pơto pơđar, ãt-ỡl,25tũq mĩn đơp dơgrữq mơnuĩh sòq jơdrãq drơi sigỡuq sì kaya lơmuỡn siàp, thơu mĩn hũ Yàc Pô Lơngĩq ròq vrơi ga pơnõq nhũ hatai mơvai tlàq dlàiq pioh thơu pãc pơnuaĩq tơpãq,26nữn pơnõq nhũ pơlih thơu kơnãl wỡq tơviãq tlah suãh di vơnrẽq kamlai hũ, hadơi sì tũq kađòc nhũ mãq krỡq pioh ngãq tui hatai nhũ.
FAR EAST BROADCASTING COMPANY