गलाती5
1मोकलायीइ कोअते ख्रिस्ते आपुहूं सुटका आप्यीही; तियाहा काजे इंहींमेहें टिकीत रोवा, आन गुलामीइ जुहरोम फाशेए मा जुपाअहा.2पाला! आंय पौलुस तुमुहूं कोहो के जर खतना कोआड़हा, ताहां ख्रिस्ताप रोत तुमुहूं किज ने जोड़नारो.3फाशोअ बी आंय हारेक खतना कोअनाराहा वारुहूं कोत देहो के, तियाहा पुरु कायदु मानुहूं पोड़े.4तुमू जे कायदा वाअहीं धर्मी ठरिइलोअ इतवीइतेहे, तुमू ख्रिस्ता रोत अलग आन मेरवानी रोत दुर गोयेहे.5काहाके आपाआ विश्वासोवाईं काम कोअनारा देवोअ आत्माआं सेक्ती वाईं आमू आशा कोइत सतीपणोअ वाट जोवताहा.6ख्रिस्ता ईसुमेहें खतना आन बिगर खतना किज कामोअ कायनाहां, पोन विश्वास कोइलोअ कामोअ होय, जो मेरेवाईं काम कोअहे.7तुमू जास्ती हाजे काम कोअतेते, पोन ओमे सत्याहा मा मानहां एहें कोत तुमुहूं कोडे रुकी देदे?8तुमाआं हादनारा देवोअ तरफ से एहेलिही हिकवोण कायनाहां.9वाहींज एतोहो खमीर पुरा केलवीइल्या लोटोहो फुगाड़ी देहे.10तुमाआं बाप्तिम प्रभु मेहें माहूं भरिवसू होय, कि तुमू बिहीरु किज विसार ने कोअहा, पोन जों तुमुहूं घोटाड़ाम पाड़ेहे तों कोडो बी ओय, तियाहा देव डोंड आपेज.11ताहां पाव्हीइला, आंय जर ओमे जाआं खतनाआ परसार कोअतुये, ताहां ओमे जाआं मापोअ सतावणी काहा ओवेहे? तेहें कोइत रोतो, ताहां ख्रिस्ताआ क्रुस खांबोअ अड़सनुज निहींत जाती.12जे तुमुहूं घोटाड़ाम पाड़ताहा, तेज सोताहा इजड़ाआ होस ओत जाता, तों जाआं हाजो आवतो.13माआं पाव्हीइला, तुमुहूं मोकले ओवे तेहें काजे हाद्येहे; पोन ते बी यी मोकलायीही शारीरिक लालस पुरी कोइलोअ सान्सो मा आपहा, पोन मेरे वाअहीं एकान एकाआ सेवा कोआ.14काहाके आखा कायदा या एकाज नियमोम पुरा ओत जाताहा: “तू ताआ जागेवालापोअ सोताआ होस मेर कोअ.”15पोन जर तुमू एकान बिहीराअरी सुंदाअहा आन टेकाअहा, ताहां हेएजा! एखाआ सत्यानाश मा कोई देहा.16पोन आंय कोहो, आत्मा वाअहीं सालहा, ताहां तुमू शरीरोअ लालस नेज पुरी कोइत सेकहा.17काहाके शरीर आत्माआं विरुद्दाम आन आत्मा शरीरोअ विरुद्दाम लालस कोअहे आन एं बेनू एकान एकाआ विरुद्दाम होये. तिहींज वाईं जों तुमू पोटेहे तों नाहां कोइत सेकाअतो.18आन जर तुमुहूं आत्मा सालाड़तुय, ताहां तुमू कायदाआ बांदाअले कायनाहां.19शरीरोअ कामे ताम खुल्ले देखाअतेहें, मोन्ज्ये सिनालो, सोगदाय, लुसड़ाय;20मुर्तीपुजा, मंतर-तंतर, दुस्मोनी, भान्गड़, खोद्राय, खोताइलोअ, विरोध कोइलोअ, फाटाफुट कोइलोअ, टोला पाड़ीइलोअ,21टुड्राय, पिदाड़, नशामेहें नासीइलोअ आन यांआं होसऱ्येए वारुज कामे होय, यांआं बाप्तिमेहें आंय तुमुहूं पेलुज कोत सुकुहू आन ओमे बी कोत देहो के, एहेलेहे कामे कोअनारे देवोअ राज्याआ वारीस नाहां ओवनारे.22पोन आत्माआं फल मेर, खुसी, होक, धिर, मेरवानी, भलाय, विश्वास,23नम्रता,आन संयम होय; यां कामोअ विरुद्धामेहें कोड्लूज नियम कायनाहां.24आन जें माहें ख्रिस्त ईसुउ होय, तियां शरीर सोभावोहो लोभ लालसनेहें आरीज क्रुस खांबोपोअ लटकाड़ी देदोहो.25जर आपू आत्मा वाअहीं जिवते होय, ताहां आत्मा वाईं सालुहूं बी जोवे.26आपू वोडाऱ्ये बोणीत एकान बिहीराहा ने खिजवुहूं जोवे आन आद्राय बी ने कोअहूं जोवे.
The Word for the World International