Matthew23
1Pecai Jisu mina maadibe nah pa ledeukelume dage marang gai,2Pa rangdi, “Laisiukecime nah Phariseeme Moses bam ga bamla.3Cine penui nnuide tei lulo rang kebeu leune mzai, nah ma cidungde mnei lu maisia. Dede penui tadung nzwa tei so, kedanemene penui ledeu la, dede penui tei mzai la melu.4Penui hepüt kerütdung, nah pung pa gai kelakdung kanglu delwe mina hekeutudung gage penui mpüt kai beula. Dede penui zurang le de cidungde deu kelai neu de lama.5Penui ta leune peu mina de ngau kerane tei lala. Kedanemene penui kesanglaisiu samdumdung de teimdi, nah penui pairidung de penui tei mtie eh lala.6Penui ketaktyei ngyidung ga heni yitubedung nah synagoguedung ga hebam ditubedung ga bam neula,7nah litaknidung gade mine kelum kecu nah ‘Keledeubo’ de kequ penui suiyi la.8Dede mide peu nnuide ‘Keledeubo,’ de quso, kedanemene nnui keledeube au ket nah nnui pelane au ciaherei swacingme ciau lu.9Nah kideu ga nnui hangge dede ‘Peibo,’ de eh quso, kedanemene nnui pei au tinggim ga kebambe rünne gwale melu.10Nnuide peu, ‘Keledeubo,’ de eh quso, kedanemene Khrista rünne nnui keledeube kecune.11Dede nnui kakgade ditube de peu nnui kila teizie.12Keheibe de pekatei pecu tei cehu kecube de tei henah dizie, nah keheibe de pekatei pecu tei henah kelabe de tei cehu beuzie.13Dede ainie nnui laisiukecime nah Phariseeme, nah hezai teikelame! Nnui tinggim hegwangram minadung ziemne ngkui dida. Kedanemene nnuikatei de cika lüt lama, nah cika lütlai eh kelamede de nnui peu lüt lama kecune.14 [Ainie nnui, laisiukecime nah Phariseeme, hezaiketeime! Kedanemene nnui hemipuime mabamdung tyei lula, delwe nnui hezaitei eh kekie tei tiela.] Ciziemne nnui saja hungki kecu ngau zie.15Ainie keherei nnuida gwang zieda! Laisiukecime nah Phariseeme, hezaiketeime! Kedanemene nnui mige lung tei nreulu kerane jaaidi nah hangdeu kecangdung kah gwangla, nah pa ciciu luge, nnui pecu mijaai ga gwang kera nnui kena kiee ge tei beula.16Ainie nnui, nnui miakcitme puisau tei kelame, nnui, ‘Keheibe de kerecaki de teu reset cai, cide magede ma. Dede keheibe de kerecaki kecak de teu reset cai, pe reset cide ne pecu kangla,’ de eh rang kelame.17Nnui kemiemedung nah miakcietmedung! Kecakbe mi kecak teimci beukela kerecakibe diki no?18Nah nnui, ‘Keheibede recabam de teu eh reset cai, cide au magede ma. Dede keheibe racabam reuga mtamapeu kebam de teu reset kecucai, pe reset cide ne pecu kangla,’ de eh rangla.19Nnui kemiemedung nah miakcietmedung! Mapeube dimi mi mapeu de teimci kebeu recabambe diki no?20Ciziemne, keheibe de recabam de teu reset cai, cide nah cika kebam pelane teu reset dida.21Mige kerecaki de teu reset kelabe, cide nah cika lungh kebambe de teu reset dida.22Nah mige tinggim teu eh reset kelabe Tinggwang hegwangbam nah cika kebambe de teu reset dida.23Ainie nnui, laisiukecime nah Phariseeme, hezaiketeime! Kedanemene nnui gi ceheibwa mihui nah dill nah cumin zikerei tei eh zige pwa peula, dede nnui hezai ga mtingki kecu, kemzeu nah ngaugia nah kenlum aidungde be tei mene gi dila. Dede nnui aidungde de tei kerabe, kedabedung de gidi mene.24Nnui miakcietme puisaumedung, nnui tamaine de au tim dila dede ut de au nneu lula!25Ainie nnui, laisiukecime nah Phariseeme, hezaiketeime! Kedanemene nnui hepiak nah hekwak hegwale au teimci dila, dede helungle au makehengin nah miziukeci le puipung bam.26Nnui miakciet Phariseemedung! Nnui hepiak nah hekwak helunglebie be huimci rai dilu, ciciu de cide hegwalebie de mcidi lubui.27Ainie nnui, laisiukecime nah Phariseeme, hezaiketeime! Nnui au heraudung hui ha pwa kebamde nzwa delie, cide hegwale de ngau hezuyi bamla, dede helung lebie de au ketsaime radung nah mci kemakbe leune pui bamla.28Cikesiak ge, nnui de mi dwade au kesamsangme nzwala, dede helung lebie au hezaiketei nah kesia le nnuide puipung.29Ainie nnui, laisiukecime nah Phariseeme, hezaiketeime! Nnui caihakecime raudung tei nah masang kelame raudung tei hezuyi bamla.30Nnui, ‘Anui anui paume tingdau lungh liecai, anui caihakecime jai teilwa kecu ga penuide ncütlak nage,’ de eh rangla.31Cine nnuikatei nnui caihakecime de dapketsetme name lie zierang tei bamla.32Nnui de nnui paumedung bata de teipui cang lulo.33Nnui heneidung, nnui neiduipui leuhmedung, nnui dainzwa eh mijaai tutiak gade mbailu laino?34Cine, ainie, Ih nnui dage caihakecime nah makecime nah laisiukecime de langgai zeu. Nnui kangge de teitset nah gwaktset, nah kangge de synagoguedung gade dap nah penuide namdi ge gade namdi ge gage gwa gaizie.35Cine makesangme jai kideu reuga teilwa kegai pelane nnui reu ga gwang zie, kesamsangbe Abel jai gade gwang, Barachiah napei Zechariah, nnui kemcini nah recabam kakgade daptset kedibe jai kecang.36Ih nnui dage rangsiakte gaila, ma aidungde pelane ceheu aipaude reuga gwang zie.37Jerusalem, Jerusalem, caihakecime nah n dage langkegaime de teitset nah tangtsu le sam kelabo! Nruipui pe name de pe hesiu kang gage gumlu kela nzwa, Ih daikenzwa gede n name de teu hekwalu neu no, dede nnui rau dida!38Ainie, nnui kerecaki gi dida nah mtamrwa dida.39Kedanemene Ih nnui dage rangla, nnui acu cu gade ngausi lakta, nnui, ‘Rampaube zi gade kegwangbe au samlam pungtu lie!’” de eh rang kemaktane.
Bridge Connectivity Solutions Pvt. Ltd.