Hezaidung20
1Nnui nnui ngauraume de regi kera tet kepet dau, nah hekündung, bagidung nah minadung nnui swa kieeki kecu ngau keludau, nnui penuide hing diso; kedanemene RAMPAUBE nnui Tinggwang nnuide ngngwa lalu, pa nnuide Egyptme deu gade ngngwa mpet kebeu be.2Nnui regi kera lüt lai kecu dwa, cingkupei tetpet maisia nah mina dage rang zie. 3Pa Israel reugwame dage rang zie, ‘Kingneilu, Israelme, nnui mie hereu ga nnui ngauraume de regi lauda. Nnui mlung peu ceu diso. Nnui ngngi di mede mbeu diso. Penuide hing diso.4Kedanemene RAMPAUBE nnui Tinggwang pane nnuide ngngwa mie zie nnui ziemne nnui ngauraume de regi nah nnuide kelibeu kera.’5Kedimedung minadung de mpau nah rangzie, ‘Aika cau peige ki keheci teilwe bamno nah cide tei mci mene? Peu pecu mie nah pe kilung ga cailigwanglu, iciude pa hereu gade tsaidi melu kerane nah kedame ne peki tei mci lak.6Aika mige kubetsi luh tei lwe petsi rai tyei mene bam ni? Peu pecu kilung miecu, iciu eh peu pecu hereu gade tsai di kelakne nah mipei kedame de peu petsi bui tyei teu dilak kerane. 7Aika mige laktak tei kera mipui gede naurang tei nzeu bam dede pecu ngngwalung mene bam reu ni? Peu pecu kilung gwang dilu iciude pecu hereu gade tsai dilak nah mipei kedame ne pecu ngngwa lung teu di melu kerane.’ 8Kedimedung minadung de mpau si dai nah rangzie, ‘Aika mige ngngi mede helung ceu eh cau bamno? Peu pecu tetcu nah pe kilung gwang dilu, iciude pe sinamebe mlung peu pe mlung nzwa ceudi melu kerane.’9Kedime minadung dage marang cangdi ge, penui penui reu reugwa muibe kedet bi luzie.10Nnui namdi ge gwaketang kera mie kecudau, cipaume de kezuyi bam kera rang beulu.11Magade penui nnui kepeu de luulu nah penui herieki nnuide ngkei beu cai, cika mina kebam pelane peu nnui ziemne kengküt ta teizie nah nnui gwa teizie. 12Dede cipau kezuyi nnuide peu mecai, meliene nnuide ngngwa hereu tei neu dicai, ciucai nnui penuide twagwalu maisia,13nah RAMPAUBE nnui Tinggwang nnuide kengkieng kepeu dau nah peu penuide nnui kangga keludau, nnui namceu ga mina leune de teitsetdi maisia.14Dede mipui, henamedung, hetum, nah namdi ga maleune kebam, nah penui gu rega kelu pelane, nnuikatei ziemne cidungde luu luzie. Nnui nnui ngauraume gu luulu zie, RAMPAUBE nnui Tinggwang ne nnuide kepeu de.15Nnui ainzwa eh namdi pelane nnui dade mdei süt kecu cidungde dage teigai maisia, namdidung aipau heleuhdung de gu kemak namdidung.16Aipau minadung namdidung ga RAMPAUBE nnui Tinggwang nnuide gum kera pwapeu kebam, nnui ma pelane kenggi keheibe de ngkap ciak dedi.17Meliene, nnui cidungde ngkap zing dedi maisia. Hittitme, Amoritme, Canaanme, Perizzitme, Hivitme nah Jebusitme, RAMPAUBE nnui Tinggwang nnuide aja kai kebeu nzwa.18Aide teilu ciude penui peu penui rabedung de kereca gade tei kela kemneudung pelane nnuide ledeu kelakne, penui penui rabedung de tei gai kecu nzwa. Magade nnui tei cai, nnui RAMPAUBE nnui Tinggwang dage kemau tei gaizie.19Nnui namdi ge de peting ketie ge cide de tuilu kerane hereu tei eh twagwa keludau, cide nnui tsingbangdung de nreu le cidungde bi diso, nnui namdi de ketiege gwa bam di liede. Kedanemene penui ziemne nnui tyei lubui, cine nnui cidungde bi diso. Kedanemene luh tsingbang de nnui ngauraume ni nnui cidungde tui kera?20Nnui tsingbang ci kebamdung de tyei kera bangdung kemakbe, nnui ngkapdi nah bi ngkau lubui; nnuide ngngwa hereu ketei namdi dage hereu tei kera bamdung tei zie, cide kaudi kemaktane.
Bridge Connectivity Solutions Pvt. Ltd.