लेव्य17
1ओवतो यहोवा मुसाह केयो,2“हारून एने तान सोराह एने इस्राएल ने आखा माणहाह के काय यहोवा ज्यो उकुम आपेल हे;3एगदो इस्राएली माणुह जो गाय ने एने मेंड्रान एने बोकड़ीन पिलाह पाड़ावा माय नाहते पाड़ावान बाहेर मार सिकेह।4मिलापवाला तोम्बुन बायणा पोर यहोवान पाड़ावान सामने यहोवाह चेड़ावणेन केरता नाय ली जाय, ताहार ता माणहाह लुय वोयाड़नेन दोस लागी; एने तो माणुह जो लुय वोयाड़नार ठेराय, तो तान माणहान विचीम रेन खेतेम केराय जाय।5ज्यो नेम ज्यानकेरता हे काय इस्राएली माणहे तान बोली जाह ता उदाह चोवगानाम मारतेह, ता ताह मिलापवाला तोम्बुन बायणा पोर चाकऱ्या फाय यहोवान केरता ली जाएन, तास ने केरता मेल मिलाप बोली केरीन बोली केऱ्या किरे;6एने चाकर्यो लुयीह मिलापवाला तोम्बुन बायणा पोर यहोवान वेदीन उपेर सिड़के, एने चेरबीह तान हाजी गेंदीन केरता हेलगाड़े।7ता जा बोकड़ाह पुजणारे बोणीन सिनालो केरतेह, ता पोशा तान जेनवाराह तानकेरता बोली नाय किरे। तुमरी पिढीन केरता ज्यो कायेम ने नेम रेय।”8तु ताह के काय इस्राएल ने गेराणान माणहाम रेन नाहते तान विचीम रेणारे पाराया माय रेन एगदो माणुह काहा नाय रेय जो होमबोली नाहते मेल मिलाप बोली चेड़ावे,9एने ताह मिलापवाला तोम्बुन बायणा पोर यहोवान केरता चेड़ावणेन केरता नाय लावे; तो माणुह तान माणहा माय रेन खेतेम केराय जाय।10ओवतो इस्राएल ने गेराणान माणहा माय रेन नाहते तान विचीम रेणारे पाराया माय रेन इखेह माणुह काहा नाय रेय, जो लुय खाय, मी ता लुय खाणारान विरूद एन ताह तान माणहान विचीम रेन खेतेम केर देह।11काहाकाय सेरीरान जीव लुयीम रिथे; एने तीह मी तुमूह वेदी पोर चेड़ावणेन केरता आपेल हे काय तुमरा जीवान केरता पाप डापाय जाय; काहाकाय जीवान बोदले लुयी केरीस ने पाप डापातेह।12तानकेरता मी इस्राएल ने माणहाह केथु काय तुमरे माय रेन कुण लुय नाय खाय, एने जो दिहरा देसावालो तुमरे विचीम रिथे, तो बी लुय केदी नाय खाय।13इस्राएल ने माणहा माय रेन नाहते तान विचीम रेणारा पाराया माय रेन, केदी एगदो माणुह एगदा जेंगली जेनवाराह नाहते चिड़ाह दिरेह, जाह खाय सेकतेह, ताहार ता माणहाह लुय बुई पोर वोयाड़ीन एने माटड्या केरीन तीह डाप देय।14काहाकाय सेरीरान जीव जो हे ती तान लुयूस हे, जी तान जीवा हेऱ्यी एक हे; केरीन मी इस्राएल ने माणहाह केथु काय काल्ली बी बातीन जेनवारान लुयीह तुमू मा खाहो, काहाकाय आखा जेनवारान जीव तान लुयूस हे; जो कुण तीह खाय, तो खेतेम केराय जाय।15एने केदी तो इस्राएलवालो एय नाहते पारायो, जो कुण सोता मुरेल जेनवाराह नाहते एगदा दिहरा जेनवारान द्वारा मारायेल जेनवारान माह खाय, तो तान फाड़काह दोवीन पाण्या केरीन उंगले, एने हांज पोर वोर एठो रेय; तेवी तो चोखो रेय।16पुण केदी तो माणुह तान फाड़काह नाह दोवेत एने नाह उंगलेत, ताहार तान पापान बार सोताह विसणे पोड़ी।
The Word for the World International