1 TIMOTE4
Pool owi Timote luo
1Ke yam, Ɔ̃fel ayɛɛn kal-a-kal ndiri: M'ãlio mã ntɔ baal bakyɛ akieel ayiri okiool me ndɔɔ yi akuru ãnzuru m'ɛ̃fel mi edzeel baal bvool m'ãtee m'ã̀fa ol'ɛ̃fel mi ɛ̃bi-ɛ̃bi.2Bɔ akieel awa ãnzuru me baal a mfya bvool ba nzɛɛn-yuaal apfuru bɔ. Baal a pfuru obɔ, bɛn ãtsam ã bɔ ãm'ãbii onge m'ãdzio me bvieel li mbaa.3Baal obɔ akieel aluo baal k'abaal, k'adza eluɔ bvikyɛ bvɛn Nziã ási bvɛ me ndɔɔ yɛn akiool b'ayɛɛ otaa-taa, adza bvɛ m'otuɛɛn o ndɛ.4Ke ngwel wɛ, bvieel bvi ési Nziã eli ngesɛ, bvool ki abee pyɛ. Kɛn a yi enduru okuun yi adza bvɛ onse obveel o Nziã ãtuɛɛn.5Ke yam, Endɔɔ e Nziã y'ãbuɛɛn ãsuul bvɛ ngesɛ ke mviil ã Nziã.6Ŋɛn yɛ tee akiool ãndɔɔ omɔ̃, yɛ àkal ɔ̃sal a Yeso Mãsia wa ngesɛ, yɛ asuo kwɛn aliil yɛ m'ãyɛɛn m'okiool y'ãtee mã taa-taa m'eluɛɛn yɛ.7Bee ese-sam bvi ngwel-a-ngwel bvool bvɛn k'edzuu nkuul mɔ̃ y'okiool wɛ. Sa mpɛn k'akuru nzuru me Nziã.8Ɛ̃taan ɛ̃ nzuru ɛ̃li ngesɛ, kɛn a ke m'ãndɔɔ bibi wɛ. Ki ngesɛ m'ãndɔɔ mbueel, okuru o nzuru me Nziã, ke ngwel wɛ bɔ owa elaã li elieel Nziã ndiri ndɛ awa meba, ye li elieel ndɛ ndiri ndɛ akieel awa.9Oyɔ ndɔɔ yi taa-taa, yi ebvaan m'okiool me baal bueel.10Ngwanyã, okɛɛn bia-byɛ ebedzwaan bvool ebebam nzuru m'ɔ̃sal, me ndɔɔ yɛn bia-byɛ ebeta kaã me Nziã wa mwiĩ wu oli Ɔ̃mvuul a baal bueel, bvel-bvel b'akiool ndɛ.11Omɔ̃ ãndɔɔ mɛn ebvaan yɛ atam baal osa bvool yɛ ayiool bɔ mɔ̃.12Yɔɔl kwɛn mbuul si ɔ̃mɔ̃ abee yɛ opfiɔɔl me ndɔɔ yi eli yɛ nsam. Kɛn a yɔɔl kwɛn yɛ kal mbuul wɛn akiool anɔɔn kuul e ndɛ, m'ayɛɛn, m'epfuũ, me dzii, m'okiool y'okal tsɛ-tsɛ.13Ye k'eya mɛ̃, wa ɔ̃kwal k'atsiɔ m'ákel ke nkwel a baal bueel, k'atee bvool k'ayiool baal mɔ̃.14Bee kab li Ɔ̃fel wu Ɔ̃nsensal li eli onse yɛ odzɛɛn. Kab olɔ li éyɔɔ yɛ ŋ'éyɛɛn aliaal-ɛ̃kiɛɛn a Nziã bvool ŋ'éndɔɔl akuul b'Ebvɔɔn yɛ mviɔɔl.15Wa ɔ̃kwal onse ãndɔɔ omɔ̃ mbueel bvool wa nzuru a yɛ yam yueel m'ɔ̃sal ondɛ. M'emfa okyɛ baal bueel amwɛn k'eyi yɛ nkwel.16Kyab nzuru bvool kal y'onkyab onse ãtee ã yɛ. Kal y'ɔ̃tɛɛ̃ m'ãndɔɔ omɔ̃. Ke ngwel wɛ, yɛ asa obobɔ, yɛ abvuul nzuru a yam ye b'ayoo yɛ.Wycliffe Bible Translators, Inc.