Эккл9
1Теве мом шымлаш мый шонен пыштышым: чын ыштыше-влак, мунло еҥ-влак да нунын пашашт Юмын кидыште улмым кушеч ужына? Айдеме ок пале, мо тудым вуча – йӧратымаш але ужмышудымаш.2Чылаштым ик мучаш вуча: иктак лиеш чын ыштыше да Юмым пагалыдыме еҥ дене, поро да [осал еҥ] дене, ару да ару огыл еҥ дене, надырым кондышо да надырым кондыдымо еҥ дене. Порым ыштыше еҥ дене мо лиеш – сулыкым ыштыше денат тидак лиеш, товатлыше еҥ дене мо лиеш – товатмутым пуаш лӱдшӧ денат тидак лиеш.3Кече йымалне угыч да угыч лач теве мо уда лиеда – чылаштым ик пӱрымаш вуча. Илыме годым айдемын шӱмжӧ осаллык да ушдымылык дене темеш, а тидын деч вара тудо вес тӱняшке кая.4Но илыше еҥын ончыкылыклан эше ӱшанже уло, вет колышо лев лиймешке, лучо илыше пий лияш.5Илыше-влак колышашышт нерген палат, а колышо-влак нимом огыт пале – нуным нимогай суап ок вучо, нунын нерген огытат шарналте.6Эртен нунын йӧратымашышт, ужмышудымашышт да ушкалымашышт. Кече йымалне ышталтше пашашке нуно ынде нигунам огыт ушно.7Тугеже кай, киндетым йывыртен коч да шӱм куан дене йошкар аракатым йӱ, вет мом ыштымет Юмылан келша.8Тек вургемет эре ошо лиеш, вует – олив ӱй дене шӱрымӧ.9Арам илен эртарыме чыла кечылаштет Юмын пуымо йӧратыме ватет дене кече йымалне куанен иле. Вет илышыштет да кече йымалне ыштыме пашаштет тылат тыге пӱралтын.10Чыла, мом тый ыштен кертат, виет шутымо семын ыште. Вет вес тӱняште, кушко тый кает, нимогай паша, шонкалымаш, шинчымаш да мунлылык уке.11Эше теве мом мый кече йымалне шекланышым:эрежак огыт сеҥе писе-влак куржмаште,виян-шамыч – кредалмаште,эре ок лий мунло-влакын кинде,ушан-шамычын – поянлык,ок лий уста-влаклан поро кумыл.Чылажат шке жапше да келшыше тат деч шога.12Вет айдеме ок пале, кунам тудын жапше шуэш:кузе кол вапшыш логалеш да кайык оптышеш пижеш,тугак айдеме вучыдымын толшо туткар жапыштеколымаш вапшыш логалеш.13Теве эше могай мунлылыкым мый кече йымалне ужынам, тудо мылам поснак ойыртемалтшыла чучын.14Лийын изи ола, тушто шагалын иленыт. Тудын ӱмбак виян кугыжа толын, олам авырен да, сеҥен налаш манын, йырже кугу мланде кӱкшакам нӧлталын.15Но тушто мунло йорло еҥ лийын, да тудо шке мунлылыкшо дене олам утарен коден. А тидын деч вара ты йорло еҥым нигӧ шарналтенат огыл.16Тунам каласенам мый:Мунлылык вий дечын сайрак,но йорло еҥын мунлылыкшым огыт шотло,тудын мутшым огыт колышт.17Ушдымо-влакын вуйлатышыштын кычкырымыжым колыштмешке,лучо мунло еҥын тыматлын ойлымыжым колышташ.18Мунлылык саргурал деч сайрак,но сулыкым ыштыше ик еҥ шуко сайым пытарен кертеш.
Institute for Bible Translation, Finland