Exodus18
1यित्रो, जे मिद्यान के पुरोहित आउर मूसा के ससुर भी हलन, ऊ ई सुन के कि परमेश्वर मूसा आउर अपन प्रजा इस्राएलियन ला का कईलन हे, माने कि ई कि कौन तरह से यहोवा इस्राएलियन के मिस्र से निकाल के लईलन हे।2तब मूसा मिस्र देश से लौट रहलन हल, तब ससुर यित्रो मूसा के पत्नी सिप्पोरा आउर ओकर दूगो बेटा के, जे पहिलही अपन बाप के घर भेज देवल गेल हल।3आउर ओकर दूनो बेटवन के भी ले आयेल; एकरा में से एगो के नाम मूसा ई कह के गेर्शोम रखलन हल, हम दूसरा देश में “परदेशी रह हली।” 4आउर दूसरका बेटा के नाम ऊ ई कह के एलीएजेर रखलन; हमर पिता जे परमेश्वर के आराधना करऽ हथन ऊ हमनी के सहायता कईलन आउर हमनी के फिरौन के तलवार से बचईलन; 5मूसा के मेहरारू आउर बेटवन के अपन ससुर यित्रो के साथे मूसा के भीर जंगल के ऊ जगह में अईलन, जहाँ परमेश्वर के पहाड़ के नजदीक डेरा हल। 6यित्रो ऊ मूसा भीर ई कहला भेजलन, “हम तोर ससुर यित्रो तोरा से मिले आ रहली हे। आउर दूनो बेटवन के साथे तोर मेहरारू के भी तोरा भीर ला रहली हे।”7तऽ मूसा अपन छावनी से ससुर यित्रो से भेंट करे ला निकसलन आउर उनका दण्डवत कर के उनकर गाल चूम लेलन, आउर ऊ एक दूसरा के समाचार शांति से पूछते डेरा में गेलन।8उहाँ मूसा अपन ससुर के सभे बात कहलन कि यहोवा इस्राएलियन के मदत करे के चलते फिरौन आउर मिस्री से का-का कईलन हे, आउर इस्राएलियन राह में केतना दुःख उठईलन हे, फिरू यहोवा ओखनी के कईसे-कईसे मदत कईलन हे।9यित्रो ऊ सभे भलाई के बात सुन के यहोवा के स्तुति कईलन, कि कईसे यहोवा इस्राएलियन के मिस्रियन के वश से छुड़ईलन हल, आउर उनका भला कईलन।10यित्रो कहलन, धन्य हथन यहोवा, “जे तोहनी के फिरौन आउर मिस्री के वश से छुड़ईलन, जे तोहनी के मिस्रियन के शक्ति से हटईलन!11अखनी हम जान लेली हे कि यहोवा सभे देउता से महान हथन; बलुक ऊ बारे में भी जे ऊ इस्राएलियन के घमण्डी दुश्मन से बचईलन हल।”12तऽ मूसा के ससुर यित्रो परमेश्वर ला होमबलि आउर मेलबलि चढ़ईलन आउर हारून इस्राएलियन के सभे पुरनियन से साथे मूसा के ससुर यित्रो के साथे परमेश्वर के सामने खाना खाय ला अईलन।13दूसरका दिन मूसा एक जगह पर न्याय करे ला बैठ गेलन, आउर लोग भोर से साँझ तक मूसा के नजदीक खड़ा रहलन।14जखनी यित्रो ई सभे करते मूसा के देखलन कि का कर हथन उनकर ससुर कहलन, “ई कौन काम हे, जे तूँ लोगवन लागी करऽ हऽ? का कारण हे कि तूँ अकेले बैठके आउर, लोग भोरे से साँझ तक तोरा भीर रहऽ हथन!”15मूसा अपन ससुर से कहलन, “एकर कारण ई हे कि लोगवन हमरा भीर परमेश्वर के का इच्छा हे ई जाने ला आवऽ हथन।16जब-जब ओकर कोई बात ओखनी के बीच में होवऽ हे तब-तब हमरा भीर आवऽ हे, आउर हम उनकर बीच में न्याय करऽ ही, आउर हम परमेश्वर के विधि आउर व्यवस्था माने ला ओखनी के समझावऽ ही।”17मूसा के ससुर ओकरा से कहलन, “जे काम तूँ करऽ हऽ ऊ फायदेमंद नऽ हे।18तूँ आउर ई सभे लोग जे तोरा साथे हथन, थक जईतन, काहेकि ई काम तोरा ला बहुत भारी हे तूँ एकरा अकेले नऽ कर सकलऽ हे।19येहिगुने अखनी हमर बात सुनऽ हम तोरा राय दे ही, आउर परमेश्वर तोरा साथे रहे, तूँ तऽ ई लोगवन ला परमेश्वर के नजदीक जईते रहिहऽ आउर ओकरा न्याय के परमेश्वर के भीर पहुँचा दिहऽ।20ओखनी के विधि आउर व्यवस्था बता बता के, जे राह पर ओखनी के चले ला हे, आउर जौन-जौन ओखनी करे ला हे, ऊ ओकरा समझईते रहिहऽ।21फिरू तूँ ई सभे लोगवन में से अईसन आदमी के छाँट लिहऽ, जे गुनी आउर परमेश्वर के भय माने वाला, सच्चा आउर अन्याय के लाभ से घिरना करे वाला हे, आउर उनकर हजार-हजार, सौ-सौ, पचास-पचास आउर दस दसगो आदमियन के मुखिया बहाली कर दिहऽ।22आउर ऊ सभे घड़ी ई लोगवन के फैसला करते रहतन; आउर सभे बड़का बड़का मुकदमा अईते रहत, आउर छोटका-छोटका मुकदमा के फैसला ओही लोग करतन; तब तोर बोझ हल्का हो जायेत, काहेकि ई बोझा के ऊ भी तोरा साथे उठईतन।23जदि तूँ अईसन करवऽ, आउर परमेश्वर तोरा अईसन आज्ञा देतन तऽ तूँ टिक जईवऽ, आउर ई सभे लोग अपन जगह में पहुँच शांति से जईतन।”24मूसा अपन ससुर के ई बात मान के उनकर सभे वचन के मुताबिक कईलन।25तऽ ऊ सभे इस्राएलियन में से होशियार आदमी चुन के ओकरा हजार-हजार, सौ-सौ, दस-दसगो, आदमी के मुखिया ठहरईलन।26आउर ओखनी सभे चुनल लोग सभे लोगवन के फैसला करे लगलन जौन मुकदमा कड़ा होवऽ हल ओखनी ओकरा मूसा भीर ले जा हलन आउर सभे छोटका मुकदमा के फैसला ऊ अपने में कर ले हलन।27तब मूसा अपन ससुर के विदा कईलन, आउर यित्रो अपन देश में लौट गेलन।
Bridge Connectivity Solutions Pvt. Ltd.