2 Akolinto5
1Kʉnsoko kʉlɨngile kɨna mɨɨlɨ itʉ ɨhanga kɨtala nɨkishiɨ itungo ɨlɨ mʉnʉ mʉʉnkumbigʉlʉ kɨzɨɨzataʉlwa, ingɨ Itunda ʉkʉʉpa likalo nʉlʉngɨza kigʉlʉ, nyʉmba akalɨ na kalɨ nɨshanga ɨzengwa nɨ antʉ.2Itungo ɨlɨ, nɨkishiɨ mʉnʉ mʉʉnkumbigʉlʉ kʉilɨɨla kʉ ʉwai, kʉnsoko kʉsʉmbɨɨye kenda kishiɨ mʉlikalo litʉ nʉla kigʉlʉ,3kʉlʉ kʉʉlʉ kʉʉtugalwa mɨɨlɨ akigʉlʉ anga itugalo nipya, shanga kʉʉtula kɨ kɨmpʉnyʉ.4Nɨkʉmolɨ mʉkɨtala ɨkɨ nɨka mʉʉnkumbigʉlʉ, kʉilɨɨla kʉnsoko makani ɨdʉ nakʉlemeeye. Shanga kɨna kʉloilwe kʉtugʉla mʉɨlɨ ʉwʉ nʉwɨsha, ingɨ kʉlolwe kʉtugalwa mʉɨli nɨshanga wɨsha, ingɨ mʉɨlɨ ʉwo nʉwakʉsha ʉkaɨlwe nʉ mʉɨlɨ nɨshanga wɨkuza.5Itunda ng'wenso aɨʉkʉnoneeye ikani ɨlɨ, hangɨ ʉkʉpee Ng'wahʉ wakwe watule kɨɨkɨɨli ka makani nʉkʉnoneeye.6Mahikʉ ɨhi kʉkamatɨkile. Kʉlɨngile kɨna kʉlongoleka kishiɨ mʉ mʉɨlɨ ʉwʉ, ingɨ kishiɨ kʉlɨ ni Isekʉlʉ.7Kʉnsoko kishiɨ kʉ ʉhʉɨɨli, shanga kʉ makani nɨkɨmaona.8Kɨakamatɨku ɨtai taai kʉnsoko kʉine bahu kʉhame mʉ mʉɨlɨ ʉwʉ, kʉhamɨle kʉng'wi Isekʉlʉ.9Kʉlʉlo kʉsʉmbɨɨye kɨntʉ kɨng'wɨ, ingɨ kʉmʉloeelya ikani ɨlɨ iza nangalu kʉng'wi Isekʉlʉ kishiɨ mʉnʉ mʉʉnkumbigʉlʉ.10Kʉnsoko ʉsese kɨhi kʉimɨka pang'wa Kilisito kʉlamʉlwe, ingɨ antʉ ɨhi asɨngɨɨlye kʉkɨɨla ntendo naɨatendile itungo naɨishiɨ mʉʉnkumbigʉlʉ, yitule atendile iza ang'wɨ atendile ibɨ.11Itɨ gwa, ʉsese kʉlɨngile ndogoelyo akʉmʉkʉlya Itunda, ingɨ kʉkagupile kʉaleta antʉ kʉng'wi Itunda. Itunda ʉkʉlɨngile ɨtai taai, nʉnene nɨhʉɨɨe kɨna nʉ nyenye ga mʉkʉmanyile ɨtai taai.12Shanga kʉʉgema kikʉlya hangɨ kʉng'wanyu, ingɨ kʉhiya kʉmʉɨla makani natakɨkwe kikʉlya kʉnsoko itʉ, ingɨ mʉhume kʉasʉkɨɨlya antʉ nɨasanilye makaniao nakʉnzi amʉɨlɨ kʉkɨla namolɨ mʉnkolo yao.13Anga kʉonwe kɨna kapʉngʉtaae, ingɨ kʉnsoko ang'wi Itunda, hangɨ aga kʉonwe kʉkete mahala nɨmaza, ingɨ kʉnsoko anyu.14Ʉlowa wang'wa Kilisito ʉkʉtongee, ʉsese nɨkʉlɨngile kɨna mʉntʉ ʉng'wɨ ʉkule kʉnsoko aantʉ ɨhi, kʉlʉlo antʉ ɨhi aɨakʉlee.15Aɨʉkule kʉnsoko aantʉ ɨhi, ingɨ antʉ nɨapanga aleke kishiɨ kʉnsokoao, ingɨ ishiɨ kʉnsoko akwe naɨʉkule nʉkiʉkigwa kʉnsokoao.16Itɨ gwa, kandɨɨlya ino, ʉsese shanga kʉʉmʉona mʉntʉ wɨhi anga ʉnkumbigʉlʉ nʉwɨaona ɨantʉ. Palʉng'wɨ nɨ kɨna pakalɨ aɨkʉmʉine ʉ Kilisito kɨʉntu, ɨtungo ɨlɨ shanga kʉʉtenda itɨ hangɨ.17Mʉntʉ wɨhi anga wakamɨnkane nʉ Kilisito waina mʉntʉ mʉpya, makani akalɨ ɨkɨla, kolwa makani ɨhi ɨtula mapya.18Makani aya ɨhi ingɨ mʉlɨmo wang'wi Itunda nʉwɨkʉhunga ʉsese nʉng'wenso kʉkɨɨla Kilisito. Wɨkʉpeza mʉlɨmo nʉwakʉahunga antʉ ni Itunda.19Anga nɨkɨlʉnga kɨna, Itunda wɨagomba antʉ a mahɨɨ ɨhi kʉkɨɨla Kilisito, hangɨ shanga ʉkʉalya mɨlandʉ. Ng'wenso wakʉpeza mʉlɨmo nʉwa kʉatanantɨlya antʉ akamɨnkane nʉng'wenso.20Kʉlʉlo ʉsese kʉlagɨigwe nʉ Kilisito kitʉme mʉlɨmo wakwe, Itunda nʉyo ʉkʉlagɨɨye ʉsese kʉminena ʉnyenye. Ɨkɨ kɨkɨ ʉ Kilisito ʉkʉlagɨɨye ʉsese kʉminene ʉnyenye mitʉme.21Kilisito aɨmʉgila anga mɨlandʉ, ingɨ Itunda wɨkamʉtenda watule mʉnya mɨlandʉ kʉnsoko itʉ, ingɨ ʉsese kʉʉkamɨnkani nʉ Kilisito kʉaɨligwe kɨna kʉgombekile kʉng'wi Itunda.
The Word for the World International