Faarotikaa Maxaafa60

Mageniinke Gargaarsi'a Shiqqeexxa Soodachcho

Faarsaleeyyetike Sooreesi'a. Kakoti Tsigeereda Hiyyemaake Meellinni Faarsendaaxxa. Dhugaa'a Kulatixxa. Daawwitixxe Barachchiissaxxa Faaro. Isi Arami'a Nahara'imikanna Arami Zo'aka Manna Lolee Wodda Iyyo'aab Ille Iima Higeexxi Maxinetixxe Dhooqa'n Tommenna Lame Kuma Eedoomika Manna Biree Wodda Faarseexxa.

1Ee, Magenoo! Ati no'o hunde waldette;no'o butuchchittette;no'o'n mufatete; ta'a kinni no'oo ifibaa hiissedhi.2Eettene Butta le'missette, dhodhdhoosetexxinna lameba hashakki hittaashsha assiteten;isenna girgir hiteexxi dhodhdhooteemmaxxee hiissite'e isee sumi.3Ardi atik abara uudashsha assittette;woyinetixxi booka no'oo machchoosite'e gatantarsito'aa ha'winannoshsha assittetten.
4Yaane kinni naaphiinxe gabenaa'n fullaashsha,ate sodaatakeeri'a iimi'a abixxinaaka baandira insa'ne'aa uuttette.5Eettaatek atik ardi no'o anjiremmonaa'aatixxe middixxe anganni no'oo anjirte'e hiissichcho no'aa uwwi.6Mageni ifixxa woyyitte bakka'ni hedhe hiyye haaso'ee qici,«Injifatennexxi Sekemika boga qoqqooddannon;Sukootixxa dhooqanna mikannon,7Gele'adik bogi anken; bogi Minaasekinna anken;Efireemi umoke'n uggudhdhannoxxe anxe sibljiinxe gullen;Yihudanna anxe mootummaxxe bokkon.8Mo'aabik bogi anxe anshecatixxe bakkan;Eedoomik boginna anke kadeexxa kokeessatee'e kophe anxa itti qolanchannon;Filisixxeemike boga'n injifachchoti illillisannon.»9Kinjiinke dalla'ike qachchibaa ayyete anee iyyemaraa?Lolonnaa'a Eedoomibaa ayyete anee akeeka?10Ee, Magenoo no'oo hunde waldette;no'oke lolinke manninni duuliinbaa fula gibbette;11Manjiink gargaarsi dharaken,naapha no'oke'ni injifachcho alfinnonnaa'a no'oo gargaar.12Mageniinxe hirrenni injifachcho alfinnannon,naapha no'oka no'aa hirbeesaak isoten.

The Word for the World International

https://app.library.bible/content/2b894378475c6aea