Eermiyaasikaa Raaga32
Ermiyaasi Boga Hidhdheexxa
1Yihudaki moyanji Sedeqiyaasi moyeexxe tommeessoxxe wogga'n, tininna Baabiloonike moyanji Nabukadanatsoori moyeexxe tommenna saddeeteessoxxe wogga'n Ermiyaasiba'a dageeki Duuchchi Woddike Goottiki hiyyichchi konnechchin butti'a hedheeken.2Eettene yaanna Baabiloonike moyanjiki, loliinki manni Iyyerusaalemii'i buqeemman; waabeekichchi Eermiyaasinna Yihudake mootomatike minixxe baxxeke heqanjuwwike mini giddo cufemee hedha'emman.3Yihudiink moyanji Sedeqiyaasi, Ermiyaasii Magen haaso'emmaxxa yaane iso'n haaso'emmaxxee iso usursiiseemmaxxi itti yaane «Mayeete, ‹Kunnise, Duuchchi Woddiki Gootti, konnee qachcha Baabiloonike moyanjixxe anga'n sa'isse uwwaan; isinna booji'aan.4Yihudiinki moyanji Sedeqiyaasinna Baabiloonike mannixxe anganaa'n baaje fulabaan; yaane kinni Baabiloonike moyanjixxe anga'n sa'issemee uwwemaan; isi edonna uurreexxi illeti iso'o uuda'n welti haaso'aan.5Isi Sedeqiyaasi'i Baabilooni'a iyyemaraan, ani murte iso'n iyyedaganno qico'n ookkonni hedhaan; ha'no Baabiloonike manninni lolendinoolenna ha'no'a qajeeldabaan hiyyeen› hittettechchi mayeete?» hiyye.6Duuchchi Woddike Goottiki hiyyichchi anee Ermiyaasiba'a dage.7Isinna ane'n «Anniinka dayo, Shalumiki belti Anaami'eeli, atiba dageexxi, ‹Shiqike anke fira kadiyyoti fichcha anka wodatika seera ati'a uwweemmaxxee'e Anaatooti hedheeka anka fichcha anenaa'n hidhdhi› hiyyaan» hiyye.8Duuchchi Woddiki Gootti ane'n haaso'emmashshanni anike dayyik belti Anaami'eeli aniba'a, heqqanjuwwiinke minixxe baxxeba'a dageexxi, anee'e «Woddiyyotti ifixxe karra assedhatiki seer ati'a uwwamaxxee Anaattoti giddo Biniyaamike boga'n hedheeka anka fichcha hidhdhite'e ifike assedhi» hiyye; tennenaa'n kexxeexxa aninna, kunni Duuchchi Woddike Goottike hiyyichcho kadeexxa ege'nenne.9Tennexxee Anaattoti hedheeka ookkonee fichcha Anami'eeli'i anike dayyike beltinaa'n, hira, lame kiilo kadaaka birretika sibilijjo isi'a uwwe hidhdhenne.10Hira weli aagatixxe borro'n beessisa uggennexxi buqenne; birretikka sibilijjonna dhugaa hexxeeba kiilote'n kiilenne.11Hiriinxe weli aagoxxa borro, buqendeexxanna buqendebaaxxa aadhennexxi,12anke annike dayyike belti eddonna weli aaggotixxe borro'n beessisa uggemmake dhugaa kulatike manni eddo, iittanni heqqanjuwwi heqqammaxxe ussuriinke minixxe baxxe'n ofo'leemmake Ayihudiinke manni eddo duuchcha Maahiseyaaka akka'o, Neeryaka belto Baarooki'n uwwenne.13Insa'nee edo Baarooki'i hiyye ajajenneqici:14‹Dada duuchcha ajajaak Duuchchi Woddiki Gootti Isira'eeliki Mageni hiyya'neeqic: ‹Buqendeexxinna buqendebaaxxi hira wel aaggotixxi borro, qeerraxxe yanna'a turtaashsha faariinke mi'yi giddo uggi.15Manni konne boga'n minuwwa, fichchuwwa, woyyinetike hiddichchuwwika booncho haaroba hiraani hiyye'een.›16«Hira weli aaggotixxa borro Baarooki'i Neeryake belto'n uwwennechchi uduma Duuchchi Woddike Goottiba'a hiyye soodatennee qici:17«Ee dada duuchcha ajajatoke Duuchchi Woddike Goottaa, ati iimatanna butta atixxe lumoxxe hunnanninna atixxe jabaxxe hirrenni daddeetten; dandettabexxoxxi mitte yaanenna hexxebaan.18Jaalalanna arjumma atixxa heddo kuminni laako'emaake manni'a leellishshatto; kaddomalee annuwwi hujemmaxxe balleessa, uduma, oose insa'neexxa xixxatto; summi atiki Lumoke Duuchchi Woddike Gootta kadeeke, lumokenna hunnaameessa Magenoo,19yaadi atiki lumoken; huje atixxinna jabbaxxen; ille atixxi manji assaaxxa duuchcha affaan; mitte mittengee me'a isixxishshanna huje huje isixxishshanni hira uuttatto.20Gibtsee giddo manbe'anna maso yaanuwwa assitettexxi, telchiqico'ninna Isira'eel giddonna manji duuchchi giddo iitanni assatte'n hexxeten, telchonna summi atiki gurra fule'eeken.21Masonna mambe'a assita'n atixxe hunnaameette anganninna atixxe jabaxxe hirrenni, lumooshsha sodaachchisaake atike gaachchanninni atika arda Isira'eeli'i Gibtsee'n fulchittette.22Edike insa'neeke annuwwi'a uutotta'a kako aaggetteke, konne shamoka goddiinka boga insa'ne'a uutee'na'a,23dange konne boga dhaaleen; yaane kinni ati'a ajajemmebaan, seera atikanna heqqe'neba'a, insa'nee ajajjettexxa yaanenna assa ginbe; tennexxee ba'ne tennee duuchcha insa'ne'ni iyyedaggette.24«Kunniseten ati, qachchi abidemo'a qarqarake'n buttinni tullubemeedheen; wolaantichchakenaa'n, solo'okenaa'ninna dhukkubakenaa'n kexxeexxa qachchi iso'o lolaake Baabiloonike mannixxe anga'ni sa'isseme uwwemaan hitetteshshanni, uuddaatteshshanni haasottettaxxi muuxende'een.25Ati kinni Duuchchi Woddike Gootta, Mageno qachchi Baabiloonike mannixxe anga'n sa'isseme uwwema'naanni, ‹Ookkonee boga birretike sibiljinni hiri; ookkonee hiranna dhugaa kulaake manni edo muuxi› anee hiteetten.»26Ookkonechchi uduma Duuchchi Woddike Goottiki hiyyichchi anee Eermiyaasibaa dageexxi,27«Kunnise, ani manjinke belti duuchchike, Duuchchi Woddike Gootta Magenon; isi anee'e dandeessissabaaxxi yaane hexxeeta?28Kunnise ani konnee qachcha Baabiloonke mannixxenna Nabukadanatsoorii'i Baabiloonke moyanjixxe anga'n sa'isse uwwannon; isinna iso'o abidaan.29Konnee qachcha lolatee Baabiloonik manni isi giddi'a e'yeexxi qachcha gubaan; manni anee'e mufachchiiso'a ifike minixxe heellichcho hana Ba'aali'aa hixaana guba'ammake minuwwira'inna wele magenuwwi'a ha'watika tolcha giddo tolchaammake mannike mine duuchcha'n giira woraan.30«Isira'eelikinna Yihudaki ardi oosummandenaa'n safeexxi fuggoxxa yaane malee'e ani edo mitte eloxxa yaane assebaan; dhugaanden, Isira'eelik ardi anga ifixxenni asseexxe yaanenni anee'e mufachchiise'een;31Kunni qachchi ijaaremeexxe yannanaa'n telchiqico'n isik ardi anee'e mufachchissaaxxanna aarsitaaxxa yaane assemmaxxe ille anxe edii'n konne qachcha fugussanon.32Isira'eelikinna Yihudaki ardi, insa'neek moyanjuwwi, insa'neek ja'laabuwwi, insa'neexxi qeesoolenna insa'neexxi waabeeko, Yihudaki manninna Iyyerusaalemi giddo hedhaak manni asseexxe fuggoxxe duuchchinni anee'e mufachchiise'een.33Insa'nenna dudduro malee'e alba ane'n wirri hineba'a; higgegge insa'nenni gorsa'naanni lanqeba'a; xixichcho ankanna adhdhineba'a.34Ank summi ye'ememmake mine'n battitte fakkuwwa uggudhdhineexxi iseenna battoossine.35Ifixxa Labbaxxanna meyyaxxa oose giirate'n gunba'n Moleeki'a tolchino'a Ben Heenomixxe dhooqa giddo Ba'aali'a tolchiin booncho giissine; yaane kinni insa'ne Yihudaka arda cubbo hujisiyyotee tennee battitte yaane assino'a ani insa'nee ajajebe'non, kunni ani giddo hedhemake yaadannaba'a» hiyye.Magen Uwweexxa Addachchiisa
36« ‹Ardi kunni qachchi Wolaantichchik, solo'ikinna dhukkubik Baabiloonike moyanjixxe anga'n sa'isse uwwemaan› hiyya'neexxee'e Duuchchi Woddiki Gootti Isira'eelik Magen konne qachchixxee hiyya'neeqic:37Kunnise, anxe jabaxxe mufenninna lumoxxe balanni xeereennaka arda, bogi duuchchii'n bukki assannexxi konne boonchibaanna hissanon; nage'ikinna he'naashsha assannon.38Insa'nenna arda anke kandaan; aninna ina'neeke Mageno kadannon.39Insa'ne'anna, uduma insa'neexxe oose'a eloxxi kaddaashsha, duuchchii wodda anee sodaanto'a mitte godobanna mitte heduma insa'ne'a uwwannon.40Eloxxa yaane insa'ne'a assa waalabe'non, anenaa'n bayyantabaashshanna giddixxe hedhonn anee sodaantaashsha assa'n, insa'ne'a duuchchii woddixxa kako aaganno.41Ani insa'ne'a eloxxa assate'n gammadannon; anke wo'ma yaadinninna anxe wo'ma hedhonni konne boga'n jabeessee insa'nee kaasannon.42«Konne arda'n tennee ba'ne duuchcha iyyedagenneshshanni iittanni insa'ne'a assonna addachchiisennexxa elolla yaanuwwa duuchchanna insa'ne'a uwwannon.43Ha'nonna, ‹Baabiloonike manni'a sa'isseme uwwememmaxxee'e manji hori hedhabaake urma bogan› hitinemmake konne boga'n haaroba fichchi hidhdhemaan.44Booji'o insa'ne'a hissannaxxe'e Biniyaamike boga'n, Iyyerusaalemike qarqara'n hedheeke olla'uwwa'n, Yihudake qachchuwwa'ninna kooba callike bogike qachchuwwa'n, dhidhimiinxe koobuwwake hundidarre'ninna Bita'ake'n hedheeke qachchuwwa'n fichchi birretike sibiljinni hidhdhemman; hira gurgursiisakenni weli aagotixxe borro'n beessis uggemeexxi dhuga'a abixxememmake manni edo borro buqendaan, ani Duuchchi Woddiki Gootti tennee haaso'eennen.»The Word for the World International