Isaíasi21
Dimurewa lan luagu lábürühan Babilónia
1Dimurei libügürü fulasu mageirawati: Kei herigini awanseruti luéigiñe suru, ítara liña liabin luéigiñe fulasu mageirawati, fulasu hanufunati.2Hanarimeti uénedü le larufudubei Wabungiute nun, lagünrinchaguña gagünrinchaguaditi. Saraba Elamü! Híweruha, Médiana! Mabusenrunhadina saragu ekeharuni.3Adadagarati núgubu, baruguatina lau igari kei würi águrahatu, mígirun lumutina íruni lun naganbun, mígirun lumutina anufudei lun narihin.4Anihein bulíeiguaü nichügüwagu, adadagaratina lau anufudei. Lidili rábounweyu le hínsiñeñahabei nun, ítara liña nun guentó kei aban katei hanarimeti.5Seriwiwaali éigini, tulewaaru seriweidu, gumeseeli adineruni. Rárama humá hábutigu súdaragu, mirigüda huméi hadaüdina lauti gürabu!6Ladüga ariñagaali Wabureme nun: «Beiba, bíchigame aban óunigiruti le lunti lawisahan luagu sun le lunbei larihini.7Anhein ariha karü to hachawahan aban feru gabayu, o gürigia wariñu hawagu mile o kameyu, ariagualáña buidu».8Aba lagúaragun le óunigirubei, lariñaga: «Nabureme, lídanñadina nubara sun weyu, nóunigiruña sagü áriebu.9Anutén aban karü achawaheina hamoun aban feru gabayu». Ábati lariñagun aban: «Ábürüha Babilónia! Sun hayawa lubungiutegu, heigua múarugun, günringua».10Dügüwaguatiña nánigu kei türigu, nariñaguñein le naganbubei lúmagiñe Wabungiute Suntigabafu le Lubungiute Ísüraeli bun.Dimurewa lan luagu Edomu
11Dimurei libügürü Edomu: Wáwaguati nun uburugugiñe Seirü: «Óunigiruti, Ka san oura guentó?»12Lóunaba óunigiruti, lariñaga: «Aniteeli larugan, gama lumoun aniteyaali giñe laguñeedun. Anhein busén hubéi hálügüdahan, hálügüdaha, ábayame hagiribudun álügüdaha».Dimurewa lan luagu Arawia
13Dimurei lidan fulasu mageirawati: Ñǘbuintiña gürigia eibu Dedangiñe áriebu, ha ásügürüti áriebu lidan híduru-agei lidan fulasu mageirawati,14furí humá lubaroun le mágürabubei, ru humá duna lun. Lílana Temá, furí humá lubaroun le anurahabei, ru humá éigini luma duna lun:15Ladüga hanurahaña tuéi eféin hamanatu, tuéi gimara to aranseñutu lun tachüürǘn luma luéi ligañi wuribu.16Lariñahare Wabureme nun: «Aban irumu lárigiñe le kei labahüdüni nadagimeinti le awinwandubei lídangiñe lafayeiruaha, gumuhalime luéirigun Kedarü.17Míbeboun gimara erederutu hama wuriburuguna ha lani Kedarü». Wabureme le Lubungiute Ísüraeli ariñagubalin.Bible Society of Honduras