Luke3
Iyoni Tobabitaiso wai gikidewedewena Yeisu yana ela faina.
1Malamala fifitini ani Sisa Tibeliyasi giveiveimeya Loma yana ebaveimeya wagaine, tova-nai Ponitiyo Pailato banae Yudiya anafafali anatoveimeya ada Elodi banae Galili anafafali anatoveimeya, aku anatubuluga Filipi ani Ituleya ke Telikonitisi adifafali aditoveimeya, ada Lisaniya banae Abilini anafafali anatoveimeya.2Aku badi Yaubada yana veyavo anatovegugai aditonagona adiselu ani Anasi ke Kaiyafasi imiyamiya kaduwe. Ada tayuwe tova-nai wagaine ani Yaubada bonana gielai Sekalaiya natuna Iyoni wagaine, banae gimiyamiya fafali kavovona wagaine.3Ada Iyoni anavedo Yaubada wagaine ginogalina, gimididi ada ginau Gufa Yolidani anafafali moyaina wagaidiya ke gilulumamala, givonavonaga, “Yami dewa koyona wagaidiya wana nuwavilana ke wana babitaiso e ada Yaubada yami koyona gina venuwaegedi.”4Tuwai-moena falofita Aiseya giifufuyena yana buki wagaine, givona,“Kaliva seyana givedovedou fafali kavovona wagaine, givonavona,‘KAUVEYA yana wai aseasemiya wana kidewedewenake wana kivetunutunugina Bana faine.5Oya lakaidi awagadi laulaubeuna ani wana tavudi inalaka,natu-oyaoyadi wanayala ubalidi ina velaubeu.Wai nubalabaladi wana luvetunugidi,ada wai dabodabona wana luvedamadi.6Ada kaliva moyaidi Yaubada yana kibababala ina itana.’”7Aku yoo ielaelai Iyoni wagaine ina babitaiso ani givona wagaidiya, givona, “Imi vaita mota natunavo anafaiweya, mota-nai koyo-moena giluluvealika! Gaito givonemi evona vaita amifaiweya wanaota Yaubada yana nuwakoyo lakaina gielaelai wagaine?8Gilubodami wanadewa tunutunugina e ada yami nuwavilana anaita gina mogatala velemoena. Ada keke wana nuwanuwa taumiyavo wagaimiya ke wanavona, ‘Imeyavo ani Ebelaamo unumina faina, kadu ime Yaubada natunavo. E ada Yaubada keke gina vematavulogima.’ Faina gana vonemi, Yaubada anafata kabala taidei wagaidiya Ebelaamo natunavo gina bubudi.9Kaduwe tova malinai-mowa Yaubada yana matavuloga anailama bademowa igui gimanini ada ai ina luinubadi. Ada ai seyana seyana guwadi keke iwakana ani inatala ginaobu ke ina batugena ai alalata wagaine.”10Ada kaliva Iyoni itolidadanena, ivonaga, “Ada gavana anagai?”11Iyoni gilufata, givona, “Gaito anaseti iluwei aga seyana gina velena banae gaito anaseti keke, ada kaduwe gaito wa anaga aga gina vutuga anafaiweya.”12Kaduwe takesi anatoyaudi iela ina babitaiso ada itolidadanena, “Tovewala, ime gavana anagai?”13Givonediga, “Au takesi gaga anaetowava anafaiweya wana vaina, keke wanadewa koyona ada wana vetutamwata taumiyavo faimiya.”14Kaduwe tolugaviya tufona itolidadanena, “Ada gavana analauboda ana gugai?”
Gilufata, givona, “Kaliva keke wana awavematausidi o kai wana veloidi aku mani wanavai. Ada mani-nai wavaivaina fatami faina ani wana vemwamwala faine.”