लेवी23
1यहोवा देव मोशेहे कोयो,2“इस्राएलवाला माअहुंहूं को, के यहोवा देवोअ पवित्र सभा कोत टोलु कोइलोअ कोअते ठोरवीइल्यी वेलेपोअ परसार कोअहूं जोवे, ते माआं तिवार ए होय:3सोव दिही कामकाज कोआय, पोन हांतवू दिही वोडू आरामोअ आन पवित्र सभाआ दिही होय; तियामेहें कोड्लोज कामकाज ने कोअहूं जोवे; तो तुमाआ आक्खा कोअमेहें यहोवा देवोअ आरामोअ दिही रोअहूं जोवे.”4यहोवा देवोअ तिवार जे एकेकाआ ठोरवीइल्यी वेलेम तुमुहूं पवित्र सभाआ काजे परसार कोअहूं पोड़े ते ए तिवार होय.5पेलठा मोयनाआ शोवदावा दिहोअ दिही हांस्तीइ वेले यहोवा देवोअ तिवार ओवुहूं जोवे.6आन तियाज मोयनाआ पोंद्रावा दिहोहो यहोवा देवोअ काजे बिगर खमीर रोटाआ तिवार ओवुहूं जोवे; तियामेहें तुमू हांत दिही जाआं बिगर खमीर रोटू खाया कोअजा.7तियांम रोत पेल्लेए दिही तुमाआ पवित्र सभा रोअहूं जोवे; आन तेदिहीं किज वोतो मा कोअहा.8पोन हांतवे दिही जाआं तुमू यहोवा देवोहो आगीइ गाराहा आप्या कोअजा; आन हांतवे दिही पवित्र सभा रोअहूं जोवे; तेदिहीं किज वोतो मा कोअहा.9फाश्योअ यहोवा देवे मोशेहे कोयो,10“इस्राएलवालाहां को, जाहां तुमू तिया देसोम फोहाहा जियाहा यहोवा देव तुमुहूं आपेहे, आन तियां खेतो मेऱ्यीइ पाक वाडहा,, ताहां जिवज्योअ पाकला खेतोअ पेल्लीइ कामायीइ पुला पुंजाराआ जागे लेत आवजा;11पुंजारु तिया पुलाहा यहोवा देवोअ सामने उतारे, के तो तुमाआ वोतीइ मान्न्य ओत सेके; तो तियाहा आरामोअ दिहोअ हांदाम उतारुहूं जोवे.12आन जेदिहीं तुमू पुलू उतारहा, तेदिहींज एका वोरह्योअ निर्दुस मेडाआ बासो, यहोवा देवोअ काजे आगीइ गाराहा कोअजा.13तियाअरी ओनोअ भेट आन दोहो किलो केलवीइल्यो एपाआ मोयदो जोवे, ए देवोअ काजे हाजी गुंदाअनारी वस्तु होय; तिहीं रोत पियाआ भेट कोत शाराने भाग दाराक्शाआ होराआ भेट कोअहूं जोवे.14आन जाअहूं जाआं तुमू ए भेट तुमाआ देवोअ जागे ने लेत जाहा, ताअहूं जाआं पेल्लीइ कामायीइ रोटू नेताहां निले कोहें नेताहां पुजल्या दाणा मा खाहा; ए तुमाआ पिड़ीन पिड़ीमेहें तुमाआ पुरा घराणामेहें हादाजोल्म्यीइ रिती ठोरे.”15फाशोअ तिया आरामोअ दिहोअ बिहीरे दिही तुमू उतारीइलोअ काजे भेटेए पुला लेत आवहा, तेदिहींज रोत पुरा हांत आरामोअ दिही गोणित लेजा;16हांतवा आरामोअ दिहोअ हांदार्युउ दिही जाआं पोन्नास दिही गोणजा, आन पोन्नासवा दिहोम यहोवा देवोअ काजे नोवा ओनोअ भेट सोड़वीइजा.17तुमू तुमाआ कोअमेहें रोत एपाआ बेन दाहावा भागोअ मोयदाआ बेन रोटा आलवीइलोअ भेटेए कोअते लेत आवजा; आन ते खमीर पेलीत रांदजा, आन ते यहोवा देवोअ काजे पेल्लीइ कामाय ठोरे.18आन तिया रोटाअरी एकेका वोरह्योअ हांत निर्दुस मेडाआ गिद्ले, आन एक बासो, आन बेन मेडा गाराहा कोअजा; तियांअरी ओनोअ भेट आन पियाआ भेट देवोअ काजे भेट कोअजा; ए देवोअ काजे हाजी गुंदाअनारी वस्तु होय.19फाश्योअ पापोअ गाराहाआ काजे एक बोकड़ू, आन मिलन गाराहाआ काजे एकेका वोरह्योअ बेन मेडाआ गिद्ले सोड़वीइजा.20ताहरुउ पुंजारु तियांहां पेल्लीइ कामायीइ रोटू नेहें यहोवा देवोअ सामने उतारीइलोअ भेटेए कोअते आलवे; आन यां रोटाअरीज ते बेन मेडाआ गिद्ले बी आलवाअहूं जोवे; ते यहोवा देवोअ काजे पवित्र, आन पुंजाराअ भाग ठोरे.21आन तुमू तेदिहींज ओं परसार कोअजा के आज आपाआ एक पवित्र सभा ओवनारीही; आन मेहेनतीइ किज वोतो मा कोअहा; ए तुमाआ पुरा घराणाम तुमाआ पिड़ीन पिड़ी जोल्मार्यीइ रिती ठोरे.22“जेहेलाम तुमू तुमाआ देसोमेर्योअ ओन वाडहा, ताहां तुमाआ खेतोमेएं आखोज मा वाडहा, आन खेतोमेएं हेरवू मा होदहा; पोन तो गरब्योहो आन पारका माअहुंउं कोअते रोअहूं द्या; आंय तुमाआ यहोवा देव होय.”23फाश्योअ यहोवा देवे मोशेहे कोयो,24“इस्राएलवालाहां कोजी के हांतवा मोयनाआं पेलठू दिही तुमाआ कोअते वोडू आरामोअ दिही रोअहूं जोवे; तिया दिहोअ ओर कोइत आपीइलोअ काजे तुरी फुकाअहूं जोवे, आन तेदिहींज एक खास आरामोअ सभा टोलु वालुहूं जोवे.25तेदिहीं तुमू मेहनतीइ किज काम मा कोअहा, आन यहोवा देवोअ काजे एक गाराहा सोड़वीइजा.”26यहोवा देवे मोशेहे कोयो,27“तियाज हांतवा मोयनाआं दाहवा दिहोहो पाप टापीइलाआ दिही मानजा; तो तुमाआ पवित्र सभाआ दिही रोय, आन तेदिहीं तुमू तुमाआ-तुमाआ जिवोहो उपासोवाअहीं तारास देजा आन यहोवा देवोअ काजे गाराहा सोड़वीइजा.28तेदिहीं तुमू कोड्लीज जातीइ कामकाज मा कोअहा; काहाके तो पाप टापीइलोअ दिही ठोरवाअयुहू, जियामेहें तुमाआ यहोवा देवोअ सामने तुमाआ कोअते पाप टापाये.29तियाहा काजे जो माअहुंउं तेदिहीं उपास कोइत फुकल्यी डेडी दुख वेठे, ताहां तो तियाआ माअहोंम रोत आरवी देअहूं जोवे.30आन जो माहुंउं तेदिहीं कोड्लीज बी जातीइ कामकाज कोए, ताहां तिया माहुंहूं आंय तियाआ माअहोंम विसमेहें रोत आरवी देहीं.31तुमू कोड्लीज जातीइ काम-काज मा कोअहा; ए तुमाआ पिड़ीन पिड़ीमेहें तुमाआ घराणाम हादाजोल्म्यीइ रिती ठोरे.32तो दिही तुमाआ काजे वोडू आरामोअ दिही रोअहूं जोवे, तेदिहीं तुमू उपासोवाअहीं जिव जिवोअ जिवोहो दुख देजा; आन तियाज मोयनाआं नोव्वा दिहोअ हांजेपोअ रोत्ते बिहीरा दिहोअ हांजेपोअ जाआं तुमाआ आरामोअ दिही मानजा.”33फाशुउ यहोवा देव मोशेहे कोयो,34“इस्राएलवालाहां कोजी के तियाज हांतवा मोयनाआं पोंद्रावे दिही रोत हांत दिही जाआं यहोवा देवोअ काजे खुपड़ीइ तिवार रोअहूं जोवे.35पेलठे दिही पवित्र सभा रोअहूं जोवे; तेदिहीं मेहेनतीइ काम कोड्लोज मा कोअहा.36हांतू दिही यहोवा देवोअ काजे आगीइ गाराहा सोड़व्या कोअजा, ताहरोअ आंठवे दिही तुमाआ पवित्र सभा रोअहूं जोवे, आन यहोवा देवोअ काजे गाराहा सोड़वीइजा; तो वोडी सभाआ दिही होय, तेदिहीं मेहेनतीइ काम किज मा कोअहा.37“यहोवा देवोअ ठोरवाअला तिवार एज होय, यांमेहें तुमू यहोवा देवोहो गाराहा आपजा, मोन्ज्ये आगीइ गाराहा, ओनोअ भेट, मिलन गाराहा आन पियाआ भेट, हारेक गाराहा तियींइं-तियींइं ठोरवाअली वेलेपोअ सोड़वाअहूं जोवे आन पवित्र सभाआ परसार कोअहूं जोवे.38यां आखाम रोत वादार यहोवा देवोअ आरामोअ दिहोहो मानजा, आन तुमाआ भेट आपजा, पालनी कोअजा, आन खुसीइ गाराहा कोअजा आन यहोवा देवोहो खुसी वाअहीं भेट आप्या कोअजा.39“हांतवा मोयनाआं पोंद्रावा दिहोहो, जाहां तुमू तुमाआ खेतोअ कामाय टोलु कोइत लेहा, ताहां हांत दिही जाआं यहोवा देवोअ तिवार मानजा; पेलठू दिही खास वोडू आरामोअ दिही रोय, आन आंठवू दिही बी वोडू आरामोअ दिही रोय.40आन पेलठे दिही तुमू हाजा हाजा साड़ोअ फलवे, आन खारक्याआ डाल्यी, आन जाअखा साड़ोअ डाल्यी, आन खाडीइ मेरेए खोड़ लेत कोइत यहोवा देवोअ सामने हांत दिही जाआं खुसी कोअजा.41हारेक वोरीही हांत दिही जाआं यहोवा देवोअ काजे ओ तिवार मान्या कोअजा; ए तुमाआ पिड़ीन पिड़ीमेहें हादाजोल्म्यीइ रित ठोरे के हांतवा मोयनाम ओ तिवार मानाअहूं जोवे.42हांत दिही जाआं तुमू खुपड़ीम रोजा, मोन्ज्ये जें जोल्माऱ्येएज इस्राएलवाले होय तें आक्खे खुपड़ीम रोअहूं जोवे;43याअकाजे के तुमाआ आवनारी पिड़ीन पिड़ीइ माअहुंहूं मुंदू रोय, के जाहां यहोवा देव आपुहूं जे इस्राएली होये मिसर देसोम रोत काडीत लेतावतुतो तेहेलाम तिये तियांहां खुपड़ीमेहें मिक्येते; आंय तुमाआ यहोवा देव होय.”44आन मोशे इस्राएलवालाहां यहोवा देवोअ तिवारोअ ठोरवाअली वेल कोताप्यी.
The Word for the World International