1 Pet4
1emmale iδekan elmesiyH yeθwejjeε g elbδen, Hedreθ xenyum zaδe imenewwem bac eθeθwejεem m nette, εlexaTer elli yeθwejjeε g elbδen eyqaTeε elγeldeθ.2usinc eyedder elbqiyyeθ n elεemres g elxeδmeθ s elli yenne erreb, muc g echawi n eddunyeθ.3w yezziyyawem elweqθ elli θεeddemti etεenaδem g iberraniyen, θeTTefem ebriδ n elfsaδ d eccehweθ d wesxar d weεbeδ n leSnam.4w nihnin ture mesθeγrbiyn essiywem max entetεeniδemc g elfsaδ biyδe usinc exensendren elqeDrewwem,5yemenni nihnin δ eδuwcen elHsab y erreb elli nette mestεed eyHaseb elli edderen d elli emmuwθen.6w heδakeεlac θemmen elbcareθ Hette y elli emmuwθen zade bac e mHasben m leεbaδ edderen g elbδen usinc edren γer erreb s erruwH.7w ture θeqreb ennihayeθ n kulciy, erreθ elbalewwem, eθfaqem y ezzelliθ.8w edj eθkuwn exse binetkum ettemeqqerθ qebl kulciy εlexaTer exse eθsetter egget δ elxDaye.9Deyfeθ beεeDkum belgde menγiyr eqlaq,10w edj eycerix kul iyjen essiywem elli uceyes erreb yiddiyn, m iwxiylen δ eSSullaH f elberkeθ n erreb elkul.11w iδekan yuθlay iyjen essiywem edj eyuθley sedwi n erreb, w iδekan nette δ exδiym edj eyexδem s elquδreθ elli esetyuc erreb, bac e yeθmejjeδ erreb g kul ciy s yesuwε elmesiyH, γers elmejδ d elεezzeθ diyme. amiyn.12ey ewmaθen elli exesγawem, eθeθεejbemc s elmHayen elli exennekwaneθ s elεefiθensen bac e xenjerrebneθ, ekeyenni δ elHajeθ ettuγribθ tejreyawem,13yemenni eferHeθ m elli etceraxem elmesiyH g elwjeyεes, emmale max e yeθjelle elmejδes eθeferHem zade.14SeHHe liykum, iδekan εeyernawem s ellesm n elmesiyH, εlexaTer erruwH n elmejδ, erruwH n erreb, eyeggez fellawem.15yetteθwejjiεc iyjen essiywem eθwejjeε n imejrem ziyγ δ essareq ziyγ δ ecerrir ziyγ δ eklufi,16yemenni iδekan yeθwejjeε εlexaTere δ emesiyHi, eyeθHeccemc w edj eyecxer erreb s ellesme.17yiweD elweqθ n elqDe w δ eyebde s iθbab n elHuwc n erreb. w iδekan tebδe essiyne max δeθkun ennihayeθ n elli elleqbilenc elYinjiyl n erreb?18w elxθab yeqqar: "iδekan ibehhayen menεen beεεeδ etεeb max δeθkuwn ellexreθ n elkuffar elγullaĎ?"19yemenni elli etteθwejjaεen emmax i senyexes erreb, edj ernin agen elxiyr selmen imenensen y elli yexleqθen.
Chutney Media Agency Limited