Angaramɔ (Genèse)34
1Ma swe, Dina, bebhoko ka Lea bhɛa ha Zakob gboa mɔ nɛ̂ zɔk hio bhoko mɔ le Kanaan.2Sisem, bewei pɛ Hamor, wan pɛ hio wi kandɔ Hivi, zɔka wɛnɛ. A baa wɛnɛ nɛ ngaya pen nɛ̂, nɛ a ɔanu hinɛ wɛnɛ nɛ ngaya.3Sisem gde tɛ wa pentɛ ha Dina, bebhoko pɛ Zakob. A ngoya wɛnɛ pentɛ nɛ a ngoy mɔ de nde sila Dina aba fin wɛnɛ.4A tɔa ha bafa wa Hamor nde: « Ɛnɛ ani wen bebhoko ɛngɛ ha mi. Mi ngoya sio wɛnɛ tuka ko mi.»5Zakob zea nde Sisem fɛngsa bem pɛa Dina. Maa hio bewei pɛa bhɔna ha zang bɛlɛ hinɛ hio zugili namdalɛ. Mɛgi, a tɔ ma wen na kanɛ̂ pea pɛ hio bewei pɛa.6Hamor, bafa mɛ Sisem nɛa ha pɛ Zakob mɔ tɔwen ha wɛnɛ.7Ka hio bewei pɛ Zakob pea, mbwa zea wen mɔ ka hɔa. Hapata wen ɛngɛ, yo dung tuka ɛ yaa nɛ̂ mbwa, nɛ gdanga ngambi baa mbwa. Kpasawen, mɔ ka Sisem dea, nɛ gdangamɔ pentɛ ha ɔa nu hinɛ bebhoko pɛ Zakob. Ɛ lɛm de mɔ tuka ɛngi ha Israel na.8Maa, Hamor tɔa ha mbwa nde: «Bewei pɔm nɛ wɔtɛ bebhoko ɛngɛ. Ɛnɛ ha wɛnɛ ha bem pɔm asi wɛnɛ nɛ bhoko.9Ɛnɛ de nam nɛ ɔ: Ɛnɛ beha ha ɔ hio bebhoko pɛ ɛnɛ mɔ si nɛ bhoko, nɛ ɔ fin, ɔ beha ha ɛnɛ hio bebhoko pɛ ɔ mɔ si nɛ bhoko.10Ɛnɛ bede le sanga nɛ ɔ. Lea bedung nɛ pɛ ɛnɛ, nɛ ɛnɛ bede mɔ sila ɛnɛ ang, sɛɛ nɛ ɛnɛ bedung hio wana.»11Sisem wantɛ tɔa ha hio ya mɛ bebhoko hinɛ bafa mɛ bebhokoa nde: « Ɛnɛ de kɔbhɛtɛ mi, nɛ mi beha hio wi mɔa ha ɛnɛ.12Ɛnɛ lɛma ana mbɔli pata bhoko ha kɔ̂ mi, hinɛ dɔka hio wi mɔ. Mi befuti hio wi mɔ fɛt ka ɛnɛ be ani ha kɔ̂ mi. Maa Sɔna, ɛnɛ be haa mi bebhokoa mi si wɛnɛ.»13Hio bewei pɛ Zakob kiforowen ha Sisem hinɛ bafa wa Hamor. Mbwa tɔ nɛ̂ yɛlɛ ha mbwa Sisem dea mɔ foy ha tɛ ya mbwa bebhoko.14Hio bewei pɛ Zakob tɔa ha mbwa nde: «Ɔ lɛm ha ya ɔ mɔ bhoko nde ma wan Sɔru asi wɛnɛ na. Yo bedung nɛ̂ mɔ foy ha lî ɔ.15Ɔ be mɛkiri nɛ hio wi mɔ ka ɛnɛ ani Sɔna ha ma mɔ ndang. Lɛma nde hio wei mɔ kandɔ pɛ ɛnɛ agɔn Sɔru mbwa tuka ɔ.16Mɛgi ɔ beha hio bebhoko pɛ ɔ ha ɛnɛ mɔ si, nɛ ɔ besi hio bebhoko pɛ ɛnɛ nɛ bhoko. Ɔ be ɔ sanga hinɛ ɛnɛ, nɛ mɔsoykisi, ɔ bedung nɛ̂ kandɔ ndang.17Ka ɛnɛ kafa gɔna Sɔru ɛnɛ, ɔ bekay hio ya ɔ bebhoko yunɛ̂ ha kɔ̂ ɛnɛ, nɛ ɔ begbin le pen.»18Hio wen ɛngɛ nɛ dedea ha sila Hamor hinɛ bewei pɛa Sisem.19Nɛ hasa, Sisem gdea tɛ wa mɔ de mɔ ka ɛ ana, hazu wɛnɛ ngoya sio bebhoko pɛ Zakob. Ɛ a yuo ke wa pentɛ ha zang nam pɛ bafa wa.20Hamor hinɛ Sisem tɛa ha nu le nɛ angiri hɛa mbele ha hio wi mɔ le pɛ mbwa nde:21«Hio wi ndɔng bo nɛ wen hinɛ ɔ na. Mbwa lɛma ɔa hinɛ ɔ ha zang le ɛngɛ. Mbwa lɛma dea mɔ sila mbwa fɛt nɛ gaamɔ ha zang lea. Ɔ kay hio bebhoko pɛ mbwa nɛ bhoko, nɛ ɛnɛ gde mbwa asi fin hio bebhoko pɛ ɔ nɛ bhoko.22Hio wi ndɔng be mɛkiri dea le hinɛ ɔ kade ɔ adung ma kandɔ ndang, maa Sɔna hazu ma mɔ ndang: Hio wei kandɔ pɛ ɔ fɛt agɔn Sɔru tuka pɛ mbwa.23Ka ɔ kɔa ha wen pɛ mbwa, mɛgi mbwa betɛ ɔ sanga hinɛ ɔ. Hio zugili namdalɛ, hio wi mɔ pɛ mbwa banɛ hio sari pɛ mbwa fɛt bedung nɛ̂ pɛ ɔ.»24Hio wi fɛt ka badung ang ha ngimɔ ka ɛ ha tɔa nɛ wen ɛngɛ mɛkara nɛ wen pɛ Hamor hinɛ pɛ bewei pɛa Sisem. Mɛgi hio wei zang lea fɛt gɔna Sɔru mbwa.25Yala tar hapataa, ha ngimɔ ka hio lîdalɛ Sɔrua bhɔna yimɔ hio wei ndɔng nɛ ngaya, hio bewei pɛ Zakob, Simeon hinɛ Levi ka dung nɛ hio ya mɛ Dina, wi ndang ndang kuo gbapa pɛa, nɛ le ha zang ngbalea ha ngimɔ ka hio wi ze pɛ mbwa nde mɔ fɛt nɛ gaa ha zang lea, mbwa angara gbɛa hio wei lea fɛt ha nu nɛ fio.26Mbwa gbɛa Hamor hinɛ bewei pɛa Sisem. Mbwa lea ha zang twa pɛ Sisem, mbwa kuo ya mbwa Dina gbo nɛ̂ nɛ pen.27Hio olo bewei pɛ Zakob teka hatɛ hio wɔlwi ndɔng nɛ kay hio wi mɔ tɛ mbwa, nɛ hio wi mɔ ha zang lea fɛt hazu ɛ dea mɔ foy hatɛ ya mbwa mɔ bhoko.28Mbwa kaya hio sami, hio mbori pɛ hio wi pɛ Sisem, hio nday, hio toyfok, pɛ mbwa banɛ hio wi mɔ zang lea hinɛ ɛ ndɔng ka dung ha zang mɔ fɛt.29Mbwa kaya hio wi mɔ pɛ hio wi ndɔng fɛt, hio bem, hio ko pɛ mbwa, nɛ mbwa kaya hio wi mɔ zang twa pɛ mbwa fɛt pen nɛ̂.30Zakob tɔa ha hio bewei pɛa nde « Ɛnɛ pio gasa ngɔtɛ hazu mi, nɛ hawenzu ɛnɛ, hio wi mɔ Kanaan nɛ mɔ Perizi be kafi mi. Ɔ dɔk na nɛ mbwa lɛma ndɛma may sungiri mi, nɛ mbwa bede gdanga nɛ mi hinɛ nam pɔm.»31Simeon hinɛ Levi kiforowen nde: «yonɛ wala nde bewie ɛngɛ a de nɛ ya ɔ tuka bhoko de wanza nde?»
The Seed Company