2 Odotikaa Maxaafa4
Galmiinke Miyyuwixxa Wo'ma
1Moyanji Solomoon qeerrinne lame tomme ciqile ba'linne lame tomme ciqile iimi'a hojja tomme ciqile kadeeka sageettoti tolchimalcho giisse.2Ittanni afo'o isikik ba'linni kasakenaa'n kasii qico'n tomme ciqile; hojja isixxi onde ciqile kadeeka gonga baqinseeke sibilinni giisse; isixxi qarqari isiki mikemaa wodda sase tomme ciqile kade.3Gongiinke afo'i butti darree'n mitte mitte ciqile'n tomme tomme jibootiinxa fakke gongii qarqara'ni giisse; ookko jibbotiinxi fakkenna gongiinke biso kadee lame dala'ni baqisende giisendeexxemman.4Gongikinna tommennaa lame jibootixxe fakke'n hana uureeke kadaa wodda; jibootikinna sasi middi darree'n sasi dhidhimi darree'n sasi bita'i darree'n sasi boroti darree'n uunda'nemman. Gongikinna jibootiinxe fakkuwwa'n hana offo'leeke kadaa wodda duuchchiinge jibootixxe fakkeki dudduri giddi darre'n wirri hiyyeemman.5Gongiinki furdinni mitte taakko; afo'i kinn buudatike afo'ishsha yookaan suufetika daraaro fakkaata'nemman; gongikinna jaane tomme kuma leetiro aadha'emman.6Ittanni tomme anshecatika gonguwwa giissiseexxi onde bita'ake'ni, onde kinn middi darree'n, ugge; gonguwwi ciincatike tolchi'a shiqinshachchuwwa anshinaake kadaa wodda; lumoke gongiki wodi'i kinn qeesole anshexxaaken.7Isi hunjo'a kulemmashaanni; tomme worqetika torbaane dhankoka xaasa giissiseexxi galmi giddi'a e'yisheexxi; onde bita'i darree'n; onde middi darree'n ugge.8Tomme beera giisseexxi, onde bita'i darree'n onde middi darree'n galmi giddo ugge. Higgeenni dhibba hubbuqitte qoruwwa worqeti giisse.9Solomooni qeesteenna baxxe giisse; ittanni ba'laxxa baxxenna giisseexxi cufanuwwa giisseechchi uduma cufanuwwa sageettoti buqe.10Lummoka gonganna galminba'n bita'i darre'a shiqqaaxxe boro'n hedheeke kasaa'ni ugge.11Ittanni Kiraami odolchuwwa, faafasujuwwakanna ferritte qoruwwa giisse; Huraaminna galmi giddixxe huje'a kadaaka miyyuwwa moyanjo Solomooni'a huje bire; hujechchuwwinna,12Lame utuphuwwa,utuphuwiinxe qacce'n hana hexxeexxaqoretixxe fakkexxa lame bokkuwwa;utuphuwake'n hana hexxexa lamiinxa;qoretixxe fakkexxa bokkodanchoossaaki lame dowwek hachchabuwwi;13Utuphuwwake'n hana hexxeexxa lameqoretixxe fakkexxa bokko danchoositaashshamitte mtte marbabe'a lame dala romaanuwwalame dalixxe marbabe'aamitteba shoole dhibba romaanuwwa,14Ansheccatixxi qoruwwa hana ofoldammake offo'lisanjuwwinni;15Gonganna ookkone gongi hana ofo'lemmak tommennaa lame jibootuwwa;16Odolchuwwa, faafasunjuwwa, otisanjiinxi mooqquwwanna konneechchuwwinn welti shiqaak miyuwwan.Huurami Aabi Duuchchi Woddike Goottike galmi giddo la'onfachchotee kadaaka moyanjo Solomooni'a giisseki miyyuwi duuchchi moronde ca'a assineexxe sageettonni giissineekemmani.17Moyanji Solomooni konne sageettotike sibiljika miyuwwa sageettotika sibiljo baqisee faariinke miyixxa bifa afaashsha faariinke miyi giddo dunemeek Sukootixxenna Tsaritaanixxe oddo'n hexxeexxe Yordaanoosixxe dhooqa'niten.18Kunni Solomoon giissiseechchi duuchchi yo'oshsha heddoke kademaxxe sageettotiki sibiljik ha'uri hiteeke kadaxxa egeenebaan.19Ittanni Solomoon Mageniinke galmi giddo hujete'n hosaaka miyyuwa giisseeki konneechchinn butti'a hedheen:Worqetika tolchimalcho;Kebbo ugginaaka beera;20Uwwemeeke seerishshaanni; woyyitte woyyo edigama xabaashsha ca'itte worqenni giissineeka torbaane dhankoka offoilisanjo xassuwwinginni welt;21Worqetike daraarixxe misilexxi hujuwwa, xassuwwikinna qarabuwwa ca'itte worqenni hunjeexxemmani.22Ca'itte worqenni giissineexxi xassa xorsinamachchuwwi, fiffixxatee kaddaaxxi ferritte qoruwwa, mooqquwwanna hixaana gunbamachchuwwi, iittann galmiinki worqetik cufanuwwi, tinninna Woyyitte woyyo giddi darreeki cufanuwwinna galmiinxe ba'laxxe kutaki cufanuwwi ca'itte worqenni hunjeekemman.The Word for the World International