Acts1
1Ơ cô Thê-ô-phi-lơ, ănh gĕh ôp lŭh vrŭq tăm chêr sŭng dâq di muôi sĭq ăp sinlơ cồ Siđăch Yêsu gĕh pơq vôq ôp nggâm pađau tămti,2an tât năr Siđăch gĕh wŏq hao trôq, lăm Nĕh don Siđăch Wênh chĕq paq camvŭm săng pađăr an khây con tuyh cồ Nĕh gĕh săch sŏq,3khoi cồ khây tamun cồ Siđăch gĕh tât pơq an khây nĕh sây pành nơm hôm rĭh, alưr lăm Siđăch vlam lŏh sat, nggâm bây gŏq păch candân, mvăc gĕh lŭh bây khây nĕh sŭng puôn jât năr, en nhai khây sinlơ sĭq daq Cô Voq de.4Lăm tăm vlam măt bây khây nĕh, Siđăch gĕh săng khây nĕh vâng saq lŭh ntrăch a Yê-ru-sa-lem, palâq sĭq vlâq căh câp gơ camvŭm pănggân Siđăch Vap de, “cồ camvŭm cồ pôp ŏh gĕh chăng a Ănh,5pành Yăng gĕh ôp vrŭq ŭm vôq a daq, cồ canŏq a lưr khây năr heq đăng jŏq, pôp ŏh gĕh ŭm vôq a Siđăch Wênh.”6Payh canŏq, lăm tât tăm simơ, khây nĕh lŭp Siđăch pành: “Ơ Siđăch, gal Cô tatao sĭq vlâq daq I-sơ-ra-ên sŭng lăm heq hẩng?”7Cồ canŏq, Siđăch nhai bây khây nĕh: “Vadâq ha khây mva cồ Vap gĕh sŭmmrăp bây kwiềng Nĕh de, sinlơ nŏq đăng gĕh chĕq an pôp ŏh gưt.8Cồ canŏq, pôp ŏh nhâng wŏq gĕh prơn gŭn lăm Siđăch Wênh jưr vlơ nơm, en pôp ŏh jêng khây tamun ôp candân Ănh de u Yê-ru-sa-lem, sŭng lĕq ntĕh Yu-đê, ntĕh Sa-ma-ri, bây an tât lĕq sŭng play ntĕh.”9Alưr lăm nhai khây camvŭm nŏq, en sŭng lăm khây nĕh hôm deng sên, nŏq Siđăch gĕh wŏq hao, en du lawang tŭq king Siđăch ntrăch a măt khây nĕh.10Sŭng lăm khây nĕh chĕq măt tăm hơch hao vlơ trôq lăm Siđăch saq hao, en sên tĭq, var ndu tamun klô chuq su ao voq tât tao yăq u maq khây nĕh.11Khây nĕh nhai: “Ơ khây tamun Ga-li-lê tĭq, lŭh khây pôp tao yăq tămhơch hao vlơ trôq canŏq? Siđăch Yêsu heq, cồ Candranh gĕh wŏq hao vlơ trôq ntrăch a khây pôp, khoi tât dân ca sinlơ cồ khây pôp gĕh sây Nĕh saq hao trôq.”12En nŏq, khây nĕh sĭq vlâq tât Yê-ru-sa-lem a vwây gŭng cồ gĕh cuôl pành Ô-li-ve, cồ gŭng u mơch Yê-ru-sa-lem, gĕh vau trong saq sŭng du năr Sa-bat.13Lăm khây nĕh sĭq tât en, khây nĕh saq hao vlơ nhi prĭh cồ gatŭq khây nĕh gŭq n'un, sŭng nŏq gĕh Phi-e-rơ, bây Yăng, nggâm Ya-cơ bây Anh-rê, Phi-lip bây Thô-ma, Ba-thê-lê-mi bây Ma-thi-ơ, Ya-cơ con klô A-phê bây Si-môn Sê-lôt, nggâm Yu-đe, con Ya-cơ de.14Lĕq săq khây nĕh tăm mbêr nuih sŭng sinlơ tăm vatom muôi sŭng vrŭq vơu ngwân, bây khây tamun ur nggâm Ma-ri, mê Siđăch Yêsu de, en bây khây ŏh klô Siđăch de.15Sŭng khây năr nŏq, lăm tao yăq u vlăc cađar khây pôp ŏh nơm (vagŏq khây tamun u gatŭq heq gĕh vlơ tĕh du rayĕng var jât), Phi-e-rơ nhai:16“Wĭnh khwây khây dêq cô, cồ khây pôp ŏh, heq cồ sinlơ nhâng bâng căh gĕh jêng dip sŭng Sirăq Gŭn, cồ camvŭm cồ Siđăch Wênh gĕh don mŭnh vatau Đa-vit chĕq nhai lor sĭq Yu-đa, cồ tamun gĕh jêng ti iau trong an vu saq nhŭp Siđăch Yêsu.17Mvăc nĕh gĕh sên simơ bây vơn bây gĕh wŏq păch nơm de sĭq vrŭq ôp heq.”18(En nŏq nĕh gĕh vro du lôq tamăn a jên prơn vrŭq ôp đăng yăh sŏng de, en lăm vông hlŏq yăp camvôq jưr, nĕh pachăh talaq, hôm talaq talơm nĕh de talŭh tu ling.19Vrŭq heq gĕh jêng sinlơ tăm gưt an lĕq khây tamun cồ gŭq u Yê-ru-sa-lem. Payh canŏq, tamăn nŏq gĕh cuôl a trong palây khây nĕh de pành “Hac-en-đa-ma”, nŏq pành “tamăn n'ham”.)20“Mvăc vrŭq nŏq gĕh chêr sŭng sirăq Adŏh:‘Căh chĕq tamăn nĕh de jêng vi singot,khoi vâng gĕh vu lây rĭh u nŏq,’ bây‘Căh chĕq tamun ndây wŏq sŏq vrŭq nĕh de.’21Payh canŏq, nhâng gĕh khây tamun cồ gĕh saq bây vơn sŭng lĕq năr khây cồ Siđăch Yêsu sĭq saq sŭng ganai vơn,22pơq vôq a vrŭq ŭm vôq Yăng de an tât năr cồ Siđăch gĕh wŏq hao ntrăch a vơn — muôi sŭng khây nĕh nŏq gĕh jêng tamun ôp candân sĭq sinlơ tao rĭh sĭq vlâq Siđăch de nggâm bây khananh.”23Nŏq khây nĕh iơq hao var ndu, Yô-sep gĕh cuôl pành Ba-sa-ba, khoi gĕh tan'hya săq pành Yuc-tu, bây Ma-thia.24En lăm vơu ngwân, khây nĕh nhai: “Cŭh Cô Voq, nơm Cô, cồ candranh gưt nuih talaq ăp ndu, wĭnh pađau lŭh muôi sŭng var ndu heq cồ Cô gĕh sŏq vu lây25chĕq wŏq gatŭq vrŭq ôp heq de nggâm vrŭq ôp con tuyh cồ Yu-đa gĕh lăq chĕq chĕq saq tât gatŭq nĕh de.”26Khây nĕh tăm pol sĭq var ndu nŏq, en pol tarŏh dip Ma-thia, canŏq en nĕh gĕh iơq bây sŏq lăp simơ bây mât muôi con tuyh.
FAR EAST BROADCASTING COMPANY